BCCI Ban on Mustafizur Rahman Explained: Why He Gets No IPL 2026 Salary
బంగ్లాదేశ్ స్టార్ పేసర్ ముస్తాఫిజుర్ రెహ్మాన్పై భారత క్రికెట్ నియంత్రణ మండలి బీసీసీఐ తీసుకున్న నిర్ణయం ప్రస్తుతం తీవ్ర చర్చనీయాంశంగా మారింది. ఐపీఎల్ 2026 సీజన్లో బంగ్లాదేశ్ ఆటగాళ్లు పాల్గొనకూడదనే డిమాండ్ దేశవ్యాప్తంగా వెల్లువెత్తడంతో బీసీసీఐ ఈ కీలక నిర్ణయం తీసుకుంది. బంగ్లాదేశ్లో హిందువులపై జరుగుతున్న దాడులకు నిరసనగా ప్రజలు, రాజకీయ నాయకులు ఈ అంశాన్ని గట్టిగా ప్రస్తావించడంతో పరిస్థితి మరింత ఉద్రిక్తంగా మారింది.
ప్రజాభిప్రాయానికి తలొగ్గిన బీసీసీఐ తక్షణ చర్యలకు దిగింది. ముస్తాఫిజుర్ రెహ్మాన్ను జట్టు నుంచి తొలగించాలని కోల్కతా నైట్రైడర్స్ ఫ్రాంచైజీకి సూచించింది. దాంతో కేకేఆర్ అతన్ని వెంటనే విడుదల చేసింది. అయితే లీగ్ ప్రారంభానికి ముందే అతన్ని జట్టు నుంచి తప్పించడంతో ముస్తాఫిజుర్కు ఫ్రాంచైజీ నుంచి ఎలాంటి పారితోషికం లభిస్తుందా అనే అంశంపై పెద్ద చర్చ మొదలైంది.
ముస్తాఫిజుర్ స్వచ్ఛందంగా జట్టు నుంచి తప్పుకోలేదు, అలాగే ఎలాంటి నిబంధనలను కూడా ఉల్లంఘించలేదు. అయినప్పటికీ టోర్నీ ప్రారంభానికి ముందే అతన్ని రిలీజ్ చేయడం వల్ల కేకేఆర్ అతనికి ఒక్క రూపాయి కూడా చెల్లించాల్సిన అవసరం లేదని స్పష్టమైంది. ఐపీఎల్ నిబంధనల ప్రకారం ఆటగాడు లీగ్ మొదలుకాకముందే జట్టు నుంచి తప్పుకుంటే లేదా తప్పించబడితే ఫ్రాంచైజీపై ఎలాంటి ఆర్థిక బాధ్యత ఉండదు.
ఐపీఎల్ 2026 మినీ వేలంలో ముస్తాఫిజుర్ రెహ్మాన్ను కేకేఆర్ రూ.9.20 కోట్ల భారీ మొత్తానికి కొనుగోలు చేసింది. చెన్నై సూపర్ కింగ్స్తో పోటీ పడి మరీ అతన్ని దక్కించుకోవడంతో, వేలంలో అత్యధిక ధర పలికిన బంగ్లాదేశ్ ఆటగాడిగా ముస్తాఫిజుర్ నిలిచాడు. అయితే బంగ్లాదేశ్లో నెలకొన్న రాజకీయ, సామాజిక పరిస్థితుల కారణంగా అతను ఐపీఎల్కు దూరం కావాల్సి వచ్చింది.
సాధారణంగా ఐపీఎల్ ఆటగాళ్లకు ఫ్రాంచైజీలు బీమా కల్పిస్తాయి. లీగ్ మధ్యలో గాయపడి ఆటకు దూరమైతే బీమా ద్వారా సగం వరకు పారితోషికం లభించే అవకాశం ఉంటుంది. బీసీసీఐ సెంట్రల్ కాంట్రాక్ట్లో ఉన్న భారత ఆటగాళ్లకు బోర్డు స్వయంగా ఈ బాధ్యతను తీసుకుంటుంది. కానీ ముస్తాఫిజుర్ విషయంలో టోర్నీ ప్రారంభానికి ముందే అతను జట్టు నుంచి తప్పించబడటంతో బీమా పరిధి కూడా వర్తించదు. అందువల్ల అతనికి ఒక్క రూపాయి కూడా వచ్చే అవకాశమే లేదు. చట్టపరంగా పోరాటం చేసే అవకాశం ఉన్నప్పటికీ, అది అంతర్జాతీయ న్యాయస్థానాల వరకు వెళ్లాల్సిన పరిస్థితి ఉంటుంది.
ముస్తాఫిజుర్ రెహ్మాన్పై వేటు వేయడాన్ని బంగ్లాదేశ్ ప్రభుత్వం తీవ్రంగా పరిగణించింది. ప్రతిగా తమ దేశంలో ఐపీఎల్ ప్రసారాలను నిలిపివేయాలని అక్కడి ప్రభుత్వానికి ఆదేశాలు జారీ చేసినట్లు సమాచారం. మరోవైపు, ఐసీసీ టీ20 ప్రపంచకప్ 2026లో భాగంగా బంగ్లాదేశ్ ఆడాల్సిన మ్యాచ్లను శ్రీలంకకు తరలించాలని బంగ్లాదేశ్ క్రికెట్ బోర్డు ఐసీసీని కోరినట్లు తెలుస్తోంది. ఈ పరిణామాలు అంతర్జాతీయ క్రికెట్లో కొత్త ఉద్రిక్తతలకు దారి తీసే అవకాశం ఉందని విశ్లేషకులు అభిప్రాయపడుతున్నారు.
మరిన్నివార్తలుచదవండి: అంబటి రాయుడు మరోసారి తండ్రి... మగ బిడ్డతో కుటుంబంలో ఆనందం