ఆర్సీబీపై తిరిగి గెలుస్తుందా సీఎస్‌కే? ధోనీ గైర్హాజరు ప్రభావం

ఐదు సార్లు ఛాంపియన్‌గా నిలిచిన చెన్నై సూపర్ కింగ్స్ జట్టు, డిఫెండింగ్ ఛాంపియన్ రాయల్ చాలెంజర్స్ బెంగళూరుతో ఏప్రిల్ 5న జరిగే హై వోల్టేజ్ సండే డబుల్ హెడర్ మ్యాచ్‌లో తలపడనుంది. ఐపీఎల్ 2026 సీజన్ ప్రారంభంలో నిరాశాజనక ప్రదర్శన చేసిన సీఎస్‌కేకు ఈ మ్యాచ్ అత్యంత కీలకంగా మారింది.

యెల్లో ఆర్మీ ఈ సీజన్‌ను వరుసగా రెండు ఓటములతో ప్రారంభించింది. ప్రస్తుతం పాయింట్ల పట్టికలో చివరి స్థానంలో ఉండడంతో జట్టుపై ఒత్తిడి పెరిగింది. అయితే, ఆత్మవిశ్వాసంతో ఉన్న ఆర్సీబీపై బలంగా పుంజుకోవాలని సీఎస్‌కే భావిస్తోంది.

కనీసం ఆరు మ్యాచ్‌లు దూరం అయ్యే సూచనలు

ఈ మ్యాచ్‌కు ముందు పెద్ద చర్చగా మారింది ఎంఎస్ ధోనీ గైర్హాజరు. జట్టుకు కీలకమైన ఫినిషర్‌గా, కెప్టెన్‌గా ధోనీ ప్రాముఖ్యత ఎంతో ఉంది. అయితే కాలి కండరాల గాయం కారణంగా ఆయన ఈ మ్యాచ్‌కు కూడా దూరమయ్యే అవకాశాలు ఉన్నాయి.

ఫ్రాంచైజీ ఇప్పటికే ధోనీ తొలి రెండు వారాలు అందుబాటులో ఉండరని ప్రకటించింది. ఇటీవల నెట్స్‌లో ప్రాక్టీస్ చేస్తున్నప్పటికీ, ఇంకా పూర్తిగా మ్యాచ్ ఫిట్‌గా లేరని సమాచారం. కనీసం ఆరు మ్యాచ్‌ల వరకు ఆయన జట్టుకు దూరంగా ఉండే అవకాశం ఉంది.

ధోనీ లేకపోవడంతో సీఎస్‌కే బ్యాటింగ్ లైనప్ అనుభవం తక్కువగా కనిపిస్తోంది. ముఖ్యంగా చివరి ఓవర్లలో మ్యాచ్‌ను ముగించడంలో జట్టు ఇబ్బంది పడుతోంది. లక్ష్యాన్ని కాపాడే సమయంలో కూడా కీలక క్షణాల్లో ఒత్తిడిని ఎదుర్కోలేకపోయింది.

ఇక మరో దెబ్బగా డివాల్డ్ బ్రెవిస్ కూడా సైడ్ స్ట్రెయిన్ కారణంగా జట్టుకు దూరమయ్యాడు. తేలికపాటి ప్రాక్టీస్ మొదలుపెట్టినా, తిరిగి ఎప్పుడు ఆడతాడో స్పష్టత లేదు. దీంతో మిడిల్ ఆర్డర్ మరింత బలహీనంగా మారింది. ఇప్పటికే రెండు ఓటములతో పాయింట్ల పట్టికలో చివర్లో ఉన్న సీఎస్‌కేకు ఇది తప్పనిసరి విజయం సాధించాల్సిన మ్యాచ్. ఆర్సీబీపై గెలిస్తే మళ్లీ ఊపు దొరుకుతుంది. కానీ కీలక ఆటగాళ్లు లేకపోవడంతో ఈ పోరు సీఎస్‌కేకు మరింత కఠినంగా మారింది.

రెడ్ బాల్ సంక్షోభానికి పరిష్కారం: 64 మంది యువ ఆటగాళ్లతో కొత్త ప్లాన్