టీ20 వరల్డ్ కప్ 2026: బంగ్లా స్క్వాడ్‌లో ఊహించని మార్పులు..లిటన్ దాస్ కెప్టెన్గా

ఇండియా–శ్రీలంక సంయుక్తంగా ఆతిథ్యం ఇస్తున్న 2026 టీ20 ప్రపంచకప్‌కు బంగ్లాదేశ్ క్రికెట్ బోర్డు తమ జట్టును అధికారికంగా ప్రకటించింది. ఆదివారం (జనవరి 4) విడుదల చేసిన ఈ స్క్వాడ్‌లో 15 మంది ఆటగాళ్లు చోటు దక్కించుకున్నారు. ఈ జట్టుకు లిటన్ దాస్ నాయకత్వం వహించనుండగా, మహమ్మద్ సైఫ్ హసన్‌ను వైస్ కెప్టెన్‌గా ఎంపిక చేశారు.

ఐపీఎల్‌కు దూరమైన ముస్తాఫిజుర్ రెహమాన్‌కు ప్రపంచకప్ జట్టులో అవకాశం దక్కడం విశేషం. అలాగే కొంతకాలంగా టీ20లకు దూరంగా ఉన్న తస్కిన్ అహ్మద్ కూడా తిరిగి జట్టులోకి వచ్చాడు. అయితే వికెట్ కీపర్ బ్యాటర్ జాకర్ అలీకి స్క్వాడ్‌లో చోటు దక్కకపోవడం ఆశ్చర్యాన్ని కలిగించింది. మరోవైపు, గత సీజన్‌లో బంగ్లాదేశ్ ప్రీమియర్ లీగ్‌లో సెంచరీ సాధించిన మాజీ కెప్టెన్ నజ్ముల్ హొస్సేన్ శాంటోను సెలక్టర్లు పక్కన పెట్టడం చర్చనీయాంశంగా మారింది.

బ్యాటింగ్ విభాగంలో కెప్టెన్ లిటన్ దాస్‌తో పాటు తాంజిద్ హసన్ తమీమ్, మహ్మద్ పర్వేజ్ హొస్సేన్ ఎమోన్, తౌహిద్ హృదయ్, షమీమ్ హొస్సేన్ పట్వారీ, నూరుల్ హసన్ సోహన్ కీలక బాధ్యతలు మోయనున్నారు.

బౌలింగ్ విభాగంలో తంజిమ్ హసన్ సాకిబ్, తస్కిన్ అహ్మద్, మహ్మద్ షైఫుద్దీన్, షోరీఫుల్ ఇస్లాం, ముస్తాఫిజుర్ రెహమాన్ పేస్ దాడిని నడిపించనున్నారు. స్పిన్ విభాగంలో మహేదీ హసన్, రిషద్ హొస్సేన్, నసుమ్ అహ్మద్‌లపై జట్టు ఆశలు పెట్టుకుంది.

ఫిబ్రవరి 7 నుంచి ప్రారంభమయ్యే ఈ టీ20 వరల్డ్ కప్‌లో బంగ్లాదేశ్ తమ తొలి మ్యాచ్‌ను వెస్టిండీస్‌తో ఆడనుంది. టోర్నీ షెడ్యూల్ ప్రకారం బంగ్లాదేశ్ గ్రూప్ సీలో ఉంది. ఈ గ్రూప్‌లో వెస్టిండీస్, ఇంగ్లాండ్, ఇటలీ, నేపాల్ జట్లు ఉన్నాయి. మొత్తం నాలుగు లీగ్ మ్యాచ్‌ల్లో బంగ్లాదేశ్ మూడు మ్యాచ్‌లను కోల్‌కతాలో, ఒక మ్యాచ్‌ను ముంబైలో ఆడాల్సి ఉంది.

ఫిబ్రవరి 7న వెస్టిండీస్‌తో, ఫిబ్రవరి 9న ఇటలీతో, ఫిబ్రవరి 14న ఇంగ్లాండ్‌తో కోల్‌కతాలో మ్యాచ్‌లు జరగనుండగా, ఫిబ్రవరి 17న నేపాల్‌తో ముంబైలో పోరాటం జరగనుంది. అయితే ఈ మ్యాచ్‌లను శ్రీలంకలో నిర్వహించాలని అక్కడి క్రీడా మంత్రిత్వ శాఖతో పాటు బంగ్లాదేశ్ క్రికెట్ అభిమానులు డిమాండ్ చేస్తున్నట్లు సమాచారం. ఈ అంశంపై ఐసీసీతో పాటు బీసీసీఐ ఎలా స్పందిస్తాయన్నది ఇప్పుడు ఆసక్తికరంగా మారింది.

2026 టీ20 ప్రపంచకప్‌కు బంగ్లాదేశ్ జట్టు:

లిటన్ దాస్ (కెప్టెన్), సైఫ్ హసన్ (వైస్ కెప్టెన్), తాంజిద్ హసన్ తమీమ్, మహ్మద్ పర్వేజ్ హొస్సేన్ ఎమోన్, తౌహిద్ హృదయ్, షమీమ్ హొస్సేన్ పట్వారీ, నూరుల్ హసన్ సోహన్, మహేదీ హసన్, రిషద్ హొస్సేన్, నసుమ్ అహ్మద్, ముస్తాఫిజుర్ రెహమాన్, తంజిమ్ హసన్ సాకిబ్, తస్కిన్ అహ్మద్, మహ్మద్ షైఫుద్దీన్, షోరీఫుల్ ఇస్లాం.

మరిన్ని వార్తలు చదవండి: టీ20 వరల్డ్ కప్ 2026 వివాదం: భారత్‌లో ఆడమంటూ బంగ్లాదేశ్ నిరాకరణ? ‘అంత ఈజీ కాదు’ అంటున్న BCCI