IND vs NZ 1st ODI Highlights: న్యూజిలాండ్‌పై విరాట్ షో.. భారత్ 4 వికెట్ల విజయం

భారత పురుషుల క్రికెట్ జట్టు కొత్త సంవత్సరాన్ని అద్భుతమైన విజయంతో ప్రారంభించింది. ఆదివారం వడోదర వేదికగా న్యూజిలాండ్‌తో జరిగిన తొలి వన్డే మ్యాచ్‌లో టీమిండియా 4 వికెట్ల తేడాతో ఘన విజయం సాధించింది. 301 పరుగుల భారీ లక్ష్యాన్ని భారత్ 49 ఓవర్లలో 6 వికెట్లు కోల్పోయి విజయవంతంగా చేధించింది. ఈ గెలుపుతో మూడు మ్యాచ్‌ల వన్డే సిరీస్‌లో భారత్ 1-0 ఆధిక్యాన్ని సొంతం చేసుకుంది.

ఈ మ్యాచ్‌లో టాస్ ఓడి ముందుగా బ్యాటింగ్ చేసిన న్యూజిలాండ్ నిర్ణీత 50 ఓవర్లలో 8 వికెట్ల నష్టానికి 300 పరుగులు చేసింది. కివీస్ బ్యాటర్లలో డారిల్ మిచెల్ 71 బంతుల్లో 84 పరుగులతో జట్టును ముందుకు నడిపించగా, డెవాన్ కాన్వే 56, హెన్రీ నికోల్స్ 62 పరుగులతో అర్థశతకాలు సాధించి కీలక పాత్ర పోషించారు. భారత బౌలింగ్ విభాగంలో మహ్మద్ సిరాజ్, ప్రసిద్ కృష్ణ, హర్షిత్ రాణా తలా రెండు వికెట్లు పడగొట్టగా, కుల్దీప్ యాదవ్ ఒక వికెట్ తీసి కీలక బ్రేక్ అందించాడు.

విరాట్ విధ్వంసం

లక్ష్య చేధనలో భారత్‌కు విరాట్ కోహ్లి అసలైన ఆధారం అయ్యాడు. రోహిత్ శర్మ త్వరగా ఔటైన తర్వాత క్రీజులోకి వచ్చిన కోహ్లి తనదైన దూకుడు శైలిలో న్యూజిలాండ్ బౌలర్లపై విరుచుకుపడ్డాడు. ఫోర్లు, సిక్సర్లతో స్కోర్‌బోర్డును పరుగెత్తిస్తూ మ్యాచ్‌పై పూర్తి ఆధిపత్యం చెలాయించాడు. ఒక దశలో సునాయసంగా సెంచరీ సాధించేలా కనిపించిన కోహ్లి, భారీ షాట్‌కు ప్రయత్నిస్తూ దురదృష్టవశాత్తూ ఔటయ్యాడు.

కేవలం 7 పరుగుల తేడాతో శతకం చేజార్చుకున్న కోహ్లి 91 బంతుల్లో 8 ఫోర్లు, ఒక సిక్సర్‌తో 93 పరుగులు చేసి ప్రేక్షకులను అలరించాడు. అతడికి కెప్టెన్ శుభ్‌మన్ గిల్ (56) చక్కటి సహకారం అందించగా, వైస్ కెప్టెన్ శ్రేయస్ అయ్యర్ 49 పరుగులతో కీలక ఇన్నింగ్స్ ఆడాడు.

చివర్లో ఉత్కంఠ.. రాహుల్ ఫినిష్

కోహ్లి ఔటైన తర్వాత భారత్ వరుసగా వికెట్లు కోల్పోవడంతో డగౌట్‌లో క్షణకాలం ఆందోళన నెలకొంది. కానీ కేఎల్ రాహుల్ ప్రశాంతంగా ఆడుతూ బాధ్యతాయుత ఇన్నింగ్స్‌తో జట్టును గెలుపు గట్టెక్కించాడు. రాహుల్ 21 బంతుల్లో 29 పరుగులు చేసి మ్యాచ్‌ను సాఫీగా ముగించాడు. హర్షిత్ రాణా కూడా 23 బంతుల్లో 29 పరుగులతో మెరుపు ఇన్నింగ్స్ ఆడి కీలక సహకారం అందించాడు.

న్యూజిలాండ్ బౌలర్లలో కైల్ జేమీసన్ నాలుగు వికెట్లు తీసి పోరాటం కొనసాగించగా, ఆదిత్య అశోక్, క్రిస్టియన్ క్లార్క్ తలా ఒక వికెట్ సాధించారు. ఇక ఇరు జట్ల మధ్య మూడో వన్డే మ్యాచ్ బుధవారం రాజ్‌కోట్ వేదికగా జరగనుంది.

మరిన్ని వార్తలు చదవండి: క్రిస్ గేల్ రికార్డ్ బ్రేక్ చేసిన హిట్‌మ్యాన్...వన్డే క్రికెట్‌లో ఓపెనర్‌గా చరిత్ర సృష్టించిన రోహిత్ శర్మ..