Mohammed Shami Shines in Syed Mushtaq Ali Trophy, Bengal Clinch Big Win
దేశవాళీ క్రికెట్లో టీమిండియా సీనియర్ పేసర్ మహ్మద్ షమీ తన అద్భుత ఫామ్ను కొనసాగిస్తున్నాడు. మరోసారి తన ఘాటైన బౌలింగ్తో సెలక్టర్లకు బలమైన సందేశం పంపించాడు. సయ్యద్ ముస్తాక్ అలీ టీ20 టోర్నీలో బెంగాల్ తరపున ఆడుతున్న షమీ, గురువారం సర్వీసెస్తో జరిగిన మ్యాచ్లో అదిరిపోయే ప్రదర్శన చేశాడు.
సీమ్ బౌలింగ్ను ఇష్టం వచ్చినట్టు వినియోగించిన షమీ, ప్రత్యర్థి బ్యాటర్లను తీవ్ర ఇబ్బందుల్లో పడేశాడు. తన నాలుగు ఓవర్లలో కేవలం 13 పరుగులు ఇచ్చి 4 వికెట్లు పడగొట్టాడు. అతడి అద్భుత బౌలింగ్ వల్ల సర్వీసెస్పై బెంగాల్ 7 వికెట్ల తేడాతో ఘన విజయం సాధించింది.
ఈ మ్యాచ్లో సర్వీసెస్ మొదట బ్యాటింగ్ చేసి 18.2 ఓవర్లలో 165 పరుగులు చేసి ఆలౌటైంది. కెప్టెన్ మోహిత్ అహ్లావాట్ (38) టాప్ స్కోరర్గా నిలవగా, నకుల్ శర్మ (32), వినీత్ (32) ఉపయోగకరమైన ఇన్నింగ్స్ ఆడారు. బెంగాల్ బౌలర్లలో షమీతో పాటు ఆకాష్ దీప్ 3 వికెట్లు, ఆఫ్ స్పిన్నర్ వ్రిత్తిక్ ఛటర్జీ 2 వికెట్లు తీశారు.
అభిషేక్ – అభిమన్యు మెరుపులు
చేదించాల్సిన 166 పరుగుల లక్ష్యాన్ని బెంగాల్ కేవలం 15.1 ఓవర్లలో 3 వికెట్లు కోల్పోయి ఛేదించింది. అభిషేక్ పోరెల్ (56), అభిమన్యు ఈశ్వరన్ (58) హాఫ్ సెంచరీలతో దూసుకెళ్లారు. ఈ విజయంతో బెంగాల్ టోర్నీలో నాలుగో విజయం సాధిస్తూ 16 పాయింట్లతో పట్టికలో అగ్రస్థానంలో నిలిచింది.
సెలక్టర్లపై విమర్శల వెల్లువ
దేశవాళీ క్రికెట్లో అప్రతిహత ఫామ్లో ఉన్న షమీని జాతీయ జట్టులో పక్కన పెట్టడం నెటిజన్లను తీవ్రంగా ఆగ్రహానికి గురిచేస్తోంది. వరల్డ్ క్లాస్ బౌలర్ను ఎలా నిర్లక్ష్యం చేస్తారని సెలక్టర్లపై విమర్శలు వెల్లువెత్తుతున్నాయి. అనేక మాజీ భారత క్రికెటర్లు కూడా షమీని దూరం పెట్టడాన్ని ప్రశ్నిస్తున్నారు.
సౌతాఫ్రికాతో జరిగిన రెండో వన్డేలో భారత బౌలింగ్ దళం అనుభవలేమితో ఇబ్బంది పడింది. ఈ నేపథ్యంలోనే అనుభవజ్ఞుడైన షమీని ఎందుకు జట్టులోకి తీసుకోలేదని మాజీ ఆఫ్ స్పిన్నర్ హర్భజన్ సింగ్ మండిపడ్డాడు. షమీ చివరిసారిగా ఛాంపియన్స్ ట్రోఫీ–2025లో భారత్ తరపున ఆడాడు.
అప్పటి నుంచి ఫిట్నెస్ సమస్యల పేరుతో అతడిని జట్టులోకి ఎంపిక చేయడం లేదు. అయినప్పటికీ షమీ నిరంతరం దేశవాళీ క్రికెట్లో ఆడుతూ ఫామ్ను కాపాడుతున్నాడు. తాజాగా సౌతాఫ్రికా టీ20 సిరీస్కు ప్రకటించిన జట్టులో కూడా షమీకి స్థానం దక్కకపోవడం చర్చనీయాంశమైంది.
మరిన్ని వార్తలు చదవండి: సంజూ శాంసన్ దూకుడు: సయ్యద్ ముస్తాక్ అలీ టోర్నీలో వరుస మెరుపులు – సౌతాఫ్రికా సిరీస్కు సిద్ధం!