Syed Mushtaq Ali Trophy 2025: Ishan Kishan’s Century Powers Jharkhand to Title

సయ్యద్ ముస్తాక్ అలీ ట్రోఫీని జార్ఖండ్ జట్టు ఘనంగా గెలుచుకుంది. ఫైనల్లో హర్యానాపై అద్భుత విజయం సాధించి టైటిల్‌ను తమ ఖాతాలో వేసుకుంది. గురువారం (డిసెంబర్ 18) పుణేలోని మహారాష్ట్ర క్రికెట్ అసోసియేషన్ స్టేడియంలో జరిగిన తుది పోరులో జార్ఖండ్ 69 పరుగుల తేడాతో హర్యానాను చిత్తు చేసింది.

ఈ మ్యాచ్‌లో కెప్టెన్ ఇషాన్ కిషాన్ అద్భుత సెంచరీతో చెలరేగగా, కుమార్ కుశాగ్ర మెరుపు ఇన్నింగ్స్ ఆడి జట్టుకు భారీ స్కోర్ అందించాడు. అనంతరం బౌలర్లు సమిష్టిగా రాణించి హర్యానా బ్యాటింగ్‌ను పూర్తిగా కట్టడి చేశారు. ముందుగా బ్యాటింగ్ చేసిన జార్ఖండ్ నిర్ణీత 20 ఓవర్లలో 3 వికెట్ల నష్టానికి 262 పరుగుల భారీ స్కోర్ సాధించింది. అనంతరం లక్ష్య ఛేదనలో హర్యానా 18.3 ఓవర్లలో 193 పరుగులకే ఆలౌటైంది.

భారీ లక్ష్యంలో తడబడిన హర్యానా

263 పరుగుల కఠినమైన లక్ష్యంతో బరిలోకి దిగిన హర్యానా జట్టుకు ఆరంభంలోనే గట్టి షాక్ తగిలింది. కెప్టెన్ అంకిత్ కుమార్, ఆశిష్ సివాచ్ ఇద్దరూ డకౌట్‌గా వెనుదిరగడంతో ఒక పరుగు వద్దే రెండు వికెట్లు కోల్పోయింది. కొద్దిసేపటికే అర్ష్ రంగ (17) కూడా ఔట్ కావడంతో 36 పరుగులకే మూడో వికెట్ పడిపోయి జట్టు ఒత్తిడిలోకి వెళ్లింది.

ఈ దశలో వికెట్ కీపర్ యశ్వర్ధన్ దలాల్ (53), నిశాంత్ సింధు (31) కలిసి ఇన్నింగ్స్‌ను నిలబెట్టే ప్రయత్నం చేశారు. వీరిద్దరూ కొంతసేపు ధైర్యంగా ఆడుతూ విలువైన భాగస్వామ్యాన్ని నెలకొల్పారు. అయితే నిశాంత్ సింధు వికెట్ పడిన తర్వాత హర్యానా ఆశలు పూర్తిగా చల్లారాయి. చివర్లో సమంత్ జఖర్ వేగంగా ఆడినా, లక్ష్యం భారీగా ఉండటంతో ఓటమి తప్పలేదు.

బ్యాటింగ్‌లో జార్ఖండ్ విధ్వంసం

జార్ఖండ్ ఇన్నింగ్స్‌లో కెప్టెన్ ఇషాన్ కిషాన్ అద్భుతంగా చెలరేగి సెంచరీ సాధించాడు. అతనికి తోడుగా కుమార్ కుశాగ్ర 38 బంతుల్లో 81 పరుగులు (8 ఫోర్లు, 5 సిక్సర్లు) చేసి హర్యానా బౌలర్లపై ఎదురుదాడి చేశాడు. ఆరంభంలో విరాట్ సింగ్ వికెట్ కోల్పోయినప్పటికీ, కిషాన్–కుశాగ్ర జోడీ రెండో వికెట్‌కు కేవలం 82 బంతుల్లోనే 177 పరుగులు జోడించి మ్యాచ్‌ను పూర్తిగా జార్ఖండ్ వైపు తిప్పింది.

ఈ భారీ భాగస్వామ్యం తర్వాత ఇద్దరూ స్వల్ప వ్యవధిలో ఔట్ అయినప్పటికీ, చివర్లో రాబిన్ మింజ్ (31), అనుకుల్ రాయ్ (40) వేగంగా పరుగులు చేసి స్కోర్‌ను మరింత పెంచారు. ఫలితంగా జార్ఖండ్ 20 ఓవర్లలో 3 వికెట్ల నష్టానికి 262 పరుగులు చేసి ఫైనల్‌లో అదిరిపోయే విజయం సాధించింది.

మరిన్ని వార్తలు చదవండి: IPL 2026: పంజాబ్ కింగ్స్ పూర్తి జట్టు విడుదల.. ఈసారి కప్ పంజాబ్‌కేనా?