పాకిస్తాన్ క్రికెటర్లు పాంజీ స్కీమ్ మోసానికి బలి బాబర్ ఆజమ్ సహా పలువురికి భారీ నష్టం

మాజీ కెప్టెన్ బాబర్ ఆజమ్, వికెట్ కీపర్ బ్యాట్స్‌మన్ మొహమ్మద్ రిజ్వాన్, ఫాస్ట్ బౌలర్ షాహీన్ షా అఫ్రిది సహా పలువురు పాకిస్తాన్ క్రికెటర్లు పాంజీ స్కీమ్ మోసానికి బలయ్యారని పీటీఐ నివేదిక వెల్లడించింది. ఈ మోసంలో వారికి లక్షలాది నుంచి కోట్ల రూపాయల వరకు నష్టం వాటిల్లే అవకాశం ఉందని సమాచారం.

ఈ ఘటనపై ప్రస్తుతం పాకిస్తాన్ క్రికెట్ బోర్డు దర్యాప్తు చేస్తోంది. పీటీఐ పేర్కొన్న వర్గాల సమాచారం ప్రకారం, ఫఖర్ జమాన్, షాదాబ్ ఖాన్‌తో పాటు ఓ మాజీ పాకిస్తాన్ టెస్ట్ కెప్టెన్ సహా దాదాపు పన్నెండు మంది ప్రస్తుత ఆటగాళ్లు ఒక పాకిస్తాన్ వ్యాపారవేత్త వద్ద భారీగా పెట్టుబడులు పెట్టారు.

ఆ వ్యాపారవేత్త క్రికెట్ వర్గాల్లో మంచి గుర్తింపు పొందిన వ్యక్తిగా ఉండి, గతంలో పాకిస్తాన్ సూపర్ లీగ్ ఫ్రాంచైజీలతో కూడా సంబంధాలు కలిగి ఉన్నట్లు సమాచారం. అయితే ఇటీవల అతడు దేశం విడిచి వెళ్లిపోయినట్లు తెలుస్తోంది.

క్రికెటర్లు మరియు వారి సన్నిహితులు కలిసి పెట్టుబడి పెట్టిన మొత్తం ఒక బిలియన్ పాకిస్తాన్ రూపాయలను మించినట్లు అంచనా. కొందరు ఆటగాళ్లు తమ సొంత పొదుపు మాత్రమే కాకుండా కుటుంబ సభ్యులు, స్నేహితుల డబ్బును కూడా ఇందులో పెట్టారు.

మొదట కొన్ని నెలల పాటు ఆ వ్యాపారవేత్త క్రమం తప్పకుండా లాభాలను చెల్లించడంతో ఆటగాళ్లకు నమ్మకం పెరిగింది. కానీ అకస్మాత్తుగా చెల్లింపులు నిలిపివేశాడు. విషయం తెలుసుకోవడానికి ఆటగాళ్లు అతడిని సంప్రదించగా, తనకు భారీ నష్టాలు వచ్చాయని, ఆటగాళ్ల పెట్టుబడులు కూడా పోయాయని చెప్పాడట.

అనంతరం అతడు ఫోన్ కాల్స్, సందేశాలకు స్పందించడం మానేసి చివరకు దేశం విడిచి వెళ్లిపోయాడని వర్గాలు తెలిపాయి. ఇది పూర్తిగా విఫలమైన పాంజీ స్కీమ్ అని అధికారులు భావిస్తున్నారు. ఇప్పుడు ఈ ఆటగాళ్లు కోట్ల రూపాయల నష్టాన్ని ఎదుర్కొనే పరిస్థితిలో ఉన్నారు.

మరిన్నివార్తలుచదవండి: టీ20 వరల్డ్‌కప్‌కు ముందు సౌతాఫ్రికా జట్టులో మార్పులు.. రికెల్టన్, స్టబ్స్‌కు ఛాన్స్