గాయంతో కరన్ అవుట్… రాజస్థాన్ జట్టులోకి షనాకా ఎంట్రీ

ఇంగ్లాండ్ ఆల్‌రౌండర్ సామ్ కరన్ గాయంతో ఐపీఎల్ 2026 మొత్తం నుంచి తప్పుకోవడంతో రాజస్థాన్ రాయల్స్ కీలక నిర్ణయం తీసుకుంది. ఆయనకు ప్రత్యామ్నాయంగా శ్రీలంక టీ20 జట్టు కెప్టెన్ దసున్ షనాకాను జట్టులోకి తీసుకుంది. కరన్ గ్రోయిన్ గాయంతో సీజన్‌కు దూరమవ్వడం రాజస్థాన్‌కు పెద్ద షాక్‌గా మారగా, జట్టు సమతౌల్యం కోసం ఈ మార్పు అవసరమైంది.

ఐపీఎల్ మినీ వేలంలో అమ్ముడుపోని షనాకా మొదట పీఎస్ఎల్‌లో లాహోర్ ఖలందర్స్ తరఫున ఆడేందుకు సిద్ధమయ్యాడు. అయితే ఐపీఎల్ అవకాశంతో తన నిర్ణయాన్ని మార్చుకున్నాడు. పీఎస్ఎల్ ఒప్పంద ప్రక్రియ పూర్తి చేసిన తర్వాత త్వరలోనే రాజస్థాన్ జట్టుతో కలవనున్నాడు. ఫ్రాంచైజీ అతన్ని ₹2 కోట్లకు తీసుకున్నట్లు తెలిపింది. గతంలో గుజరాత్ టైటాన్స్ తరఫున ఆడిన అనుభవం కూడా షనాకాకు ఉంది.

మధ్యవరుసలో పవర్ హిట్టర్‌గా బ్యాటింగ్ చేయగలగడం, సీమ్ బౌలింగ్ చేయగల ఆల్‌రౌండర్ కావడం షనాకాకు పెద్ద ప్లస్. ఇటీవల అంతర్జాతీయ మ్యాచ్‌లలో కూడా మంచి ఫామ్‌లో ఉన్నాడు. టీ20 ప్రపంచ కప్‌లో శ్రీలంకను సూపర్ ఎయిట్ దశకు నడిపించిన షనాకా 165 పరుగులు చేసి, 3 వికెట్లు తీసుకున్నాడు. మొత్తం కెరీర్‌లో 6 టెస్ట్‌లు, 71 వన్డేలు, 131 టీ20 మ్యాచ్‌లు ఆడి 3350కిపైగా పరుగులు చేసి, 86 వికెట్లు సాధించాడు.

ఆర్థిక లాభాలు, గ్లోబల్ గుర్తింపే ప్రధాన కారణం

షనాకా ఈ నిర్ణయం మరోసారి ఐపీఎల్ ప్రాధాన్యతను చూపిస్తోంది. ప్రపంచవ్యాప్తంగా క్రికెటర్లు ఇతర టీ20 టోర్నమెంట్‌ల కంటే ఐపీఎల్‌కు ప్రాధాన్యత ఇస్తున్నారు. భారీ ఆర్థిక లాభాలు, గ్లోబల్ గుర్తింపు కారణంగా చివరి నిమిషంలో కూడా నిర్ణయాలు మారుతున్నాయి.

ఈ ధోరణిపై పాకిస్తాన్ క్రికెట్ వర్గాల్లో ఆందోళనలు వ్యక్తమవుతున్నాయి. మాజీ పేసర్ షోయబ్ అఖ్తర్ కూడా మధ్యలో ఆటగాళ్లు వెళ్లిపోవడం పీఎస్ఎల్ పోటీ స్థాయిపై ప్రభావం చూపవచ్చని హెచ్చరించాడు. ఇటీవల జింబాబ్వే పేసర్ బ్లెసింగ్ ముజరబాని కూడా ఐపీఎల్‌లోకి మారిన విషయం తెలిసిందే.

అయితే రాజస్థాన్ రాయల్స్‌కు షనాకా చేరిక సమయోచిత బలం. బ్యాటింగ్, బౌలింగ్ రెండు విభాగాల్లో సహకరించే అతని సామర్థ్యం జట్టుకు అదనపు స్థిరత్వాన్ని ఇస్తుంది. అలాగే కెప్టెన్సీ అనుభవం కూడా జట్టుకు ఉపయోగపడే అవకాశం ఉంది. కరన్ లేని లోటును భర్తీ చేస్తూ ఐపీఎల్ 2026లో రాజస్థాన్ పోటీ సామర్థ్యాన్ని కొనసాగించేందుకు షనాకా కీలక పాత్ర పోషించనున్నాడు.

ఐపీఎల్ 2026 ముందు బుమ్రా ఫిట్‌నెస్ షాక్.. ముంబై ఇండియన్స్‌కు టెన్షన్