Who is Aditya Ashok? Indian-Origin Spinner Leading NZ Attack
స్వదేశంలో ఇవాళ్టి నుంచి (జనవరి 11) భారత్–న్యూజిలాండ్ మధ్య మూడు మ్యాచ్ల వన్డే సిరీస్ ప్రారంభమైంది. వడోదర వేదికగా జరుగుతున్న తొలి వన్డేలో టీమిండియా టాస్ గెలిచి ఫీల్డింగ్ ఎంచుకుంది. ఈ మ్యాచ్లో భారత జట్టు ఓ కీలక ప్రయోగంతో బరిలోకి దిగింది.
సాధారణంగా కనిపించే కాంబినేషన్కు భిన్నంగా, ఈ మ్యాచ్లో టీమిండియా ఆరుగురు బౌలర్లతో ఆడుతోంది. స్పిన్ విభాగంలో వాషింగ్టన్ సుందర్, రవీంద్ర జడేజా, కుల్దీప్ యాదవ్లకు అవకాశం దక్కగా, పేస్ బాధ్యతలను మహమ్మద్ సిరాజ్, ప్రసిద్ధ్ కృష్ణ, హర్షిత్ రాణా మోస్తున్నారు. ఈ బౌలింగ్ కాంబినేషన్తో న్యూజిలాండ్ బ్యాటింగ్ను నియంత్రించాలని భారత జట్టు భావిస్తోంది.
ఇక న్యూజిలాండ్ జట్టు తరఫున క్రిస్టియన్ క్లార్క్ ఈ మ్యాచ్తో అంతర్జాతీయ అరంగేట్రం చేశాడు. మరోవైపు భారత మూలాలున్న స్పిన్నర్ ఆదిత్య అశోక్పై కూడా ప్రత్యేక దృష్టి నెలకొంది. రైట్ ఆర్మ్ లెగ్ బ్రేక్ బౌలర్ అయిన ఆదిత్య, గూగ్లీలు వేయడంలో మంచి నైపుణ్యం కలవాడిగా పేరొందాడు. ఈ మ్యాచ్లో అతడే న్యూజిలాండ్ ప్రధాన స్పిన్ అస్త్రంగా బరిలోకి దిగుతున్నాడు.
ఎవరీ ఆదిత్య అశోక్?
ఆదిత్య అశోక్ 2002 సెప్టెంబర్ 5న తమిళనాడులోని వేలూరులో జన్మించాడు. అతనికి నాలుగేళ్ల వయసు ఉన్నప్పుడే అతని కుటుంబం న్యూజిలాండ్కు వలస వెళ్లి ఆక్లాండ్లో స్థిరపడింది. అక్కడే చదువు పూర్తి చేసిన ఆదిత్య, మౌంట్ ఆల్బర్ట్ గ్రామర్ స్కూల్లో విద్యాభ్యాసం చేశాడు.
2020 అండర్-19 ప్రపంచకప్తో న్యూజిలాండ్ జూనియర్ జట్టుకు ప్రాతినిధ్యం వహిస్తూ అతడు గుర్తింపు పొందాడు. ఆ తర్వాత దేశీయ క్రికెట్లో ఆక్లాండ్ తరఫున స్థిరంగా రాణిస్తూ సీనియర్ సెలెక్టర్ల దృష్టిని ఆకర్షించాడు.
2021 డిసెంబర్లో సూపర్ స్మాష్ టోర్నీ ద్వారా టీ20 ఫార్మాట్లో అరంగేట్రం చేశాడు.
2022 జనవరిలో ఫోర్డ్ ట్రోఫీతో లిస్ట్-ఏ క్రికెట్లోకి అడుగుపెట్టాడు.
2022–23 సీజన్లో ప్లంకెట్ షీల్డ్ ద్వారా ఫస్ట్ క్లాస్ క్రికెట్లో అరంగేట్రం చేసి తొలి మ్యాచ్లోనే ఐదు వికెట్లు తీసి సత్తా చాటాడు.
ఆదిత్యకు 2023 మార్చిలో తొలిసారి న్యూజిలాండ్ సీనియర్ జట్టు నుంచి పిలుపు వచ్చింది. ఆ ఏడాది ఆగస్టులో యూఏఈతో జరిగిన మ్యాచ్లో అంతర్జాతీయ టీ20 అరంగేట్రం చేయగా, డిసెంబర్లో బంగ్లాదేశ్తో జరిగిన మ్యాచ్లో వన్డే డెబ్యూ చేశాడు. ఇప్పటివరకు అతడు న్యూజిలాండ్ తరఫున రెండు వన్డేలు, ఒక టీ20 మ్యాచ్ మాత్రమే ఆడినా, అతని ప్రతిభను చూసి విశ్లేషకులు న్యూజిలాండ్ స్పిన్ భవిష్యత్తుగా అభివర్ణిస్తున్నారు.
ఇంతకుముందు కూడా భారత మూలాలున్న పలువురు క్రికెటర్లు న్యూజిలాండ్ జాతీయ జట్టుకు ప్రాతినిధ్యం వహించారు. ఈ జాబితాలో టామ్ పునా మొదటివాడిగా నిలవగా, దీపక్ పటేల్, జీత్ రావల్, ఇష్ సోధి, ఎజాజ్ పటేల్, రచిన్ రవీంద్ర వంటి ఆటగాళ్లు మంచి గుర్తింపు సంపాదించారు. ఇప్పుడు ఆదిత్య అశోక్ కూడా అదే బాటలో ముందుకుసాగేందుకు సిద్ధంగా ఉన్నాడు.
మరిన్ని వార్తలు చదవండి: వీడియో: గాయంతో కూలిపోయిన రిషభ్ పంత్ను పట్టించుకోని గౌతమ్ గంభీర్, శుభ్మన్ గిల్