ఎంసీసీ కొత్త క్రికెట్ నియమాలు 2026: అక్టోబర్ నుంచి అమల్లోకి వచ్చే 10 కీలక మార్పులు

ఫిబ్రవరి 3న మంగళవారం మేరిలీబోన్ క్రికెట్ క్లబ్ ఎంసీసీ క్రికెట్ నియమాల్లో కీలకమైన మార్పులను ప్రకటించింది. మొత్తం 10 నియమాల్లో 73 అర్థవంతమైన సవరణలు చేయబడినట్లు ఎంసీసీ తెలిపింది. ఈ కొత్త నియమాలు 2026 అక్టోబర్ నుంచి అధికారికంగా అమల్లోకి రానున్నాయి. అప్పటివరకు ఆటగాళ్లు, అంపైర్లు మరియు జట్లు కొత్త నియమాలకు అలవాటు పడేందుకు సరిపడా సమయం ఉంటుంది.

ఆధునిక క్రికెట్ వేగం పెరగడం, ప్రపంచవ్యాప్తంగా ప్రజాదరణ ఎక్కువ కావడం వంటి అంశాలను దృష్టిలో పెట్టుకుని ఈ మార్పులు చేసినట్లు ఎంసీసీ పేర్కొంది. ఫాస్ట్ పేస్ క్రికెట్‌కు అనుగుణంగా ఆటను మరింత స్పష్టంగా, న్యాయంగా మార్చడమే లక్ష్యంగా ఈ నియమాలు రూపొందించబడ్డాయి.

2026 అక్టోబర్ నుంచి అమల్లోకి వచ్చే ఎంసీసీ ఆమోదించిన కొత్త నియమాలు

1. బంతి పరిమాణం మరియు బరువు

క్రికెట్ రకాన్ని బట్టి బంతి పరిమాణం, బరువు మారనుంది. ఎంసీసీ మూడు కేటగిరీలను నిర్ణయించింది. సైజ్ 1, సైజ్ 2, సైజ్ 3. సైజ్ 1 ప్రధానంగా పురుషుల క్రికెట్‌కు ఉపయోగిస్తారు. మిగతా రెండు జూనియర్ మరియు మహిళల క్రికెట్‌కు వర్తిస్తాయి. ఒకే బంతిని మహిళలు మరియు జూనియర్ క్రికెట్‌కు ఉపయోగించే అవకాశం ఉందని ఎంసీసీ తెలిపింది.

2. లామినేటెడ్ బ్యాట్లకు అనుమతి

బ్యాట్ల ధరలు పెరుగుతున్న నేపథ్యంలో పెద్దల క్రికెట్‌లో కూడా లామినేటెడ్ బ్యాట్లను అనుమతించాలని ఎంసీసీ నిర్ణయించింది. ఇవి సాధారణ వుడ్ బ్యాట్లతో పోలిస్తే తక్కువ ఖర్చుతో లభిస్తాయి. టైప్ డి లామినేటెడ్ బ్యాట్లు ఇకపై ఓపెన్ ఏజ్ క్రికెట్‌లో చెల్లుబాటు అవుతాయి.

3. లా 12.5.2 – రోజు చివరి ఓవర్‌లో వికెట్ పడినా ఓవర్ కొనసాగుతుంది

బహుదినాల మ్యాచ్‌లలో కీలకమైన మార్పు ఇది. రోజు చివరి ఓవర్‌లో వికెట్ పడితే ఆట అక్కడితో ఆగదు. మిగిలిన బంతులను పూర్తి చేయాల్సిందే. కొత్త బ్యాటర్ మైదానంలోకి వచ్చి ఓవర్ ముగిసే వరకు ఆడాలి.

4. లా 18.5.1 మరియు 18.5.2 – షార్ట్ రన్నింగ్ స్పష్టీకరణ

బ్యాటర్లు కావాలనే క్రీజ్‌లో పూర్తిగా చేరకుండా పరుగులు దోచుకోవడాన్ని నివారించేందుకు ఈ నియమం. ఫీల్డింగ్ జట్టు అప్పీల్ చేస్తే అంపైర్ నిర్ణయం తీసుకుంటారు. ఇది ఇప్పటికే ఐసీసీ అమల్లోకి తెచ్చిన నియమం.

5. లా 19.5.2 – బౌండరీ క్యాచ్

బౌండరీ బయటకు వెళ్లి మళ్లీ లోపలికి వచ్చి క్యాచ్ పట్టే ప్రయత్నాలను ఈ నియమం నిరోధిస్తుంది. ఫీల్డర్ ఒకసారి గాల్లోకి లేచి బంతిని తాకి తర్వాత బౌండరీ బయట పడితే అది బౌండరీగానే పరిగణిస్తారు.

6. లా 19.8 – ఓవర్‌థ్రోస్

ఓవర్‌థ్రో మరియు మిస్‌ఫీల్డ్ మధ్య స్పష్టత తీసుకువచ్చారు. స్టంప్స్‌పై త్రో చేసే ప్రయత్నంలో బంతి వెళ్లిపోతేనే ఓవర్‌థ్రోగా పరిగణిస్తారు. బౌండరీ దగ్గర బంతిని ఆపే ప్రయత్నంలో జరిగిన తప్పిదాన్ని ఓవర్‌థ్రోగా పరిగణించరు.

7. లా 20.1.1.1 – ఫైనల్లీ సెటిల్డ్ అనే కొత్త నిర్వచనం

బంతి ఇకపై కీపర్ లేదా బౌలర్ చేతుల్లో ఉండాల్సిన అవసరం లేదు. ఏ ఫీల్డర్ చేతుల్లో ఉన్నా లేదా నేలపై నిలిచిపోయినా బంతిని డెడ్‌గా పరిగణించవచ్చు.

8. లా 27.3.1 – వికెట్ కీపర్ స్థానం

బంతి రిలీజ్ అయ్యే సమయంలో కీపర్ గ్లోవ్స్ స్టంప్స్ ముందు ఉండొచ్చు. కానీ బంతి విడిచిన తర్వాత మాత్రం పూర్తిగా స్టంప్స్ వెనుక ఉండాలి.

9. లా 35.1.1 మరియు 35.2 – హిట్ వికెట్

బ్యాటర్ బంతిని ఆడే ప్రయత్నంలో తానే స్టంప్స్‌ను తాకితే హిట్ వికెట్‌గా పరిగణిస్తారు. కానీ ఇతర ఆటగాడిని తాకి స్టంప్స్ పడితే అది హిట్ వికెట్ కాదు.

10. అపెండిక్స్ A2.7 మరియు A2.8 – బంతిపై పూర్తి నియంత్రణ

రన్ అవుట్ లేదా స్టంపింగ్ సమయంలో ఫీల్డర్ బంతిని పూర్తిగా పట్టుకొని ఉండాలి. కేవలం చేతికి తగిలితే సరిపోదు.

మరిన్నివార్తలుచదవండి: IPL 2026 RCB for Sale: దాదాపు 2 బిలియన్ డాలర్ల విలువతో RCB అమ్మకానికి