రోహిత్‌కు చివరి అవకాశమా.. ఇషాన్ కిషన్ భారీ ఇన్నింగ్స్‌తో సమీకరణాలు మార్పు

భారత జట్టు సీనియర్ ఓపెనర్ రోహిత్ శర్మ ఇటీవల పేలవ ఫామ్ కారణంగా వన్డే జట్టులో తన స్థానంపై ప్రశ్నలు ఎదుర్కొంటున్నాడు. ఐపీఎల్ 2026 సందర్భంగా హ్యామ్‌స్ట్రింగ్ గాయం కారణంగా దాదాపు నెల రోజుల పాటు ముంబై ఇండియన్స్‌కు దూరమైన రోహిత్, తిరిగి బరిలోకి దిగిన తర్వాత కూడా తన అత్యుత్తమ ప్రదర్శనను చూపలేకపోయాడు. ఐపీఎల్‌లో చివరి నాలుగు ఇన్నింగ్స్‌లలో అతడు కేవలం 62 పరుగులు మాత్రమే చేసి నిరాశపరిచాడు.

ఆ పేలవ ఫామ్ ప్రస్తుతం ఆఫ్ఘానిస్థాన్‌తో జరుగుతున్న వన్డే సిరీస్‌లోనూ కొనసాగుతోంది. తొలి వన్డేలో 16 పరుగులు చేసిన రోహిత్, రెండో మ్యాచ్‌లో 48 పరుగులు సాధించాడు. రెండు ఇన్నింగ్స్‌లలో కలిపి 64 పరుగులు మాత్రమే చేయడం ఆందోళన కలిగిస్తోంది. ముఖ్యంగా యువ ఆటగాళ్లు జట్టులో చోటు కోసం బలంగా పోటీ పడుతున్న తరుణంలో ఈ ప్రదర్శనలు మరింత చర్చనీయాంశంగా మారాయి.

'ది ఇండియన్ ఎక్స్‌ప్రెస్' కథనం ప్రకారం, ఇషాన్ కిషన్ భారత వన్డే జట్టులో విజయవంతంగా పునరాగమనం చేయడం టాప్ ఆర్డర్‌లో పోటీని మరింత పెంచింది. 2027 ఐసీసీ పురుషుల క్రికెట్ ప్రపంచకప్‌ను దృష్టిలో పెట్టుకుని ఎంపిక కమిటీ పలు ప్రత్యామ్నాయాలను పరిశీలిస్తుండగా, రోహిత్ శర్మతో పాటు యశస్వి జైస్వాల్ కూడా ఒత్తిడిని ఎదుర్కొంటున్నట్లు సమాచారం.

ఆఫ్ఘానిస్థాన్ సిరీస్‌కు విరాట్ కోహ్లీ స్థానంలో యశస్వి జైస్వాల్ జట్టులోకి వచ్చాడు. మరోవైపు గాయం నుంచి కోలుకున్న రోహిత్ తిరిగి జట్టులో చేరాడు. అయితే ఇషాన్ కిషన్ అద్భుత ప్రదర్శనలు భారత బ్యాటింగ్ కూర్పుపై కొత్త చర్చకు తెరలేపాయి. వికెట్‌కీపర్-బ్యాటర్ అయినప్పటికీ, అతడి ఎదుగుదల కేఎల్ రాహుల్ స్థానంపై మాత్రం ఎలాంటి ప్రభావం చూపలేదని తెలుస్తోంది.

రెండో వన్డేలో అఫ్గానిస్తాన్‌పై భారత్ అద్భుత విజయం సిరీస్ ఖాయం

సెంచరీతో సెలెక్టర్ల దృష్టిని ఆకర్షించిన ఇషాన్ కిషన్

ఎంపికదారుల మధ్య ప్రస్తుతం రోహిత్ పరిస్థితి ప్రధాన చర్చాంశంగా మారినట్లు కథనం పేర్కొంది. ఇటీవలి నెలల్లో ఇషాన్ కిషన్ చేసిన ప్రదర్శనలు అతడి అవకాశాలను మరింత బలోపేతం చేశాయి. టీ20 ప్రపంచకప్ 2026లో భారత్ విజయవంతంగా టైటిల్ నిలబెట్టుకోవడంలో కీలక పాత్ర పోషించిన కిషన్, ఆఫ్ఘానిస్థాన్‌పై మెరుపు సెంచరీతో మరోసారి తన సత్తా చాటాడు.

లక్నోలో జరిగిన రెండో వన్డేలో నాలుగో స్థానంలో బ్యాటింగ్‌కు వచ్చిన ఇషాన్ కిషన్ కేవలం 79 బంతుల్లో 125 పరుగులు బాదేశాడు. అతడి ఇన్నింగ్స్‌లో 14 ఫోర్లు, 7 సిక్సర్లు ఉన్నాయి. కిషన్ వీరోచిత ఇన్నింగ్స్‌తో భారత్ 402 పరుగుల భారీ స్కోరు నమోదు చేసింది. ఇదే సమయంలో వన్డేల్లో 1,000 పరుగుల మైలురాయిని కూడా అతడు అందుకున్నాడు.

అంతకుముందు న్యూజిలాండ్‌పై టీ20 అంతర్జాతీయ సిరీస్‌లో ఆకట్టుకునే ప్రదర్శనలతో కిషన్ మళ్లీ భారత జట్టు ప్రణాళికల్లోకి వచ్చాడు. ఆ ప్రదర్శనల ఫలితంగానే టీ20 ప్రపంచకప్ 2026లో భారత టాప్ ఆర్డర్‌లో చోటు దక్కించుకున్నాడు. కీలక టోర్నమెంట్‌లలో ఒత్తిడిని తట్టుకుని రాణించే సామర్థ్యం అతడికి అదనపు బలంగా మారింది.

ఆఫ్ఘానిస్థాన్‌పై తొలి రెండు వన్డేలు గెలిచిన భారత్ ఇప్పటికే సిరీస్‌ను 2-0తో సొంతం చేసుకుంది. జూన్ 20న చెన్నైలో జరగనున్న చివరి వన్డే కేవలం లాంఛనప్రాయ మ్యాచ్ మాత్రమే అయినప్పటికీ, రోహిత్ శర్మకు మాత్రం ఇది అత్యంత కీలకంగా మారే అవకాశం ఉంది.

'ది ఇండియన్ ఎక్స్‌ప్రెస్' కథనం ప్రకారం, వచ్చే నెల ఇంగ్లండ్ పర్యటనకు రోహిత్ ఎంపికకు ఇప్పటికీ అవకాశాలు ఉన్నప్పటికీ, చెన్నై వన్డేలో మరోసారి విఫలమైతే 2027 ప్రపంచకప్ ప్రణాళికల దిశగా బీసీసీఐ ఎంపిక కమిటీ కఠిన నిర్ణయం తీసుకునే పరిస్థితి ఏర్పడవచ్చు.

వన్డే క్రికెట్‌లో 400 పరుగులు దాటిన జట్ల పూర్తి వివరాలు