మిచెల్ మార్ష్ దూరం.. లక్నోకు ఓపెనింగ్‌లో భారీ తలనొప్పి

ఐపీఎల్ 2026లో తమ చివరి లీగ్ మ్యాచ్‌కు ముందు లక్నో సూపర్ జెయింట్స్‌కు మరో భారీ ఎదురుదెబ్బ తగిలింది. పంజాబ్ కింగ్స్‌తో జరిగే మ్యాచ్‌కు ఆస్ట్రేలియా ఆల్‌రౌండర్ మిచెల్ మార్ష్ అందుబాటులో ఉండడం లేదని సమాచారం. ఈ సీజన్ మొత్తం లక్నో తరఫున ఓపెనర్‌గా రెగ్యులర్‌గా ఆడిన మార్ష్ గైర్హాజరు కావడంతో ఇప్పుడు జోష్ ఇంగ్లిస్‌కు జోడీగా ఎవరు ఓపెనింగ్‌కు వస్తారనే ప్రశ్న జట్టును వెంటాడుతోంది. ఇదివరకే వ్యక్తిగత కారణాలతో ఎయిడెన్ మార్క్రమ్ దక్షిణాఫ్రికాకు వెళ్లిపోయి రాజస్థాన్ రాయల్స్ మ్యాచ్‌కు దూరమైన విషయం తెలిసిందే.

ఈఎస్పీఎన్ క్రిక్‌ఇన్ఫో నివేదిక ప్రకారం పంజాబ్ కింగ్స్ మ్యాచ్‌కు మార్ష్ దూరం కానున్నాడు. అయితే అతని గైర్హాజరుకు అసలు కారణాన్ని ఫ్రాంచైజీ ఇప్పటివరకు వెల్లడించలేదు. ఇప్పటికే 13 మ్యాచ్‌ల్లో కేవలం నాలుగు విజయాలు మాత్రమే సాధించిన లక్నో ప్లేఆఫ్ రేసు నుంచి నిష్క్రమించింది. ప్రస్తుతం పాయింట్ల పట్టికలో అట్టడుగున ఉన్న లక్నోకు ఈ చివరి మ్యాచ్ అర్హత కోసం కాకుండా పరువు నిలబెట్టుకునే పోరుగా మారింది.

ఈ నిరాశాజనక సీజన్‌లో లక్నోకు కొద్దిపాటి ఊరటనిచ్చిన ఆటగాళ్లలో మిచెల్ మార్ష్ ఒకడు. ఈ సీజన్‌లో జట్టు తరఫున అత్యధిక పరుగులు సాధించిన బ్యాటర్ కూడా అతడే. 13 మ్యాచ్‌ల్లో 563 పరుగులు చేసిన మార్ష్ సగటు 43.30 కాగా, స్ట్రైక్‌రేట్ 163.18గా ఉంది. ఇప్పుడు మార్ష్, మార్క్రమ్, బ్రెట్జ్కే ముగ్గురూ అందుబాటులో లేకపోవడంతో పంజాబ్ మ్యాచ్‌కు బ్యాటింగ్ క్రమాన్ని పూర్తిగా మార్చాల్సిన పరిస్థితి జట్టు యాజమాన్యానికి ఎదురైంది. 

ఓపెనర్‌గా పంత్‌పై లక్నో దృష్టి

ఈ పరిస్థితుల్లో కెప్టెన్ రిషభ్ పంత్ ఓపెనర్‌గా ఇంగ్లిస్‌తో కలిసి బరిలోకి దిగే అవకాశాలు ఎక్కువగా కనిపిస్తున్నాయి. ఇప్పటివరకు ఐపీఎల్‌లో కేవలం ఆరు మ్యాచ్‌ల్లో మాత్రమే ఓపెనింగ్ చేసిన పంత్ 132 పరుగులు సాధించాడు. అతని అత్యధిక స్కోర్ 69 పరుగులు. 2026 ఏప్రిల్ 1న ఢిల్లీ క్యాపిటల్స్‌పై చివరిసారి ఓపెనింగ్‌కు వచ్చిన పంత్ కేవలం 7 పరుగులకే అవుటయ్యాడు. అంతకుముందు 2025లో గుజరాత్ టైటాన్స్‌పై ఓపెనింగ్ చేసి 18 బంతుల్లో 21 పరుగులు చేశాడు.

మరో ప్రత్యామ్నాయంగా అయుష్ బడోనీ పేరు కూడా వినిపిస్తోంది. అయితే ఓపెనర్‌గా అతని గణాంకాలు ఆశాజనకంగా లేవు. ఇప్పటివరకు మూడు మ్యాచ్‌ల్లో మాత్రమే ఓపెనింగ్ చేసిన బడోనీ మొత్తం 39 పరుగులు చేశాడు. ఇటీవల రాజస్థాన్ రాయల్స్‌పై డక్‌గా వెనుదిరిగిన అతడు, ఈ సీజన్ ఆరంభంలో పంజాబ్ కింగ్స్‌పై చేసిన 35 పరుగుల ఇన్నింగ్స్‌నే ఓపెనర్‌గా అతని అత్యుత్తమ ప్రదర్శనగా నిలిచింది.

ఇక మరో అవకాశం నికోలస్ పూరన్‌కు ఇవ్వాలని కూడా లక్నో ఆలోచించే అవకాశముంది. అయితే ఐపీఎల్ చరిత్రలో పూరన్ ఇప్పటివరకు ఒక్కసారి కూడా ఓపెనర్‌గా బ్యాటింగ్‌కు దిగలేదు. ఇప్పటికే కీలక ఆటగాళ్లు జట్టుకు దూరం కావడం, ప్లేఆఫ్ అవకాశాలు ముగియడంతో పంజాబ్ మ్యాచ్‌ను భవిష్యత్ కాంబినేషన్లను పరీక్షించే వేదికగా లక్నో వినియోగించుకునే అవకాశం కనిపిస్తోంది.