WPL 2026: Jemimah Rodrigues Becomes Youngest Captain in League History
ఉమెన్స్ ప్రీమియర్ లీగ్ (WPL) చరిత్రలో టీమిండియా మహిళా స్టార్ క్రికెటర్, ఢిల్లీ క్యాపిటల్స్ కెప్టెన్ జెమీమా రోడ్రిగ్స్ అరుదైన ఘనతను తన ఖాతాలో వేసుకుంది. డబ్ల్యూపీఎల్లో అత్యంత పిన్న వయస్కురాలైన కెప్టెన్గా (25 సంవత్సరాలు 127 రోజులు) నిలిచి కొత్త రికార్డు సృష్టించింది.
ఇప్పటివరకు ఈ రికార్డు భారత స్టార్ బ్యాటర్ స్మృతి మందన పేరిట ఉండేది. ఆమె 26 సంవత్సరాలు 230 రోజుల వయసులో రాయల్ ఛాలెంజర్స్ బెంగళూరు (RCB) జట్టుకు నాయకత్వం వహించింది.
డబ్ల్యూపీఎల్ సీజన్–4లో ఢిల్లీ క్యాపిటల్స్ కెప్టెన్గా ఎంపిక కావడం ద్వారా జెమీమా ఆ రికార్డును అధిగమించింది. ఈ సీజన్లో భాగంగా శనివారం (జనవరి 10) నవీ ముంబైలోని డీవై పాటిల్ స్టేడియంలో ముంబై ఇండియన్స్, ఢిల్లీ క్యాపిటల్స్ జట్లు తలపడ్డాయి. ఈ మ్యాచ్లో టాస్ గెలిచిన ఢిల్లీ కెప్టెన్ జెమీమా రోడ్రిగ్స్ ముందుగా బౌలింగ్ చేయాలని నిర్ణయం తీసుకుంది.
జెమీమాకు ప్రమోషన్
2025 వన్డే వరల్డ్ కప్ సెమీఫైనల్లో ఆస్ట్రేలియాపై అజేయ శతకంతో టీమిండియాకు చిరస్మరణీయ విజయాన్ని అందించిన జెమీమా రోడ్రిగ్స్కు ఇప్పుడు డబ్ల్యూపీఎల్లో కూడా పెద్ద బాధ్యత దక్కింది. ఉమెన్స్ ప్రీమియర్ లీగ్ సీజన్–4లో ఢిల్లీ క్యాపిటల్స్ జట్టుకు కెప్టెన్గా ఆమె బాధ్యతలు చేపట్టింది.
ఈ సీజన్లో భారత ఆటగాడినే కెప్టెన్గా నియమించాలనే ఆలోచనతో ఢిల్లీ మేనేజ్మెంట్ ముందుకు వెళ్లింది. ఆ నిర్ణయంలో భాగంగా గత సీజన్లలో జట్టును నడిపించిన మెగ్ లానింగ్ స్థానంలో జెమీమాకు నాయకత్వ పగ్గాలు అప్పగించింది.
యువ వయసులోనే జట్టు బాధ్యతలు చేపట్టి రికార్డు నెలకొల్పిన జెమీమా.. భారత మహిళా క్రికెట్లో తన స్థాయిని మరోసారి చాటుకుంది
మరిన్ని వార్తలు చదవండి: WPL 2026: యాష్లీ గార్డనర్ షో.. యూపీపై గుజరాత్ జెయింట్స్ ఘన విజయం