48 Hours, 36 Wickets! Steve Smith Slams MCG Pitch After Ashes Shock

ఈ మ్యాచ్‌ మొత్తం బౌలర్ల ఆధిపత్యంలోనే సాగింది. బ్యాటర్లకు ఏమాత్రం అవకాశం ఇవ్వని పిచ్‌పై మ్యాచ్ కేవలం రెండు రోజుల్లోనే ముగిసిపోవడం విశేషం. తొలి రోజే ఏకంగా 20 వికెట్లు పడిపోగా, రెండో రోజు మరో 16 వికెట్లు కూలాయి. మొత్తంగా 36 వికెట్లు రెండు రోజుల్లోనే పడిపోవడం క్రికెట్ వర్గాల్లో పెద్ద చర్చకు దారి తీసింది. ఈ పిచ్‌పై ఇప్పటికే అన్ని వైపులా తీవ్ర విమర్శలు వెల్లువెత్తుతున్నాయి.

ఈ పరాజయం అనంతరం స్పందించిన ఆస్ట్రేలియా కెప్టెన్ స్టీవ్ స్మిత్, పరోక్షంగా పిచ్‌నే ఓటమికి కారణంగా పేర్కొన్నాడు. “మ్యాచ్ చాలా వేగంగా ముగిసిపోయింది. మేం తొలి ఇన్నింగ్స్‌లో 50 నుంచి 60 పరుగులు అదనంగా చేసి ఉంటే పరిస్థితి పూర్తిగా మారిపోయేది. అప్పుడు చివరి వరకూ గట్టి పోటీ ఇచ్చే అవకాశం ఉండేది, ఫలితం కూడా మనకు అనుకూలంగా వచ్చేది” అని చెప్పాడు.

అంతేకాదు, “ఈ ఉదయం ఇంగ్లండ్ బౌలర్లు అసాధారణంగా బౌలింగ్ చేశారు. ఆ తర్వాత బ్యాటింగ్‌లో వారు చాలా దూకుడుగా ఆడారు. ఈ పిచ్ పూర్తిగా బౌలర్లకు అనుకూలంగా మారింది. రెండు రోజుల్లోనే 36 వికెట్లు పడటం నిజంగా నిరాశ కలిగించే విషయం” అంటూ స్మిత్ అసంతృప్తి వ్యక్తం చేశాడు.

ఇక మ్యాచ్‌ విషయానికి వస్తే.. ప్రతిష్టాత్మక యాషెస్ సిరీస్‌లో ఇంగ్లండ్ ఎట్టకేలకు గెలుపు రుచి చూసింది. వరుసగా మూడు టెస్టుల్లో ఓడిపోయిన తర్వాత నాలుగో టెస్టులో అద్భుతమైన విజయాన్ని అందుకుంది. మెల్‌బోర్న్ వేదికగా జరిగిన ఈ మ్యాచ్‌లో ఇంగ్లండ్ నాలుగు వికెట్ల తేడాతో ఆస్ట్రేలియాను ఓడించింది. దీంతో 14 ఏళ్ల సుదీర్ఘ నిరీక్షణకు తెరపడుతూ, ఆసీస్ గడ్డపై ఇంగ్లండ్ టెస్టు విజయం సాధించింది.

175 పరుగుల లక్ష్యంతో రెండో ఇన్నింగ్స్‌లో బరిలోకి దిగిన ఇంగ్లండ్, 32.2 ఓవర్లలో ఆరు వికెట్లు కోల్పోయి 178 పరుగులు చేసి విజయాన్ని అందుకుంది. జాకోబ్ బెతెల్ 46 బంతుల్లో ఐదు ఫోర్లతో 40 పరుగులు చేసి కీలక పాత్ర పోషించాడు.

అలాగే బెన్ డకెట్ 26 బంతుల్లో నాలుగు ఫోర్లు, ఒక సిక్సర్‌తో 34 పరుగులు చేయగా, జాక్ క్రాలీ 48 బంతుల్లో మూడు ఫోర్లు, ఒక సిక్సర్‌తో 37 పరుగులు చేశాడు. ఆస్ట్రేలియా బౌలర్లలో మిచెల్ స్టార్క్, జే రిచర్డ్‌సన్‌, స్కాట్ బోలాండ్ తలా రెండు వికెట్లు తీశారు.

అంతకుముందు 4 పరుగులకు వికెట్ నష్టపోకుండా రెండో ఇన్నింగ్స్ ప్రారంభించిన ఆస్ట్రేలియా, 34.3 ఓవర్లలో 132 పరుగులకు ఆలౌటైంది. ట్రావిస్ హెడ్ 67 బంతుల్లో నాలుగు ఫోర్లతో 46 పరుగులు చేయగా, స్టీవ్ స్మిత్ 24 పరుగులతో నాటౌట్‌గా నిలిచాడు. కామెరూన్ గ్రీన్ 19 పరుగులు చేశాడు. మిగతా బ్యాటర్లు సింగిల్ డిజిట్‌కే పరిమితమయ్యారు. ఇందులో ముగ్గురు బ్యాటర్లు ఖాతా తెరవకుండానే పెవిలియన్‌కు చేరారు.

ఇంగ్లండ్ బౌలర్లలో బ్రైడన్ కార్స్ 4/34తో చెలరేగగా, కెప్టెన్ బెన్ స్టోక్స్ 3/24తో కీలక వికెట్లు పడగొట్టాడు. జోష్ టంగ్‌కు రెండు వికెట్లు దక్కగా, గస్ అట్కిన్సన్ ఒక వికెట్ తీసుకున్నాడు.

ఈ మ్యాచ్‌లో టాస్ గెలిచిన ఇంగ్లండ్ ముందుగా బౌలింగ్ ఎంచుకుంది. తొలి ఇన్నింగ్స్‌లో ఆస్ట్రేలియా 45.2 ఓవర్లలో 152 పరుగులకు ఆలౌటైంది. అనంతరం ఇంగ్లండ్ తొలి ఇన్నింగ్స్‌లో 29.5 ఓవర్లలో 110 పరుగులకే కుప్పకూలింది. బౌలర్ల ఆధిపత్యమే ఈ మ్యాచ్ ఫలితాన్ని పూర్తిగా నిర్దేశించింది.

మరిన్ని వార్తలు చదవండి: రెండు రోజుల్లోనే మ్యాచ్ ముగింపు.. బాక్సింగ్ డే టెస్టులో ఆస్ట్రేలియా గడ్డపై ఇంగ్లండ్...