అసలంకకు షాక్.. శ్రీలంక వన్డే కెప్టెన్‌గా కుసల్ మెండిస్ ఎంపిక

వెస్టిండీస్ పర్యటనకు ముందు శ్రీలంక క్రికెట్‌లో పెద్ద మార్పులు చోటుచేసుకున్నాయి. కొత్త సెలెక్షన్ కమిటీ చైర్మన్ కపిల విజయగుణవర్ధనే ఆధ్వర్యంలో శ్రీలంక జట్టు వైట్‌బాల్ కెప్టెన్సీలో కీలక నిర్ణయం తీసుకుంది. వచ్చే నెలలో జరిగే వెస్టిండీస్ పూర్తి స్థాయి పర్యటన కోసం వన్డే, టీ20 జట్ల కెప్టెన్‌గా కుసల్ మెండిస్ ను నియమించింది. టెస్టు ఫార్మాట్‌లో మాత్రం ధనంజయ డి సిల్వా నే కెప్టెన్‌గా కొనసాగనున్నారు.

వన్డే కెప్టెన్సీ నుంచి చరిత్ అసలంక తప్పించబడగా, ఇప్పటికే టీ20 కెప్టెన్సీ బాధ్యతలను కూడా కోల్పోయిన విషయం తెలిసిందే. ఆసక్తికరంగా, అసలంక వన్డే జట్టులో స్థానం దక్కించుకున్నప్పటికీ టీ20 జట్టులో మాత్రం చోటు కోల్పోయాడు. టీ20 ఫార్మాట్‌లో తాత్కాలిక కెప్టెన్‌గా వ్యవహరించిన దాసున్ శనక స్థానంలో ఇప్పుడు కుసల్ మెండిస్ బాధ్యతలు చేపట్టనున్నాడు. మరోవైపు కామిందు మెండిస్ కు అన్ని వైట్‌బాల్ ఫార్మాట్‌లలో వైస్ కెప్టెన్ బాధ్యతలు అప్పగించారు.

శ్రీలంక జట్టుకు మరో పెద్ద ఊరటనిచ్చే విషయం వానిండు హసరంగ పునరాగమనం. ఈ ఏడాది టీ20 ప్రపంచకప్ సమయంలో హ్యామ్‌స్ట్రింగ్ గాయంతో దూరమైన హసరంగా ఇప్పుడు పూర్తిగా కోలుకుని వన్డే, టీ20 జట్లలో చోటు సంపాదించాడు. గాయం కారణంగా అతడు ఐపీఎల్‌లో లక్నో సూపర్ జెయింట్స్ తరఫున ఆడలేకపోయాడు. అయితే మరో వేగవంతమైన పేసర్ మతీషా పతిరానా మాత్రం ఇంకా గాయం నుంచి కోలుకోకపోవడంతో ఈ పర్యటనకు దూరమయ్యాడు. మే నెలలో కోల్‌కతా నైట్ రైడర్స్ తరఫున ఆడుతూ అతడు హ్యామ్‌స్ట్రింగ్ గాయానికి గురయ్యాడు.

శ్రీలంక పేస్ దళంలో వేగవంతమైన బౌలర్లు

శ్రీలంక వైట్‌బాల్ జట్టులో బలమైన పేస్ దళం కనిపిస్తోంది.దుష్మంత చమీర, దిల్షన్ మధుశంక, ఎషాన్ మలింగ లాంటి బౌలర్లు గంటకు 140 కి.మీ. కంటే ఎక్కువ వేగంతో బౌలింగ్ చేసే సామర్థ్యం కలిగి ఉన్నారు. వీరితో పాటు మిలన్ రత్నాయక్, అసిత ఫెర్నాండో, ప్రమోద్ మదుషన్, బినుర ఫెర్నాండో, నువాన్ తుషార కూడా జట్టులో చోటు దక్కించుకున్నారు.

బ్యాటింగ్ విభాగంలో కొత్త ముఖాలకు కూడా అవకాశం లభించింది. 27 ఏళ్ల ఓపెనర్ లాసిత్ క్రూస్పుల్లె అద్భుత ప్రదర్శనలతో తొలి పెద్ద విదేశీ పర్యటనకు ఎంపికయ్యాడు. ఇటీవల న్యూజిలాండ్-ఏ జట్టుపై అతడు సెంచరీ నమోదు చేసి సెలెక్టర్ల దృష్టిని ఆకర్షించాడు.

టెస్టు జట్టులో దేశీయ క్రికెట్‌లో రాణించిన అన్‌క్యాప్‌డ్ బ్యాటర్ పసిందు సూరియబందరకు తొలి అంతర్జాతీయ పర్యటన అవకాశం లభించింది. అలాగే బౌలింగ్ ఆల్‌రౌండర్ ఇసిత విజయసుందర కూడా జట్టులోకి వచ్చాడు. అనుభవజ్ఞులైన లహిరు ఉదరా, సోనాల్ దినుషా, రమేష్ మెండిస్ మళ్లీ జట్టులోకి చేరారు.

వెస్టిండీస్ పర్యటన జూన్ 3 నుంచి 8 వరకు మూడు వన్డేల సిరీస్‌తో ప్రారంభమవుతుంది. ఆ తర్వాత జూన్ 11, 13, 14 తేదీల్లో మూడు టీ20 మ్యాచ్‌లు జరుగనున్నాయి. అనంతరం సర్ వివియన్ రిచర్డ్స్ స్టేడియం వేదికగా రెండు టెస్టులు జూన్ 25–29 మరియు జూలై 3–7 మధ్య నిర్వహించనున్నారు. కొత్త నాయకత్వంతో శ్రీలంక జట్టు ఈ పర్యటనలో ఎలా రాణిస్తుందో అన్న ఆసక్తి అభిమానుల్లో నెలకొంది.