Donovan Ferreira Injury Puts South Africa’s T20 World Cup 2026 Plans in Trouble
టీ20 ప్రపంచకప్–2026కు ముందు దక్షిణాఫ్రికా జట్టుకు గట్టి ఎదురుదెబ్బ తగిలింది. ఆ జట్టు విధ్వంసకర ఆల్రౌండర్ డోనోవన్ ఫెరీరా భుజం గాయంతో ఈ మెగా టోర్నీకి దూరమయ్యే ప్రమాదం కనిపిస్తోంది. ప్రస్తుతం సౌతాఫ్రికా టీ20 లీగ్లో జోబర్గ్ సూపర్ కింగ్స్కు నాయకత్వం వహిస్తున్న ఫెరీరా, శనివారం ప్రిటోరియా క్యాపిటల్స్తో జరిగిన మ్యాచ్లో ఈ గాయానికి గురయ్యాడు.
ప్రిటోరియా ఇన్నింగ్స్ చివరి ఓవర్లో బౌండరీ లైన్ వద్ద బంతిని ఆపే ప్రయత్నంలో ఫెరీరా ఎడమ భుజం బలంగా నేలను తాకింది. దీంతో అతడు తీవ్రమైన నొప్పితో విలవిల్లాడాడు. అయినప్పటికీ జట్టు కష్టాల్లో పడటంతో తప్పనిసరి పరిస్థితుల్లో బ్యాటింగ్కు దిగాడు. కానీ ఒక్క బంతినే ఎదుర్కొన్న ఫెరీరా, ఆ తర్వాత రిటైర్డ్ హర్ట్గా వెనుదిరిగాడు.
మ్యాచ్ అనంతరం ఫెరీరాను స్కానింగ్కు తరలించగా, భుజానికి ఫ్రాక్చర్ అయినట్లు వైద్యులు నిర్ధారించారు. ఈ కారణంగా అతడు ప్రస్తుత టోర్నీ నుంచి వైదొలిగినట్లు సమాచారం. ఫెరీరా పూర్తిగా కోలుకోవడానికి సుమారు ఐదు వారాల సమయం పట్టే అవకాశముందని తెలుస్తోంది. ఈ నేపథ్యంలో అతడు టీ20 ప్రపంచకప్–2026 నుంచి తప్పుకునే అవకాశాలు ఎక్కువగా కనిపిస్తున్నాయి.
ఒకవేళ ఫెరీరా నిజంగానే ప్రపంచకప్కు దూరమైతే, అది దక్షిణాఫ్రికాకు పెద్ద దెబ్బేనని చెప్పాలి. ప్రస్తుతం అతడు అద్భుతమైన ఫామ్లో కొనసాగుతున్నాడు. దక్షిణాఫ్రికా జట్టులో డేవిడ్ మిల్లర్ తర్వాత ప్రధాన ఫినిషర్గా ఫెరీరా కీలక పాత్ర పోషిస్తున్నాడు. 2024 నుంచి టీ20ల్లో అత్యధిక స్ట్రైక్రేట్ కలిగిన బ్యాటర్లలో అతడు అగ్రస్థానంలో కొనసాగుతున్నాడు.
మొత్తం 86 టీ20 ఇన్నింగ్స్ల్లో 177.08 స్ట్రైక్రేట్తో 1716 పరుగులు సాధించాడు. గత నెల భారత్తో జరిగిన టీ20 సిరీస్లో కూడా డోనోవన్ ఫెరీరా తన విధ్వంసకర బ్యాటింగ్తో అభిమానులను అలరించాడు. అంతేకాదు, అవసరమైతే ఆఫ్ స్పిన్ బౌలింగ్ చేయగల సామర్థ్యం కూడా అతడికి ఉంది. ఒకవేళ ఫెరీరా దూరమైతే, అతడి స్థానంలో ర్యాన్ రికెల్టన్ లేదా ట్రిస్టన్ స్టబ్స్ను జట్టులోకి తీసుకునే అవకాశం ఉంది.
టీ20 ప్రపంచకప్–2026 కోసం దక్షిణాఫ్రికా సంభావ్య జట్టు:
ఐడెన్ మార్క్రమ్ (కెప్టెన్), కోర్బిన్ బాష్, డేవాల్డ్ బ్రెవిస్, క్వింటన్ డి కాక్ (వికెట్కీపర్), టోనీ డి జోర్జి, డోనోవన్ ఫెరీరా, మార్కో జాన్సెన్, జార్జ్ లిండే, కేశవ్ మహరాజ్, క్వేనా మఫాకా, డేవిడ్ మిల్లర్, లుంగీ ఎన్గిడి, అన్రిచ్ నోర్జే, కాగిసో రబాడ, జేసన్ స్మిత్.
మరిన్ని వార్తలు చదవండి: టీ20 ప్రపంచకప్ 2026: భారత్కు బంగ్లాదేశ్ రాదా? జనవరి 21న కీలక నిర్ణయం