టీమిండియా మిడిల్ఆర్డర్ స్టార్ బ్యాటర్ శ్రేయస్ అయ్యర్ మళ్లీ నీలి జెర్సీ ధరించాలంటే గట్టి పరీక్షను ఎదుర్కోవాల్సిన పరిస్థితి నెలకొంది. గాయం కారణంగా దాదాపు రెండు నెలలుగా జట్టుకు దూరమైన అయ్యర్, ఇప్పుడు రీఎంట్రీ కోసం శ్రమిస్తున్నాడు. అయితే న్యూజిలాండ్తో జరగబోయే వన్డే సిరీస్కు అతడిని ఎంపిక చేయాలంటే కేవలం బ్యాటింగ్ సరిపోదని, మైదానంలో పూర్తిస్థాయి ఫిట్నెస్ను నిరూపించాల్సిందేనని బీసీసీఐ స్పష్టం చేసింది.
ప్రస్తుతం బెంగళూరులోని నేషనల్ క్రికెట్ అకాడమీలో ఉన్న సెంటర్ ఆఫ్ ఎక్సలెన్స్లో శ్రేయస్ అయ్యర్ తన పునరావాస శిక్షణను కొనసాగిస్తున్నాడు. ఇప్పటికే బ్యాటింగ్, ఫీల్డింగ్కు సంబంధించిన నాలుగు సెషన్లను అతడు విజయవంతంగా పూర్తి చేశాడు.
అయితే తుది నిర్ణయం తీసుకునే ముందు, బీసీసీఐ మెడికల్ టీమ్ జనవరి 2, జనవరి 5 తేదీల్లో ప్రత్యేక మ్యాచ్ సిమ్యులేషన్ సెషన్లను నిర్వహించనుంది. నిజమైన మ్యాచ్ ఒత్తిడిలో అయ్యర్ శరీరం ఎలా స్పందిస్తుందో పరిశీలించిన తర్వాతే అతడికి ‘రిటర్న్ టు ప్లే’ సర్టిఫికేట్ ఇవ్వనున్నారు. ఈ రెండు సెషన్లలో ఫిట్నెస్ పరీక్షలో విఫలమైతే, కివీస్తో వన్డే సిరీస్కు దూరమయ్యే ప్రమాదం తప్పదు.
అసలు అయ్యర్కు గాయం ఎలా జరిగిందంటే… ఆస్ట్రేలియాతో జరిగిన వన్డే సిరీస్లో ఓ కీలక క్యాచ్ను అందుకునే ప్రయత్నంలో డైవ్ చేసిన సమయంలో అతడికి పొత్తికడుపులో ఉన్న స్లీన్కు తీవ్రమైన గాయం అయింది.
దాంతో లోపలి బ్లీడింగ్ కూడా ఏర్పడింది. ఈ గాయం కారణంగా శ్రేయస్ అయ్యర్ సుమారు ఆరు కిలోల బరువు తగ్గడంతో పాటు, అతడి కండరాల బలం కూడా గణనీయంగా తగ్గిపోయింది. అందుకే కేవలం గాయం మానిపోవడం సరిపోదని, అంతర్జాతీయ క్రికెట్ ఒత్తిడిని తట్టుకునే స్థాయిలో శరీర బలం తిరిగి రావాల్సిందేనని వైద్య నిపుణులు అభిప్రాయపడుతున్నారు.
న్యూజిలాండ్తో వన్డే సిరీస్ కోసం సెలక్షన్ కమిటీ జనవరి 3న సమావేశం కానుంది. అయ్యర్ తొలి మ్యాచ్ సిమ్యులేషన్ టెస్ట్ జనవరి 2న జరగనుండటంతో, దాని ఫలితాన్ని బట్టి సెలక్టర్లు తుది నిర్ణయం తీసుకునే అవకాశం ఉంది.
ఒకవేళ అయ్యర్ పూర్తిస్థాయి ఫిట్నెస్ సాధించలేదని తేలితే, అతడి స్థానంలో కర్ణాటక రన్ మెషిన్ దేవదత్ పడిక్కల్ ఎంపికయ్యే అవకాశాలు బలంగా కనిపిస్తున్నాయి. ప్రస్తుతం విజయ్ హజారే ట్రోఫీలో వరుసగా మూడు సెంచరీలు బాది అద్భుత ఫామ్లో ఉన్న పడిక్కల్, సెలక్టర్ల దృష్టిని ఆకర్షిస్తున్నాడు.
ఇక మరోవైపు శ్రేయస్ అయ్యర్ జట్టులోకి తిరిగొస్తే, రుతురాజ్ గైక్వాడ్కు అది ఇబ్బందికరంగా మారవచ్చు. దక్షిణాఫ్రికా సిరీస్లో అయ్యర్ గైర్హాజరీలో నాలుగో స్థానంలో బ్యాటింగ్ చేసిన గైక్వాడ్ సెంచరీతో ఆకట్టుకున్నాడు. కానీ అయ్యర్ తిరిగి వస్తే, సీనియారిటీ ఆధారంగా అతడికే ప్రాధాన్యం దక్కే అవకాశముంది. దీంతో గైక్వాడ్ మళ్లీ బెంచ్కే పరిమితమయ్యే పరిస్థితి ఏర్పడవచ్చు.
శ్రేయస్ అయ్యర్ కెరీర్కు ఈ న్యూజిలాండ్ సిరీస్ అత్యంత కీలకం. ఎందుకంటే ఫిబ్రవరిలో జరగనున్న టీ20 వరల్డ్ కప్ 2026 జట్టులో చోటు సంపాదించాలంటే, ఈ వన్డే సిరీస్లో అతడి ప్రదర్శన కీలక పాత్ర పోషించనుంది. అందుకే ఈ అగ్నిపరీక్షను అయ్యర్ ఎలా దాటుతాడన్నది ఇప్పుడు అందరి దృష్టిని ఆకర్షిస్తోంది.
మరిన్ని వార్తలు చదవండి: యాషెస్ ఓటమి తర్వాత బ్రెండన్ మెకల్లమ్ భవిష్యత్తుపై ఈసీబీ కీలక చర్చలు
