Bangladesh Bans IPL 2026 Broadcast Amid India Tensions
ఐపీఎల్ 2026 సీజన్ మ్యాచ్ల ప్రసారాలపై బంగ్లాదేశ్ సంచలన నిర్ణయం తీసుకుంది. రాబోయే ఐపీఎల్ సీజన్లో జరిగే మ్యాచ్లను బంగ్లాదేశ్లో ప్రసారం చేయబోమని అక్కడి ప్రభుత్వం స్పష్టంగా ప్రకటించింది. ఐపీఎల్ క్రికెట్ను ఎవ్వరూ చూడకుండా చర్యలు తీసుకుంటామని తేల్చిచెప్పింది.
ఈ మేరకు బంగ్లాదేశ్లోని తాత్కాలిక ప్రభుత్వం అక్కడి అన్ని స్పోర్ట్స్ ఛానెల్స్కు అధికారిక ఆదేశాలు జారీ చేసింది. ఐపీఎల్ 2026కు సంబంధించిన మ్యాచ్ల ప్రసారాలు, ప్రమోషన్లు అన్నింటినీ నిలిపివేయాలని ఆదేశించింది.
ఇండియా–బంగ్లాదేశ్ ఉద్రిక్తతల ప్రభావం
ఇండియా, బంగ్లాదేశ్ దేశాల మధ్య ఇటీవల నెలకొన్న రాజకీయ, సామాజిక ఉద్రిక్త పరిస్థితుల నేపథ్యంలో ఈ నిర్ణయం తీసుకున్నట్లు తెలుస్తోంది. ఇదే సమయంలో ఐపీఎల్లో ఆడుతున్న బంగ్లాదేశ్ క్రికెటర్ ముస్తఫిజుర్ రెహ్మాన్పై బీసీసీఐ నిషేధం విధించింది.
కోల్కతా నైట్రైడర్స్ జట్టు ముస్తఫిజుర్ రెహ్మాన్ను ఐపీఎల్ 2026 సీజన్కు 9 కోట్ల రూపాయలకు కొనుగోలు చేసింది. అయితే బంగ్లాదేశ్లో హిందువులపై జరుగుతున్న దాడులు, అల్లరిమూకల హింసాత్మక చర్యల నేపథ్యంలో బీసీసీఐ ఈ నిర్ణయం తీసుకున్నట్లు సమాచారం. ఈ పరిణామాల కారణంగా రెహ్మాన్ను ఐపీఎల్ నుంచి తప్పించాలని బీసీసీఐ ఆదేశాలు జారీ చేసింది.
బంగ్లాదేశ్ కౌంటర్ ఎటాక్
ఈ ఘటనల అనంతరం బంగ్లాదేశ్ కౌంటర్ ఎటాక్కు దిగింది. ఐపీఎల్ మ్యాచ్లను తమ దేశంలో ప్రసారం చేయబోమని ఖరారు చేసింది. ఐపీఎల్ 2026 సీజన్కు సంబంధించిన అన్ని రకాల టీవీ ప్రసారాలు, ప్రకటనలు, ప్రమోషన్లను నిలిపివేసినట్లు అక్కడి ప్రభుత్వం ప్రకటించింది.
మరో అధికారిక ప్రకటన వెలువడే వరకు ఈ నిషేధం కొనసాగుతుందని ప్రభుత్వం జారీ చేసిన జీవోలో స్పష్టం చేసింది.
క్రికెట్ అభిమానులు, ప్రకటనదారుల్లో ఆందోళన
ఐపీఎల్కు బంగ్లాదేశ్లో భారీ మార్కెట్ ఉంది. కోట్ల సంఖ్యలో క్రికెట్ అభిమానులు అక్కడ ఐపీఎల్ను ఆసక్తిగా వీక్షిస్తుంటారు. ఇప్పుడు టీవీల్లో ఐపీఎల్ మ్యాచ్లు ప్రసారం కాకపోతే అభిమానులు ప్రత్యామ్నాయ మార్గాల కోసం వెతకాల్సి వస్తుంది.
ఇక టెలికాస్ట్ ద్వారా వచ్చే ప్రకటనలపై కూడా ఈ నిషేధం ప్రభావం చూపనుంది. బ్రాడ్కాస్టర్లు, స్పాన్సర్లు భారీ ఆదాయం కోల్పోయే అవకాశం ఉంది. ఈ నిర్ణయం భవిష్యత్తులో ఐపీఎల్ గ్లోబల్ వ్యూయర్షిప్పై ఎంత ప్రభావం చూపుతుందో చూడాలి.
మరిన్నివార్తలుచదవండి: విజయ్ హజారే ట్రోఫీలో రుతురాజ్ గైక్వాడ్ సెన్సేషన్ రికార్డు, వేగంగా 100 సిక్సర్లు