టీమిండియా టీనేజ్ సెన్సేషన్ వైభవ్ సూర్యవంశీ చరిత్ర సృష్టించాడు. ప్రతిష్టాత్మక దేశవాళీ వన్డే టోర్నీ విజయ్ హజారే ట్రోఫీలో తన తొలి మ్యాచ్లోనే ఈ 14 ఏళ్ల కుర్రాడు సెంచరీతో చెలరేగాడు. ఈ టోర్నీలో బిహార్ తరఫున బరిలోకి దిగిన వైభవ్ సూర్యవంశీ, అరుణాచల్ ప్రదేశ్తో రాంచీ వేదికగా జరుగుతున్న మ్యాచ్లో కేవలం 36 బంతుల్లోనే సెంచరీ పూర్తి చేసి అందరి దృష్టిని ఆకర్షించాడు.
ఈ ఘనతతో విజయ్ హజారే ట్రోఫీలో సెంచరీ సాధించిన అతి పిన్న వయస్కుడిగా వైభవ్ సూర్యవంశీ రికార్డు నెలకొల్పాడు. అంతేకాదు, లిస్ట్ ఏ క్రికెట్ చరిత్రలోనే సెంచరీ చేసిన అతి చిన్న వయసు ఆటగాడిగా కూడా అతడు గుర్తింపు పొందాడు. లిస్ట్ ఏ క్రికెట్లో వేగవంతమైన సెంచరీలు సాధించిన బ్యాటర్ల జాబితాలో వైభవ్ మూడో స్థానంలో నిలవడం విశేషం. అలాగే ఈ ఘనత సాధించిన రెండో భారత బ్యాటర్గా రికార్డు సృష్టించాడు.
ఈ జాబితాలో జేక్ ఫ్రేజర్ మెక్గర్క్ 29 బంతుల్లో సెంచరీ చేసి అగ్రస్థానంలో కొనసాగుతున్నాడు. అతడి తర్వాత ఏబీ డివిలియర్స్ 31 బంతుల్లో, అన్మోల్ ప్రీత్ సింగ్ 35 బంతుల్లో, వైభవ్ సూర్యవంశీ 36 బంతుల్లో, కోరే అండర్సన్ 36 బంతుల్లో, గ్రహమ్ రోజ్ 36 బంతుల్లో సెంచరీలు సాధించారు. అన్మోల్ ప్రీత్ సింగ్ 35 బంతుల్లో సెంచరీ చేసి లిస్ట్ ఏ క్రికెట్లో వేగవంతమైన సెంచరీ సాధించిన తొలి భారత ఆటగాడిగా నిలిచాడు. గతేడాది అరుణాచల్ ప్రదేశ్తో జరిగిన మ్యాచ్లో ఈ ఘనతను అన్మోల్ సాధించడం గమనార్హం.
అండర్ 19 ఆసియా కప్ 2025 ఫైనల్లో నిరాశ ఎదురైనప్పటికీ, ఆ ఓటమిని వైభవ్ సూర్యవంశీ అక్కడితోనే మర్చిపోయాడు. తాజా ఉత్సాహంతో ఈ మ్యాచ్లో బరిలోకి దిగిన అతడు విధ్వంసకర బ్యాటింగ్తో చెలరేగాడు. టాస్ గెలిచి బ్యాటింగ్కు దిగిన బిహార్ జట్టుకు ఓపెనర్లు వైభవ్ సూర్యవంశీ, మంగళ్ మహ్రార్ అద్భుతమైన ఆరంభాన్ని అందించారు. మహ్రార్ 33 పరుగుల వద్ద ఔటైనా, మరోవైపు వైభవ్ మాత్రం శ్రీలంక బౌలర్లపై విరుచుకుపడ్డాడు.
భారీ సిక్సర్లు, అద్భుతమైన షాట్లతో స్టేడియాన్ని ఉర్రూతలూగించిన వైభవ్ సూర్యవంశీ, డబుల్ సెంచరీ దిశగా దూసుకెళ్లుతూ తన ప్రతిభతో మరోసారి క్రికెట్ ప్రపంచాన్ని ఆశ్చర్యపరిచాడు.
మరిన్ని వార్తలు చదవండి: భారత్ పర్యటనలో కివీస్ కొత్త ముఖాలు.. పూర్తి స్క్వాడ్స్ వివరాలు