T20 World Cup 2026 Prize Money: టీ20 వరల్డ్‌కప్ 2026 ప్రైజ్ మనీ ఎంత? విజేత, రన్నరప్‌కు ఎంత దక్కుతుంది?

టీ20 ప్రపంచకప్‌ 2026 కోసం సర్వం సిద్ధమైంది. భారత్‌, శ్రీలంక సంయుక్తంగా ఆతిథ్యం ఇస్తున్న ఈ ఐసీసీ మెగా టోర్నీ ఫిబ్రవరి 7 నుంచి ప్రారంభం కానుంది. ఇప్పటికే జట్లు సన్నద్ధత పనుల్లో బిజీగా ఉండగా, తాజాగా వెలువడిన ప్రైజ్ మనీ వివరాలు క్రికెట్ అభిమానుల్లో ఆసక్తిని మరింత పెంచుతున్నాయి.

ఈసారి టీ20 వరల్డ్‌కప్‌లో మొత్తం ప్రైజ్ పూల్‌ను దాదాపు 20 శాతం పెంచుతూ ఐసీసీ కీలక నిర్ణయం తీసుకున్నట్లు సమాచారం. 2024 ఎడిషన్‌లో మొత్తం ప్రైజ్ పూల్ $11.25 మిలియన్లుగా ఉండగా, 2026 టోర్నీకి దానిని $13.5 మిలియన్లకు పెంచినట్లు తెలుస్తోంది. ఇది భారత కరెన్సీలో సుమారు రూ. 120.37 కోట్లకు పైగా అవుతుంది.

విజేతకు భారీ నగదు బహుమతి

ప్రపంచవ్యాప్తంగా అత్యంత ప్రజాదరణ పొందిన టీ20 ఫార్మాట్‌లో జరగనున్న ఈ టోర్నీకి ఐసీసీ ప్రత్యేక బడ్జెట్ కేటాయించింది. 2024లో ఛాంపియన్‌గా నిలిచిన జట్టుకు $2.45 మిలియన్లు లభించగా, 2026లో టైటిల్ గెలిచే జట్టు ఏకంగా $3 మిలియన్లు సొంతం చేసుకోనుంది. అంటే దాదాపు రూ. 27.48 కోట్లు విజేత జట్టు ఖాతాలోకి వెళ్లనున్నాయి.

రన్నరప్‌, సెమీఫైనలిస్టులకు ఎంత?

ఫైనల్‌కు చేరి రన్నరప్‌గా నిలిచే జట్టుకు కూడా భారీ మొత్తమే దక్కనుంది. ద్వితీయ స్థానంలో నిలిచే జట్టుకు $1.6 మిలియన్లు, అంటే సుమారు రూ. 14.65 కోట్లు నగదు బహుమతిగా అందుతాయి. అలాగే సెమీఫైనల్స్‌లో ఓడిపోయిన రెండు జట్లకు ఒక్కొక్కదానికి $7,90,000 చొప్పున లభించనుంది. ఇది భారత కరెన్సీలో దాదాపు రూ. 7.23 కోట్లకు సమానం.

ఇతర జట్లకూ మంచి ప్రోత్సాహం

టోర్నీలో 5 నుంచి 12వ స్థానాల మధ్య నిలిచే జట్లు (సూపర్ 8 దశలో నిష్క్రమించినవారు) ఒక్కొక్కదానికి $3,80,000 అందుకోనున్నాయి. ఇది సుమారు రూ. 3.48 కోట్లు. గ్రూప్ దశలోనే టోర్నీ నుంచి నిష్క్రమించే 13 నుంచి 20 స్థానాల్లో నిలిచే జట్లకు కూడా కనీసంగా $2,50,000 చొప్పున ఇవ్వనున్నారు. అంటే దాదాపు రూ. 2.29 కోట్లు.

స్టేజ్ వారీగా ప్రైజ్ మనీ వివరాలు

• ఛాంపియన్ – $3 మిలియన్లు (రూ. 27.47 కోట్లు)

• రన్నరప్ – $1.6 మిలియన్లు (రూ. 14.65 కోట్లు)

• సెమీఫైనలిస్టులు – ఒక్కొక్కరికి $7,90,000 (రూ. 7.23 కోట్లు)

• 5–12 స్థానాలు – ఒక్కొక్కరికి $3,80,000 (రూ. 3.48 కోట్లు)

• 13–20 స్థానాలు – ఒక్కొక్కరికి $2,50,000 (రూ. 2.29 కోట్లు)

చిన్న జట్లకు ఇది పెద్ద ఊరట

ఈ భారీ ప్రైజ్ మనీ పెంపు కేవలం పెద్ద జట్లకే కాకుండా, ఉగాండా, నమీబియా వంటి చిన్న దేశాల జట్లకు కూడా ఆర్థికంగా ఎంతో ఉపయోగకరంగా మారనుంది. వరల్డ్‌కప్‌లో పాల్గొనడం ద్వారా వచ్చే ఆదాయం ఆయా దేశాల్లో క్రికెట్ అభివృద్ధికి కీలకంగా నిలవనుంది.

ఫిబ్రవరి 7 నుంచి ప్రారంభం కానున్న ఈ మెగా సమరంలో రూ. 27 కోట్ల టైటిల్ బహుమతిని ఏ జట్టు సొంతం చేసుకుంటుందో చూడాలని క్రికెట్ అభిమానులు ఆసక్తిగా ఎదురుచూస్తున్నారు.