విజయ్ హజారే ట్రోఫీలో రుతురాజ్ గైక్వాడ్ సెన్సేషన్ రికార్డు, వేగంగా 100 సిక్సర్లు

టీమిండియా అప్‌కమింగ్ స్టార్‌, మహారాష్ట్ర కెప్టెన్ రుతురాజ్ గైక్వాడ్ మరో అరుదైన ఘనతను తన ఖాతాలో వేసుకున్నాడు. దేశవాళీ వన్డే టోర్నీ విజయ్ హజారే ట్రోఫీ చరిత్రలో అత్యంత వేగంగా 100 సిక్సర్లు పూర్తి చేసిన ఆటగాడిగా రుతురాజ్ రికార్డు నెలకొల్పాడు.

కేవలం 55 ఇన్నింగ్స్‌ల్లోనే 100 సిక్సర్ల మైలురాయిని చేరుకొని క్రికెట్ వర్గాలను ఆశ్చర్యానికి గురిచేశాడు. ఇంతకుముందు ఈ రికార్డు కర్ణాటక బ్యాటర్ మనీశ్ పాండే పేరిట ఉండేది. అయితే మనీశ్‌కు ఈ ఘనత సాధించేందుకు 99 ఇన్నింగ్స్‌లు అవసరమయ్యాయి. రుతురాజ్ దాదాపు సగం ఇన్నింగ్స్‌ల్లోనే ఈ రికార్డును బద్దలు కొట్టాడు.

విజయ్ హజారే ట్రోఫీ చరిత్రలో 100 సిక్సర్ల మార్క్‌ను అందుకున్న రెండో ఆటగాడు కూడా రుతురాజే కావడం విశేషం. ఈ రికార్డు ప్రస్తుత విజయ్ హజారే ట్రోఫీ ఎడిషన్‌లో రుతురాజ్ సాధించినప్పటికీ, ఇది తాజాగా వెలుగులోకి వచ్చింది.

ఈ ఎడిషన్‌లో అద్భుత ఫామ్‌లో ఉన్న రుతురాజ్ గైక్వాడ్ ఒక సెంచరీతో పాటు ఓ అర్ధశతకాన్ని కూడా బాదాడు. లిస్ట్ ఏ క్రికెట్ మొత్తంగా చూసుకుంటే రుతురాజ్‌కు ఘనమైన ట్రాక్ రికార్డు ఉంది. ఇటీవలే దక్షిణాఫ్రికాతో జరిగిన వన్డే మ్యాచ్‌లో టీమిండియా తరఫున అద్భుతమైన శతకం బాదాడు.

అయినప్పటికీ, త్వరలో న్యూజిలాండ్‌తో జరగబోయే వన్డే సిరీస్‌కు అతడికి అవకాశం దక్కలేదు. ఇప్పటికే చాలా కాలం క్రితమే రుతురాజ్ భారత టీ20 జట్టు నుంచి తప్పించబడ్డాడు.

ప్రస్తుతం టీమిండియాలో విపరీతమైన పోటీ ఉండటమే రుతురాజ్‌కు అవకాశాలు రాకపోవడానికి ప్రధాన కారణంగా మారింది. అయితే ఐపీఎల్ 2026లో మాత్రం రుతురాజ్ కీలక పాత్ర పోషించనున్నాడు. చెన్నై సూపర్ కింగ్స్‌కు అతడే నాయకత్వం వహించనున్నాడు.

కొద్ది రోజుల క్రితం వరకు రుతురాజ్ నుంచి సీఎస్‌కే కెప్టెన్సీ కూడా దూరమవుతుందన్న ప్రచారం జరిగింది. కానీ సీఎస్‌కే మేనేజ్‌మెంట్ అతనిపై పూర్తి విశ్వాసం ఉంచి, కెప్టెన్సీ బాధ్యతలను కొనసాగిస్తోంది.

మరిన్నివార్తలుచదవండి: టీ20 వరల్డ్ కప్ 2026: బంగ్లా స్క్వాడ్‌లో ఊహించని మార్పులు..లిటన్ దాస్ కెప్టెన్గా