వరల్డ్ కప్ ముందు యూఎస్ఏ క్రికెటర్ ఆరోన్ జోన్స్‌పై ఫిక్సింగ్ ఆరోపణలు – ఐసీసీ సస్పెన్షన్

వరల్డ్ కప్‌కు ముందు అమెరికా క్రికెట్‌లో పెను కలకలం చోటుచేసుకుంది. యూఎస్ఏ స్టార్ బ్యాటర్ ఆరోన్ జోన్స్‌పై ఫిక్సింగ్ ఆరోపణలు రావడం ప్రస్తుతం అంతర్జాతీయ క్రికెట్ వర్గాల్లో తీవ్ర చర్చనీయాంశంగా మారింది. ఈ ఆరోపణలను తీవ్రంగా పరిగణించిన ఐసీసీ, జోన్స్‌ను అన్ని రకాల క్రికెట్ కార్యకలాపాల నుంచి తక్షణమే తాత్కాలికంగా సస్పెండ్ చేస్తూ కీలక నిర్ణయం తీసుకుంది. 31 ఏళ్ల ఈ అనుభవజ్ఞుడైన ఆటగాడిపై వెంటనే నిషేధం అమల్లోకి వచ్చినట్లు ఐసీసీ అధికారికంగా ప్రకటించింది.

తనపై వచ్చిన ఆరోపణలకు సంబంధించి వివరణ ఇవ్వడానికి ఆరోన్ జోన్స్‌కు 14 రోజుల గడువు ఇచ్చినట్లు ఐసీసీ స్పష్టం చేసింది. జనవరి 28, 2026 నుంచి ఈ గడువు ప్రారంభమవుతుందని వెల్లడించింది. “ఆరోన్ జోన్స్‌ను వెంటనే అన్ని క్రికెట్ కార్యక్రమాల నుంచి సస్పెండ్ చేస్తున్నాం. ఆరోపణలపై స్పందించేందుకు అతనికి 14 రోజుల సమయం కల్పించాం” అని ఐసీసీ తన ప్రకటనలో పేర్కొంది.

ఇండియా, శ్రీలంక వేదికలుగా జరగనున్న టీ20 వరల్డ్ కప్‌కు యూఎస్ఏ జట్టు సిద్ధమవుతున్న తరుణంలో ఈ పరిణామం జరగడం అమెరికా జట్టుకు భారీ ఎదురుదెబ్బగా మారింది. త్వరలోనే టీ20 వరల్డ్ కప్ కోసం యూఎస్ఏ స్క్వాడ్‌ను ప్రకటించనుండగా, సస్పెన్షన్ కారణంగా 15 మంది సభ్యుల జట్టులో ఆరోన్ జోన్స్ ఎంపికకు అనర్హుడయ్యాడు. 2024 టీ20 వరల్డ్ కప్‌లో అమెరికా జట్టు సూపర్-8 దశకు చేరుకోవడంలో కీలక పాత్ర పోషించిన జోన్స్ ఈసారి జట్టుకు దూరమవడం బ్యాటింగ్ విభాగాన్ని బలహీనపరిచే అంశంగా మారింది.

ఈ ఆరోపణలకు కారణం బార్బడోస్‌లో జరిగిన BIM10 లీగ్‌ (2023-24 సీజన్). ఆ టోర్నమెంట్ సమయంలో ఫిక్సింగ్‌కు సంబంధించిన అనుమానాస్పద ఘటనల్లో ఆరోన్ జోన్స్ పాత్ర ఉందని ఆరోపణలు వచ్చాయి. ఐసీసీ, క్రికెట్ వెస్టిండీస్ అవినీతి నిరోధక కోడ్‌లోని ఐదు నిబంధనలను జోన్స్ ఉల్లంఘించినట్లు గుర్తించింది. BIM10 టోర్నమెంట్ సమయంలో బుకీలు తనను సంప్రదించిన విషయాన్ని సంబంధిత అధికారులకు నివేదించకపోవడం అతనిపై వచ్చిన ప్రధాన ఆరోపణల్లో ఒకటి.

అంతేకాదు, ఐసీసీ అవినీతి నిరోధక విభాగం (ACU) నిర్వహించిన విచారణలో జోన్స్ పూర్తిగా సహకరించలేదని, అవసరమైన సమాచారాన్ని దాచినట్లు కూడా ఆరోపణలు ఉన్నాయి. BIM10 లీగ్ మాత్రమే కాకుండా, మరో రెండు అంతర్జాతీయ మ్యాచ్‌లకు సంబంధించి కూడా అతనిపై అనుమానాలు ఉన్నాయని సమాచారం.

ఆరోన్ జోన్స్ క్రికెట్ ప్రయాణాన్ని చూస్తే, 2019లో అంతర్జాతీయ క్రికెట్‌లో అడుగుపెట్టి తక్కువ కాలంలోనే యూఎస్ఏ క్రికెట్‌కు కీలక ఆటగాడిగా ఎదిగాడు. అమెరికా తరఫున ఇప్పటివరకు 52 వన్డేలు ఆడి, సగటు 34తో 1664 పరుగులు సాధించాడు. ఇందులో 11 అర్ధసెంచరీలు, ఒక సెంచరీ ఉన్నాయి. అలాగే 48 టీ20 మ్యాచ్‌ల్లో 24 సగటుతో 770 పరుగులు చేశాడు.

2024 టీ20 వరల్డ్ కప్‌లో జోన్స్ ప్రదర్శన ప్రత్యేకంగా నిలిచింది. తొలి మ్యాచ్‌లో కెనడాపై కేవలం 40 బంతుల్లో 94 పరుగులు చేసి జట్టుకు అద్భుతమైన విజయాన్ని అందించాడు. ఆ తర్వాత పాకిస్థాన్‌తో జరిగిన మ్యాచ్‌లో 26 బంతుల్లో 36 పరుగులు చేసి కీలక ఇన్నింగ్స్ ఆడాడు. అలాంటి కీలక ఆటగాడిపై ఇప్పుడు ఫిక్సింగ్ ఆరోపణలు రావడం యూఎస్ఏ క్రికెట్‌కు పెద్ద షాక్‌గా మారింది.

మరిన్ని వార్తలు చదవండి: భారత మహిళలతో సిరీస్‌కు ఆసీస్ జట్లు ప్రకటింపు.. సోఫీ మోలినెక్స్‌కు కెప్టెన్సీ!