ఐపీఎల్ కోసం ద్వైపాక్షిక సిరీస్‌లకు కోత? బీసీసీఐ కీలక ఆలోచన

భారత క్రికెట్ నియంత్రణ మండలి (బీసీసీఐ) ఇండియన్ ప్రీమియర్ లీగ్ (ఐపీఎల్)ను మరింత విస్తరించే దిశగా కీలక ఆలోచనలు చేస్తోంది. ఇప్పటికే 74 మ్యాచ్‌లతో నిర్వహిస్తున్న ఈ ప్రతిష్టాత్మక టోర్నమెంట్‌ను భవిష్యత్తులో 94 మ్యాచ్‌ల భారీ పోటీగా మార్చాలని బోర్డు లక్ష్యంగా పెట్టుకుంది. ఇందుకోసం అంతర్జాతీయ ద్వైపాక్షిక సిరీస్‌ల సంఖ్యను తగ్గించే అవకాశాలను కూడా పరిశీలిస్తున్నట్లు సమాచారం.

ప్రస్తుతం ఐపీఎల్‌లో 10 ఫ్రాంచైజీలు ఉన్నప్పటికీ ప్రతి జట్టు మిగతా జట్లతో స్వదేశం, ప్రత్యర్థి వేదికల్లో రెండేసి మ్యాచ్‌లు ఆడడం లేదు. పూర్తి హోమ్-అవే విధానాన్ని అమలు చేయాలంటే మరో 20 మ్యాచ్‌లు అవసరం. దీంతో మొత్తం మ్యాచ్‌ల సంఖ్య 74 నుంచి 94కు పెరుగుతుంది. ఐపీఎల్ చైర్మన్ అరుణ్ ధుమాల్ ఇప్పటికే ఈ విస్తరణపై బీసీసీఐ ఆసక్తిగా ఉందని, అది కేవలం సమయ సమస్య మాత్రమేనని పేర్కొన్నారు.

ఐపీఎల్ విస్తరణకు బీసీసీఐ కొత్త వ్యూహం

అయితే ఈ ప్రణాళికకు ప్రధాన అడ్డంకి అంతర్జాతీయ క్రికెట్ షెడ్యూల్. అంతర్జాతీయ క్రికెట్ మండలి (ఐసీసీ) టోర్నమెంట్‌లు, దేశాల మధ్య ద్వైపాక్షిక సిరీస్‌లు, ప్రపంచవ్యాప్తంగా పెరుగుతున్న ఫ్రాంచైజీ లీగ్‌లు షెడ్యూల్‌ను మరింత క్లిష్టంగా మార్చాయి. అయినప్పటికీ ఐపీఎల్ విస్తరణకు మార్గం కనుగొనేందుకు బీసీసీఐ కట్టుబడి ఉన్నట్లు తెలుస్తోంది.

పిటిఐ నివేదిక ప్రకారం, ఐపీఎల్‌ను మార్చి చివరి వారంలో కాకుండా మార్చి తొలి వారంలో ప్రారంభించడం ఒక సాధ్యమైన పరిష్కారంగా బోర్డు భావిస్తోంది. ఇలా ముందుగానే టోర్నమెంట్‌ను ప్రారంభిస్తే అదనపు మ్యాచ్‌లకు సమయం లభిస్తుందని, అలాగే వర్షాకాలం ప్రారంభమయ్యేలోపు పోటీని ముగించవచ్చని అధికారులు అంచనా వేస్తున్నారు.

ప్రస్తుత సమయ వ్యవధిలో 94 మ్యాచ్‌లు నిర్వహించడం కష్టమని, వర్షాకాలం కారణంగా మే తర్వాత పోటీ కొనసాగించడం సాధ్యం కాదని బీసీసీఐ వర్గాలు పేర్కొన్నాయి. అందుకే మార్చి తొలి వారంలో ప్రారంభించి మే 15 నాటికి ముగించే విధానాన్ని ఉత్తమ ఎంపికగా పరిశీలిస్తున్నట్లు సమాచారం. ఈ విస్తరించిన ఫార్మాట్‌ను 2028 సీజన్ నుంచి అమలు చేసే అవకాశాలు ఉన్నప్పటికీ తుది నిర్ణయం ఇంకా తీసుకోలేదు.

కేన్ విలియమ్సన్ రిటైర్మెంట్.. 16 ఏళ్ల అద్భుత అంతర్జాతీయ ప్రయాణానికి ముగింపు

ఐపీఎల్ విస్తరణ వల్ల అత్యంత ప్రభావితమయ్యే అంశం ద్వైపాక్షిక క్రికెట్. కొన్ని ద్వైపాక్షిక సిరీస్‌లపై ప్రేక్షకుల ఆసక్తి తగ్గుతోందని, ఫ్రాంచైజీ క్రికెట్‌కు ఆదరణ పెరుగుతోందని బీసీసీఐ భావిస్తోంది. ప్రస్తుతం అనేక దేశాలు తమ సొంత టీ20 లీగ్‌లను నిర్వహిస్తున్నందున, ఆదాయం కోసం భారత జట్టు పర్యటనలపై పూర్తిగా ఆధారపడాల్సిన పరిస్థితి కూడా తగ్గింది.

అంతేకాకుండా ప్రతి ఏడాది కనీసం ఒక ప్రధాన ఐసీసీ టోర్నమెంట్ జరుగుతోంది. ఆసియా కప్ వంటి ప్రాంతీయ పోటీలు కూడా షెడ్యూల్‌పై అదనపు ఒత్తిడిని పెంచుతున్నాయి. ఈ నేపథ్యంలో ఐపీఎల్‌ను 94 మ్యాచ్‌ల టోర్నమెంట్‌గా మార్చాలంటే క్రికెట్ క్యాలెండర్‌లో ఇతర విభాగాల్లో మార్పులు తప్పవని విశ్లేషకులు భావిస్తున్నారు.

బెన్ స్టోక్స్‌కు భారీ షాక్.. ఇంగ్లండ్ టెస్టు కెప్టెన్సీపై అనిశ్చితి

ప్రపంచంలోనే అత్యంత విలువైన క్రికెట్ లీగ్‌గా ఎదిగిన ఐపీఎల్ విషయంలో బీసీసీఐ రాజీ పడే అవకాశాలు చాలా తక్కువగా కనిపిస్తున్నాయి. ఇప్పటికే పలువురు ఐపీఎల్ ఫ్రాంచైజీలు విదేశీ టీ20 లీగ్‌లలో జట్లను కొనుగోలు చేశాయి. ఫుట్‌బాల్ తరహాలో ఫ్రాంచైజీ ఆధారిత వ్యవస్థ వైపు క్రికెట్ క్రమంగా అడుగులు వేస్తోందని ఈ పరిణామాలు సూచిస్తున్నాయి. బీసీసీఐ తాజా ఆలోచనలు కూడా భవిష్యత్తులో ఫ్రాంచైజీ క్రికెట్ మరింత కీలక పాత్ర పోషించబోతోందనే సంకేతాలు ఇస్తున్నాయి.