బంగ్లాదేశ్‌ను తొలగించడంతో, స్కాట్లాండ్ 2026 టీ20 ప్రపంచ కప్ కోసం తమ జట్టును ప్రకటించింది.

అనూహ్య పరిణామాల మధ్య స్కాట్లాండ్‌ టీ20 ప్రపంచకప్‌–2026 టోర్నీకి అర్హత సాధించింది. భద్రతా కారణాలను చూపిస్తూ బంగ్లాదేశ్‌ తీసుకున్న నిర్ణయం, స్కాట్లాండ్‌కు అదృష్టంగా మారింది. ర్యాంకుల ఆధారంగా అంతర్జాతీయ క్రికెట్‌ మండలి (ఐసీసీ) స్కాట్లాండ్‌ జట్టును ప్రపంచకప్‌లోకి చేర్చింది.

ఈ నేపథ్యంలో స్కాట్లాండ్‌ క్రికెట్‌ బోర్డు ప్రపంచకప్‌ కోసం 15 మంది సభ్యులతో కూడిన జట్టును ప్రకటించింది. రిచీ బెరింగ్టన్‌ కెప్టెన్‌గా బాధ్యతలు నిర్వర్తించనుండగా, జైనుల్లా ఎహ్సాన్‌కు తొలిసారి జాతీయ జట్టులో అవకాశం లభించింది. అఫ్గనిస్తాన్‌లో జన్మించిన ఈ ఫాస్ట్‌ బౌలర్‌ ఇటీవలే స్కాట్లాండ్‌ తరఫున ఆడేందుకు అర్హత సాధించడంతో, జట్టులోకి ఎంపికయ్యాడు.

ఇదే జట్టులో న్యూజిలాండ్‌ మాజీ ఆటగాడు టామ్‌ బ్రూస్‌ కూడా స్థానం సంపాదించడం విశేషం. అతడి చేరికతో స్కాట్లాండ్‌ బ్యాటింగ్‌ విభాగం మరింత బలపడినట్లు కనిపిస్తోంది. 34 ఏళ్ల టామ్‌ బ్రూస్‌ న్యూజిలాండ్‌ తరఫున 17 టీ20 అంతర్జాతీయ మ్యాచ్‌లు ఆడిన అనుభవం కలిగిన ఆటగాడు.

టీ20 ప్రపంచకప్‌లో స్కాట్లాండ్‌ పాల్గొనడం ఇది ఏడోసారి. అయితే ఈసారి వారు నేరుగా అర్హత సాధించలేదు. బంగ్లాదేశ్‌ను ఐసీసీ టోర్నీ నుంచి తొలగించడంతో, ర్యాంకుల ఆధారంగా స్కాట్లాండ్‌కు అవకాశం దక్కింది. దీంతో అనూహ్యంగా ఈ యూరోపియన్‌ జట్టు ప్రపంచకప్‌ వేదికపై అడుగుపెట్టనుంది.

ఈ విషయంపై క్రికెట్‌ స్కాట్లాండ్‌ చీఫ్‌ ఎగ్జిక్యూటివ్‌ ట్రూడీ లిండ్‌బ్లేడ్‌ స్పందించారు. బంగ్లాదేశ్‌ జట్టు పట్ల తమకు పూర్తి సానుభూతి ఉందని ఆమె వెల్లడించారు. ఈఎస్‌పీఎన్‌ క్రిక్‌ఇన్ఫోతో మాట్లాడుతూ, “ఈ విధంగా ప్రపంచకప్‌లో పాల్గొనాలని మేము అసలు ఊహించలేదు. అర్హత పోటీల ద్వారా టోర్నీలోకి రావాలనే మా లక్ష్యం. కానీ అనుకోని పరిస్థితుల్లో మాకు అవకాశం వచ్చింది. ఏమైనప్పటికీ, బంగ్లాదేశ్‌ ఆటగాళ్లకు జరిగిన విషయంపై మేము బాధపడుతున్నాం” అని అన్నారు.

అయితే తమ జట్టు బలహీనమన్న అభిప్రాయాలను ట్రూడీ ఖండించారు. ప్రపంచ ర్యాంకింగ్స్‌లో స్కాట్లాండ్‌ ప్రస్తుతం 14వ స్థానంలో ఉందని ఆమె గుర్తు చేశారు. ఎలాంటి కష్టం లేకుండా ప్రపంచకప్‌కు వచ్చామన్న విమర్శలు సరైనవి కావని, గత కొన్ని సంవత్సరాలుగా తమ జట్టు నిరంతరం మెరుగైన ప్రదర్శన చేస్తూ ఈ స్థాయికి చేరుకుందని స్పష్టం చేశారు.

గమనించాల్సిన విషయం ఏమిటంటే, భారత్‌లో తమకు భద్రత లేదని పేర్కొంటూ బంగ్లాదేశ్‌ తమ మ్యాచ్‌లను శ్రీలంకకు మార్చాలని ఐసీసీని కోరింది. దీనికి ఐసీసీ అంగీకరించకపోవడంతో, చివరికి బంగ్లాదేశ్‌ను టోర్నీ నుంచి తొలగించి, ఆ స్థానంలో స్కాట్లాండ్‌ను చేర్చింది. భారత్‌, శ్రీలంక సంయుక్తంగా ఆతిథ్యమిచ్చే ఈ టీ20 ప్రపంచకప్‌ ఫిబ్రవరి 7 నుంచి మార్చి 8 వరకు జరగనుంది.

టీ20 ప్రపంచకప్‌–2026కు స్కాట్లాండ్‌ జట్టు:

రిచీ బెరింగ్టన్‌ (కెప్టెన్‌), టామ్‌ బ్రూస్‌, మాథ్యూ క్రాస్‌, బ్రాడ్లీ క్యూరీ, ఆలివర్‌ డేవిడ్సన్‌, క్రిస్‌ గ్రీవ్స్‌, జైనుల్లా ఎహ్సాన్‌, మైకేల్‌ జోన్స్‌, మైకేల్‌ లీస్‌క్‌, ఫిన్లే మెక్‌క్రీత్‌, బ్రాండన్‌ మెక్‌మల్లెన్‌, జార్జ్‌ మున్సే, సఫ్యాన్‌ షరీఫ్‌, మార్క్‌ వాట్‌, బ్రాడ్లీ వీల్‌.

ట్రావెలింగ్‌ రిజర్వ్‌లు:

జాస్పర్‌ డేవిడ్సన్‌, జాక్‌ జార్విస్‌, మెకెంజీ జోన్స్‌, క్రిస్‌ మెక్‌బ్రైడ్‌, చార్లీ టియర్‌.

మరిన్నివార్తలుచదవండి: టీ20 వరల్డ్ కప్ 2026పై పాకిస్తాన్‌కు ఐసీసీ హెచ్చరిక, బహిష్కరణ చేస్తే కఠిన ఆంక్షలు