ప్రారంభ మ్యాచ్‌లకు కమిన్స్ దూరం.. సన్‌రైజర్స్ హైదరాబాద్ భారీ షాక్

ఐపీఎల్ 2026 సీజన్ ప్రారంభంలో సన్‌రైజర్స్ హైదరాబాద్ (ఎస్‌ఆర్‌హెచ్)కు భారీ దెబ్బ తగిలింది. జట్టు కెప్టెన్ పాట్ కమిన్స్ మొదటి అర్ధభాగానికి దూరం కానున్నాడు. దీంతో జట్టు ప్రదర్శనపై ప్రభావం పడే అవకాశాలు ఉన్నాయి. ఇప్పటికే ఈ పరిస్థితిని ఊహించిన ఫ్రాంచైజీ, తాత్కాలిక కెప్టెన్‌గా ఇషాన్ కిషన్ ను నియమించింది.

ఇటీవల కమిన్స్ భారత్‌కు చేరుకుని జట్టుతో కలిసినా, మ్యాచ్ ఫిట్‌నెస్‌కు ఇంకా సమయం పడుతోంది. నివేదిక ప్రకారం, బెంగళూరులోని ఎం. చిన్నస్వామి స్టేడియం అతను లైట్ ఫిట్‌నెస్ డ్రిల్స్, తక్కువ తీవ్రతతో బౌలింగ్ ప్రాక్టీస్ చేశాడు. ఇది పాజిటివ్ సైన్ అయినప్పటికీ, అతని కంబ్యాక్ వెంటనే ఉండదు.

ఇటీవల ఒక స్పోర్ట్స్ పోడ్కాస్ట్‌లో మాట్లాడిన కమిన్స్ తన గాయంపై అప్డేట్ ఇచ్చాడు. వెన్ను గాయం నుంచి ఇంకా కోలుకుంటున్నానని, నెట్స్‌లో బౌలింగ్ ప్రారంభించానని తెలిపాడు. ఐపీఎల్ ప్రారంభ మ్యాచ్‌లకు అందుబాటులో ఉండనని, కానీ త్వరలోనే మళ్లీ మ్యాచ్‌లకు సిద్ధమవుతానని చెప్పాడు. దీంతో అతను ప్రారంభ దశ మ్యాచ్‌లకు దూరం అవుతాడని స్పష్టమైంది.

గాయాలతో సతమతమవుతున్న కమిన్స్ కెరీర్ దశ

గత ఏడాది జూలై నుంచి ఈ గాయంతో ఇబ్బంది పడుతున్న కమిన్స్, అప్పటి నుంచి కేవలం ఒక మ్యాచ్ మాత్రమే ఆడాడు. ఆ రిటర్న్ కూడా పూర్తిగా ఫిట్ కాకముందే రావడంతో మళ్లీ సమస్య పెరిగింది. యాషెస్ కోసం త్వరగా రిటర్న్ కావాలనే ప్రయత్నం అతని ఫిట్‌నెస్‌పై ప్రభావం చూపింది. దీంతో ఐసీసీ పురుషుల టీ20 ప్రపంచ కప్ 2026 కూడా మిస్ అయ్యాడు.

అయితే టోర్నమెంట్ రెండో అర్ధభాగంలో తిరిగి ఆడాలని కమిన్స్ ఆశాభావం వ్యక్తం చేశాడు. ప్రస్తుతం ప్రతి మూడు రోజులకు ఒకసారి బౌలింగ్ చేస్తూ ఫిట్‌నెస్ పెంచుకుంటున్నానని తెలిపాడు. టోర్నమెంట్ మధ్య నాటికి పూర్తిగా సిద్ధం కావాలని ప్లాన్ చేసినట్లు చెప్పాడు. దీంతో చివరి మ్యాచ్‌లు మరియు ప్లే ఆఫ్స్‌లో అతని సేవలు జట్టుకు దక్కే అవకాశాలు ఉన్నాయి.

ఇక ఇదే సమయంలో ఎస్‌ఆర్‌హెచ్‌కు మరో శుభవార్త లభించింది. శ్రీలంక క్రికెట్ నుంచి ఎన్‌ఓసీ పొందిన యువ పేసర్ ఈషాన్ మలింగా జట్టులో చేరాడు. గత ఐపీఎల్ సీజన్‌లో 7 మ్యాచ్‌ల్లో 13 వికెట్లు తీసి మంచి ప్రదర్శన కనబరిచాడు. అతను బౌలింగ్ విభాగంలో లోటును కొంతవరకు భర్తీ చేయగలిగినా, కమిన్స్ లాంటి కెప్టెన్‌ను భర్తీ చేయడం మాత్రం పెద్ద సవాలుగా మారింది.

ఐపీఎల్ 2026లో అత్యధిక సోషల్ మీడియా ఫాలోవర్లు ఉన్న కెప్టెన్లు జాబితా