Yashasvi Jaiswal Becomes 7th Indian to Score Centuries in All Three Formats
టీమిండియా యువ క్రికెటర్ యశస్వీ జైశ్వాల్ అరుదైన ఘనతను సాధించాడు. అంతర్జాతీయ క్రికెట్లో మూడు ఫార్మాట్లైన వన్డే, టీ20, టెస్ట్లలో సెంచరీ చేసిన ఏడవ భారత ఆటగాడిగా తన పేరు నమోదు చేశాడు. శనివారం (డిసెంబర్ 6) విశాఖపట్నంలో జరిగిన మూడో వన్డేలో శతకం సాధించడం ద్వారా జైశ్వాల్ ఈ విశేష రికార్డును అందుకున్నాడు.
దీంతో మూడు ఫార్మాట్లలో శతకాలు చేసిన విరాట్ కోహ్లీ, రోహిత్ శర్మ వంటి లెజెండ్స్ సరసన చేరాడు. అంతేకాదు, కేవలం 23 ఏళ్ల వయస్సులోనే ఈ మైలురాయిని తాకడం ప్రత్యేకతగా నిలిచింది.
సౌతాఫ్రికాతో జరుగుతున్న ఈ నిర్ణయాత్మక మూడో వన్డేలో జైశ్వాల్ అద్భుత ఇన్నింగ్స్ ఆడాడు. తొలి రెండు వన్డేల్లో వరుసగా విఫలమై విమర్శలు ఎదుర్కొన్న అతను, మూడో మ్యాచ్లో మాత్రం క్లాసిక్ సెంచరీతో టీమిండియాకు బలమైన ఆరంభం అందించాడు.
విశాఖపట్నంలోని డా. వైఎస్ఆర్ ACA–VDCA స్టేడియంలో జరిగిన ఈ మ్యాచ్లో కార్బిన్ బాష్ వేసిన బంతిపై 35వ ఓవర్ రెండో బంతికి సింగిల్ తీసుకుంటూ 111 బంతుల్లో శతకాన్ని నమోదు చేశాడు. ఇది అతని వన్డే కెరీర్లో తొలి సెంచరీ.
సిరీస్లో తొలి రెండు మ్యాచ్లలో నిరాశపరిచిన జైశ్వాల్, కీలకమైన మూడో వన్డేలో శతకంతో చెలరేగి భారత విజయంలో ప్రధాన పాత్ర పోషించాడు. ఈ గెలుపుతో భారత్ 2-1 తేడాతో సిరీస్ను కైవసం చేసుకుంది.
సొంతగడ్డపై టెస్ట్ సిరీస్లో ఎదుర్కొన్న ఓటమికి ఇలాంటి ప్రతిస్పందనతో భారత జట్టు సమాధానం ఇచ్చింది. ఇక డిసెంబర్ 9 నుంచి భారత్–దక్షిణాఫ్రికాల మధ్య ఐదు మ్యాచ్ల టీ20 సిరీస్ ప్రారంభం కానుంది.
మూడు ఫార్మాట్లలో సెంచరీలు చేసిన భారత క్రికెటర్లు
సురేష్ రైనా
రోహిత్ శర్మ
కేఎల్ రాహుల్
విరాట్ కోహ్లీ
శుభమన్ గిల్
స్మృతి మంధాన (మహిళా క్రికెటర్)
యశస్వీ జైశ్వాల్
మరిన్ని వార్తలు చదవండి: IND vs SA: రోహిత్ శర్మ 20,000 రన్స్! ఈ ఎలైట్ లిస్ట్లో ఉన్న టాప్-3 ఎవరు?