ధోనీ భవిష్యత్తుపై సీఎస్‌కే సీఈఓ కీలక వ్యాఖ్యలు.. అభిమానుల్లో మళ్లీ ఆశలు

ఐపీఎల్ 2026 సీజన్‌ను చెన్నై సూపర్ కింగ్స్ తీవ్ర నిరాశతో ప్రారంభించినా, తర్వాత వరుస విజయాలతో జట్టును మళ్లీ పోటీలో నిలబెట్టింది. అయితే మొత్తం సీజన్‌లో ఒక పెద్ద లోటు మాత్రం అభిమానులను వెంటాడింది. అదే లెజెండరీ కెప్టెన్ ఎంఎస్ ధోని గైర్హాజరీ. ఫ్రాంచైజీ చరిత్రలో తొలిసారి ధోనీ లేకుండానే సీఎస్‌కే పూర్తి ఐపీఎల్ సీజన్ ఆడింది.

కాల్ఫ్ మరియు వేలి గాయాలతో పాటు ఫిట్‌నెస్ సమస్యలు కొనసాగడంతో ధోనీ ఈ టోర్నమెంట్‌కు పూర్తిగా దూరమయ్యాడు. సీజన్ మొత్తం అభిమానులు అతడి రీఎంట్రీ కోసం ఎదురుచూశారు. మధ్య మధ్యలో ఫిట్‌నెస్ అప్‌డేట్స్ వచ్చినప్పటికీ, ధోనీ ఒక్క మ్యాచ్‌లో కూడా బరిలోకి దిగలేదు. దీంతో సీఎస్‌కే అభిమానులు తీవ్ర నిరాశకు గురయ్యారు.

ధోనీ భవిష్యత్తుపై సీఎస్‌కే శిబిరం నుంచి కూడా పలు కీలక వ్యాఖ్యలు వినిపించాయి. హెడ్ కోచ్స్టీఫెన్ ఫ్లెమింగ్ తో పాటు సపోర్ట్ స్టాఫ్ సభ్యులు కూడా ధోనీ భవిష్యత్ నిర్ణయం పూర్తిగా అతడిదేనని స్పష్టం చేశారు. కొనసాగాలా? రిటైర్మెంట్ ప్రకటించాలా? అనే విషయంలో ఫ్రాంచైజీ ఎలాంటి ఒత్తిడి చేయదని వెల్లడించారు.

ధోనీ లేక సీఎస్‌కేలో నాయకత్వంపై ప్రశ్నలు

ధోనీ లేకపోవడంతో కెప్టెన్ రుతురాజ్ గైక్వాడ్ పై కూడా విమర్శలు పెరిగాయి. యువ కెప్టెన్ కొన్ని మ్యాచ్‌ల్లో మంచి నాయకత్వం చూపించినా, జట్టులో ధోనీ తరహా ప్రశాంతత, వ్యూహాత్మక నిర్ణయాలు కనిపించలేదని అభిమానులు భావించారు. దీంతో ధోనీ మళ్లీ జట్టుతో ఏదో ఒక పాత్రలో కొనసాగాలనే చర్చలు మళ్లీ తెరపైకి వచ్చాయి.

రేవ్‌స్పోర్ట్జ్‌కు ఇచ్చిన ఇంటర్వ్యూలో సీఎస్‌కే సీఈఓ కాశీ విశ్వనాథన్ కీలక వ్యాఖ్యలు చేశారు. ధోనీ భవిష్యత్తుపై ఇప్పటివరకు ఎలాంటి అధికారిక చర్చ జరగలేదని చెప్పారు. అయితే ప్లేయర్‌గా, మెంటర్‌గా, కోచ్‌గా లేదా అతడు కోరుకున్న ఏ పాత్రలోనైనా ధోనీ సీఎస్‌కేతో శాశ్వతంగా కొనసాగాలని ఫ్రాంచైజీ కోరుకుంటోందని వెల్లడించారు. “ధోనీ తన నిర్ణయాలు తానే తీసుకుంటాడు. మేము అతడి నిర్ణయాన్ని గౌరవిస్తాం. అతడు ఏ పాత్రలో ఉండాలనుకున్నా సీఎస్‌కేతో కొనసాగాలని మేము కోరుకుంటాం” అని కాశీ విశ్వనాథన్ పేర్కొన్నారు.

ఐపీఎల్ చరిత్రలో సీఎస్‌కేకు ధోనీ చేసిన సేవలు అపారమైనవి. అతడి నాయకత్వంలో జట్టు ఐదు ఐపీఎల్ టైటిల్స్ గెలిచింది. సీఎస్‌కేను లీగ్‌లో అత్యంత విజయవంతమైన జట్లలో ఒకటిగా నిలబెట్టింది. ధోనీ మొత్తం 244 మ్యాచ్‌ల్లో కెప్టెన్‌గా వ్యవహరించి 145 విజయాలు అందించాడు. మరోవైపు రుతురాజ్ గైక్వాడ్ నాయకత్వంలో జట్టు 33 మ్యాచ్‌ల్లో 14 విజయాలు సాధించింది. ప్లేయర్‌గా తిరిగి వచ్చినా రాకపోయినా, “యెల్లో ఆర్మీ”పై ధోనీ ప్రభావం మాత్రం ఇంకా ఎన్నో సంవత్సరాలు కొనసాగనుంది.