West Indies Start T20 World Cup 2026 in Style as Romario Shepherd’s Hat-Trick Sinks Scotland

టీ20 ప్రపంచకప్ 2026 టోర్నమెంట్‌లో మాజీ చాంపియన్ వెస్టిండీస్ జట్టు శుభారంభం చేసింది. పసికూన స్కాట్లాండ్‌ను చిత్తు చేసి 35 పరుగుల తేడాతో ఘన విజయం సాధించింది. కోల్‌కతా వేదికగా గ్రూప్ సి నుంచి శనివారం జరిగిన ఈ మ్యాచ్‌లో విండీస్ అన్ని విభాగాల్లోనూ ఆధిపత్యం ప్రదర్శించింది.

ఈడెన్ గార్డెన్స్‌లో టాస్ గెలిచిన స్కాట్లాండ్ తొలుత బౌలింగ్ ఎంచుకోగా, వెస్టిండీస్ బ్యాటింగ్‌కు దిగింది. ఓపెనర్లలో బ్రాండన్ కింగ్ 35 పరుగులతో ఆకట్టుకోగా, కెప్టెన్ షాయీ హోప్ 19 పరుగులతో పర్వాలేదనిపించాడు. అయితే వన్‌డౌన్‌లో వచ్చిన షిమ్రన్ హెట్‌మేయర్ మ్యాచ్ దిశనే మార్చేశాడు.

హెట్‌మేయర్ కేవలం 36 బంతుల్లో రెండు ఫోర్లు, ఆరు సిక్సర్ల సహాయంతో 64 పరుగులు సాధించి స్కాట్లాండ్ బౌలర్లపై విరుచుకుపడ్డాడు. అతడికి తోడుగా రోవ్‌మన్ పావెల్ 14 బంతుల్లో 24 పరుగులు, షెర్ఫానే రూథర్‌ఫర్డ్ 13 బంతుల్లో 26 పరుగులు చేసి వేగం పెంచారు. ఫలితంగా నిర్ణీత 20 ఓవర్లలో ఐదు వికెట్ల నష్టానికి వెస్టిండీస్ 182 పరుగుల భారీ స్కోరు నమోదు చేసింది.

స్కాట్లాండ్ బౌలర్లలో బ్రాడ్ క్యూరీ రెండు వికెట్లు తీయగా, సఫ్యాన్ షరీఫ్, ఒలీవర్ డేవిడ్‌సన్, మైకేల్ లీస్క్ తలా ఒక వికెట్ సాధించారు.

లక్ష్య ఛేదనలో స్కాట్లాండ్ మొదటి నుంచే ఒత్తిడిలో పడింది. టాప్ ఆర్డర్‌లో జార్జ్ మున్సీ 19, బ్రాండన్ మెక్‌ముల్లన్ 14 పరుగులకే పరిమితమవగా, మైకేల్ జోన్స్ ఒక్క పరుగు చేసి ఔటయ్యాడు.

ఈ దశలో కెప్టెన్ రిచీ బెరింగ్‌టన్ 24 బంతుల్లో 42 పరుగులతో బాధ్యతాయుత ఇన్నింగ్స్ ఆడగా, టామ్ బ్రూస్ 28 బంతుల్లో 35 పరుగులతో అతడికి సహకరించాడు. కానీ మిగతా బ్యాటర్లు నిలబడలేకపోయారు. మాథ్యూ క్రాస్ 11, మార్క్ వాట్ 15 పరుగులు మాత్రమే చేయగలిగారు. చివరకు 18.5 ఓవర్లలో స్కాట్లాండ్ 147 పరుగులకే ఆలౌట్ అయింది.

వెస్టిండీస్ బౌలింగ్‌లో జేసన్ హోల్డర్ మూడు వికెట్లు తీయగా, రొమారియో షెఫర్డ్ హ్యాట్రిక్‌తో పాటు మొత్తం ఐదు వికెట్లు పడగొట్టి స్కాట్లాండ్ బ్యాటింగ్ లైనప్‌ను పూర్తిగా కూల్చేశాడు. షమర్ జోసెఫ్, గుడకేశ్ మోటీ తలా ఒక వికెట్ తీసి తమ వంతు పాత్ర పోషించారు.

మరిన్నివార్తలుచదవండి: టీ20 ప్రపంచకప్ 2026 ప్రారంభ మ్యాచ్‌లో నెదర్లాండ్స్‌పై పాకిస్తాన్ ఉత్కంఠ విజయం