సౌతాఫ్రికాతో టీ20 సిరీస్‌కు ముందు భారతకు గుడ్‌న్యూస్: స్టార్‌ ఆల్‌రౌండర్‌ ఫిట్‌ అయ్యాడు

దక్షిణాఫ్రికాతో టీ20 సిరీస్‌కు ముందు టీమిండియాకు శుభవార్త. గాయం కారణంగా కొంతకాలంగా జట్టుకు దూరమైన స్టార్ ఆల్‌రౌండర్ హార్దిక్ పాండ్యా మళ్లీ పూర్తి ఫిట్‌నెస్‌ను సాధించాడు. దీంతో డిసెంబర్ 9 నుంచి ప్రారంభమయ్యే ఐదు మ్యాచ్‌ల టీ20 సిరీస్‌లో అతడు ఆడే అవకాశం బాగా కనిపిస్తోంది.

ఆసియా కప్ 2025 సమయంలో గాయపడిన హార్దిక్ గత కొన్ని వారాలుగా పోటీ క్రికెట్‌కు దూరంగా ఉన్న విషయం తెలిసిందే. తాజాగా బీసీసీఐ నిర్వహించిన ఫిట్‌నెస్ టెస్టును విజయవంతంగా పూర్తిచేయడంతో అతడు మ్యాచ్ ప్రాక్టీస్ కోసం సయ్యద్ ముస్తాక్ అలీ ట్రోఫీలో బరిలోకి దిగాడు. హైదరాబాద్ ఉప్పల్ స్టేడియంలో జరుగుతున్న ఈ టోర్నీలో హార్దిక్ బరోడాకు ప్రాతినిధ్యం వహిస్తున్నాడు.

×

Hardik Pandya All-rounder

Hardik Pandya, an Indian cricketer, is known for his aggressive batting and fielding skills.

గమనించాల్సిందేమంటే, ఆసియా కప్ ఫైనల్‌కు ముందు హార్దిక్ మోకాలి గాయం కారణంగా పాకిస్థాన్‌తో జరిగిన ఆఖరి మ్యాచ్‌కి దూరమయ్యాడు. ఆ గాయం నుంచి పూర్తిగా కోలుకోకపోవడంతో ఆస్ట్రేలియాతో వన్డే, టీ20 సిరీస్‌లకు, ఇంకా దక్షిణాఫ్రికాతో వన్డే సిరీస్‌కి కూడా అందుబాటులో ఉండలేకపోయాడు. అయితే ఇప్పుడు పరిస్థితులు మారాయి. డిసెంబర్ 9 నుంచి ప్రారంభమయ్యే టీ20 సిరీస్‌లో అతడి వైపంగానే అవకాశాలు ఎక్కువగా కనిపిస్తున్నాయి.

భారత జట్టును బీసీసీఐ ఇంకా ప్రకటించలేదు. వైస్ కెప్టెన్ శుభ్మన్ గిల్ ఆరోగ్య పరిస్థితిపై స్పష్టత వచ్చిన వెంటనే జట్టు ఎంపికను ఖరారు చేయనున్నట్లు తెలుస్తోంది.

ఇక టీ20 ప్రపంచకప్ 2026కు మరో రెండు నెలల సమయం మాత్రమే మిగిలి ఉన్న నేపథ్యంలో, సౌతాఫ్రికాతో జరగబోయే ఈ సిరీస్ ద్వారా సరైన జట్టు కాంబినేషన్‌ను ఓ స్థాయిలో అంచనా వేయాలని బీసీసీఐ భావిస్తోంది.

భారత్–దక్షిణాఫ్రికా టీ20 సిరీస్ షెడ్యూల్

• మొదటి టీ20: డిసెంబర్ 09 – కటక్

• రెండో టీ20: డిసెంబర్ 11 – ముల్లాన్‌పూర్

• మూడో టీ20: డిసెంబర్ 14 – ధర్మశాల

• నాలుగో టీ20: డిసెంబర్ 17 – లక్నో

• ఐదో టీ20: డిసెంబర్ 19 – అహ్మదాబాద్

మరిన్ని వార్తలు చదవండి: SMAT 2025: హార్దిక్ పాండ్య రూటే సపరేటు! ఫ్యాన్ కోసం సెక్యూరిటీని ఆపి గ్రౌండ్‌లో సెల్ఫీ