స్మృతి మంధాన పెళ్లిపై కొత్త తేదీ వదంతులు: మంధాన కుటుంబం తొలిసారి క్లారిటీ

భారత స్టార్ క్రికెటర్ స్మృతి మంధాన పెళ్లి ఆగిపోయిన వ్యవహారంపై సోషల్ మీడియాలో చర్చలు ఇంకా కొనసాగుతూనే ఉన్నాయి. పలాష్ ముచ్చల్ ఆమెను మోసం చేశాడని ఒక వర్గం సోషల్ మీడియాలో విమర్శలు చేస్తుండగా, మరికొందరు అయితే ఇద్దరి మధ్య ఎలాంటి సమస్య లేదని వాదిస్తున్నారు.

ఇలాంటి పరిస్థితిలో, పలాష్ ముచ్చల్ తల్లి అమితా ముచ్చల్ ఇటీవల స్పందిస్తూ, “స్మృతి–పలాష్ ఇద్దరూ మానసికంగా కాస్త బాధలో ఉన్నారు. త్వరలోనే అన్నీ సవ్యంగా సర్దుకుంటాయి. వారి వివాహం తప్పకుండా జరుగుతుంది” అని హిందుస్తాన్ టైమ్స్‌కు వెల్లడించింది. దీంతో స్మృతి త్వరలో పెళ్లి పీటలెక్కనుందనే ఆశాభావం అభిమానుల్లో పెరిగింది.

కొత్త తేదీ ఇదేనంటూ ప్రచారం

ఈ నేపథ్యంలో డిసెంబర్ 7నే స్మృతి–పలాష్ వివాహానికి కొత్త తేదీగా నిర్ణయించారని సోషల్ మీడియాలో ప్రచారం మొదలైంది. వీరిద్దరూ అదే రోజు పెళ్లి బంధంలో అడుగుపెడతారన్న వార్తలు వైరల్ అయ్యాయి.

ఇక ఈ ప్రచారంపై స్మృతి మంధాన సోదరుడు శ్రావణ్ మంధాన తొలిసారి స్పందించారు.
హిందుస్తాన్ టైమ్స్‌తో మాట్లాడుతూ ఆయన పేర్కొన్నది:
“ఈ రూమర్లు ఎక్కడి నుంచి వస్తున్నాయో మాకు అసలు తెలియదు. పెళ్లి ఇంకా వాయిదా పడినట్టే ఉంది. స్మృతి–పలాష్ పెళ్లి గురించి ఇప్పటి వరకు మా కుటుంబం ఎలాంటి కొత్త నిర్ణయం తీసుకోలేదు” అని స్పష్టం చేశారు.

2019 నుంచి ప్రేమలో

సంగీత దర్శకుడు పలాష్ ముచ్చల్‌తో స్మృతి మంధాన 2019 నుంచి ప్రేమలో ఉన్న సంగతి తెలిసిందే. గత ఏడాది తమ సంబంధాన్ని అధికారికంగా ప్రకటించిన ఈ జంట, ఇటీవలే నవంబర్ 23న పెళ్లి చేసుకోబోతున్నట్లు ప్రకటించింది.
అదే ప్రకారం హల్దీ, మెహందీ, సంగీత్ వేడుకలు కూడా అంగరంగ వైభవంగా జరిగాయి. అయితే పెళ్లికి కొన్ని గంటల ముందు అనూహ్యంగా వివాహం వాయిదా పడింది.

స్మృతి మంధాన తండ్రి శ్రీనివాస్ ఛాతీ నొప్పితో ఆసుపత్రిలో చేరగా, వరుడు పలాష్ కూడా ఆరోగ్య సమస్యలతో ఆసుపత్రికి వెళ్లాల్సి వచ్చింది.

వివాదానికి కారణమైన చాట్ లీక్

ఇంతలో ఒక యువతి, పలాష్ తనతో చాట్ చేశాడని, అందులోని వ్యక్తిగత విషయాలను బయటపెట్టింది.
ఇది పెళ్లికి ముందు రోజున స్మృతి కుటుంబానికి తెలిసి, స్మృతి తండ్రి పలాష్‌తో వాగ్వాదం జరిగి, ఆ ఉద్రిక్తత మధ్య గుండెపోటుకు గురయ్యాడని సోషల్ మీడియాలో వార్తలు వ్యాపించాయి. ఈ విషయంపై మంధాన కుటుంబం గానీ, ముచ్చల్ కుటుంబం గానీ మొదట ఎలాంటి స్పందన ఇవ్వలేదు.

దీంతో అనుమానాలు మరింత పెరిగాయి. అయినప్పటికీ పలాష్ తల్లి మాత్రమే “పెళ్లి త్వరలోనే జరుగుతుంది” అని చెప్పడం గమనార్హం.

అయితే ఇప్పటివరకు మౌనం పాటించిన మంధాన కుటుంబం చివరకు స్పందిస్తూ, పెళ్లికి కొత్త తేదీ ఎప్పుడూ ఖరారు చేయలేదని స్పష్టంగా ప్రకటించడం ఈ అంశం పై పుట్టిన వదంతులకు ఒక పెద్ద సమాధానంగా మారింది.

మరిన్ని వార్తలు చదవండి: విజయ్ హజారే 2025: 14 ఏళ్ల తర్వాత సీనియర్ స్టార్‌ రీఎంట్రీ – డొమెస్టిక్ వన్డేలకు పెద్ద అప్‌డేట్