టీ20 ప్రపంచకప్ 2026: రోహిత్ శర్మకు ఐసీసీ అరుదైన గౌరవం

టీమిండియా మాజీ కెప్టెన్ రోహిత్ శర్మకు మరో అరుదైన గౌరవం లభించింది. వచ్చే ఏడాది భారత్–శ్రీలంక సంయుక్త వేదికగా జరగనున్న టీ20 ప్రపంచకప్ 2026 షెడ్యూల్‌ను ఐసీసీ విడుదల చేసింది. ముంబైలో జరిగిన ఈ వేడుకకు రోహిత్ శర్మతో పాటు ప్రస్తుత టీ20 కెప్టెన్ సూర్యకుమార్ యాదవ్, టీమిండియా మహిళా జట్టు నాయకురాలు హర్మన్ ప్రీత్ కౌర్ హాజరయ్యారు. ఈ కార్యక్రమంలో రోహిత్ శర్మపై ప్రత్యేకంగా దృష్టిపడి, అతనికి ఒక విశిష్ట గౌరవం ప్రకటించారు.

2024 టీ20 ప్రపంచకప్‌లో భారత్‌ను టైటిల్ దాకా నడిపించిన రోహిత్ శర్మను, టీ20 ప్రపంచకప్ 2026కు బ్రాండ్ అంబాసిడర్‌గా ఐసీసీ నియమించింది. ఈ విషయాన్ని ఐసీసీ ఛైర్మన్ జై్‌షా అధికారికంగా ప్రకటించారు. షెడ్యూల్ విడుదలకు ముందు జై్‌షానే రోహిత్ కొత్త బాధ్యతలను వెల్లడించారు. కాగా, టీ20 ప్రపంచకప్ గెలిచిన అనంతరం రోహిత్ శర్మ టీ20లు, ఆపై టెస్టులకు వీడ్కోలు పలికిన విషయం తెలిసినదే.

రోహిత్ శర్మ రికార్డు

2026 టీ20 ప్రపంచకప్ బ్రాండ్ అంబాసిడర్‌గా రోహిత్ ఎంపికవడం ఒక కొత్త చరిత్రకు నాంది పలికింది. ఎందుకంటే అంతర్జాతీయ క్రికెట్ కొనసాగిస్తూ ఉన్నప్పుడు ప్రపంచకప్ అంబాసిడర్‌గా నియమితుడైన తొలి ఆటగాడు రోహిత్ శర్మ. ఇప్పటి వరకు ప్రపంచంలో ఏ క్రికెటర్‌కు కూడా ఈ విధమైన గౌరవం దక్కలేదు.

రోహిత్ శర్మ స్పందన

బ్రాండ్ అంబాసిడర్‌గా ఎంపికైన తర్వాత రోహిత్ తన స్పందనను తెలిపాడు.
“ఇది నాకు దక్కిన పెద్ద గౌరవాల్లో ఒకటి. క్రికెట్ ఆడుతూనే ఈ స్థాయి కార్యక్రమానికి అంబాసిడర్‌గా ఎంపిక కావడం ఇప్పటివరకు ఎవరికి జరగలేదు. మాదిరిగానే ఈసారి కూడా భారత జట్టు అద్భుతమైన ప్రదర్శన చేస్తుందని ఆశిస్తున్నాను. ఐసీసీ ట్రోఫీ గెలవడం ఎంత కష్టమో నాకు తెలుసు దాన్ని నేను అనుభవించాను. నా క్రికెట్ ప్రయాణం 18 ఏళ్లు పూర్తయ్యాయి. కెరీర్ ప్రారంభంలోనే రెండు ఐసీసీ టైటిల్స్ గెలుచుకున్నాను. ఆ తర్వాత మరో ట్రోఫీని ఎత్తిపట్టే అవకాశం ఎంతగానో కోరి ఎదురుచూసిన రోజులేంటో మాకు తెలుసు” అని రోహిత్ తెలిపారు.

రోహిత్ శర్మ 2007, 2024లో భారత్ టీ20 ప్రపంచకప్ గెలిచిన జట్టులో భాగస్వామి. ఇప్పటివరకు టీ20 ప్రపంచకప్‌లలో ఆయన 44 ఇన్నింగ్స్‌ల్లో 1220 పరుగులు చేశారు.

మరిన్ని వార్తలు చదవండి: టీ20 ప్రపంచ కప్ 2026 పూర్తి షెడ్యూల్: భారత్ మ్యాచ్‌లు, గ్రూపులు, జట్ల వివరాలు