వరల్డ్ కప్ హీరోకి భారీ ఎదురుదెబ్బ.. అవినీతి ఆరోపణలతో కేసులు నమోదు

శ్రీలంక క్రికెట్ చరిత్రలో చిరస్థాయిగా నిలిచిపోయిన దిగ్గజ ఆటగాడు అర్జున రణతుంగ ప్రస్తుతం తీవ్ర సమస్యల్లో చిక్కుకున్నాడు. మంత్రిగా పనిచేసిన సమయంలో భారీ అవినీతికి పాల్పడ్డాడనే ఆరోపణలతో అతడిపై కేసులు నమోదు కాగా, త్వరలోనే అరెస్టు చేసే అవకాశం ఉందని శ్రీలంక పోలీసులు సంకేతాలు ఇచ్చారు.

అర్జున రణతుంగ అంటే క్రికెట్ అభిమానులకు ప్రత్యేకమైన గుర్తింపు. లెఫ్ట్ హ్యాండ్ బ్యాటర్‌గా అంతర్జాతీయ క్రికెట్‌లో శ్రీలంక తరఫున తనదైన ముద్ర వేశాడు. ముఖ్యంగా 1996 వన్డే ప్రపంచకప్‌లో కెప్టెన్‌గా బాధ్యతలు నిర్వహిస్తూ, బలమైన ఆస్ట్రేలియా జట్టును ఓడించి శ్రీలంకకు చారిత్రాత్మక వరల్డ్ కప్ అందించాడు. ఆ విజయంతో రణతుంగ పేరు ప్రపంచ క్రికెట్‌లో మరింత ఎత్తుకు చేరింది.

క్రికెట్‌కు వీడ్కోలు పలికిన తర్వాత అర్జున రణతుంగ రాజకీయాల్లో అడుగుపెట్టాడు. 2015 నుంచి 2017 వరకు పోర్ట్స్ అండ్ షిప్పింగ్ శాఖ మంత్రిగా, 2017 నుంచి 2018 వరకు పెట్రోలియం వనరుల అభివృద్ధి శాఖ మంత్రిగా, అలాగే 2018 నుంచి 2019 వరకు రవాణా మరియు విమానయాన శాఖ మంత్రిగా పనిచేశాడు. అయితే పెట్రోలియం శాఖ మంత్రిగా ఉన్న సమయంలో జరిగిన లావాదేవీల్లో పెద్ద ఎత్తున అవినీతి జరిగినట్లు ఆరోపణలు వెలుగులోకి వచ్చాయి.

×

Arjuna Ranatunga Batsman

ఈ కేసు విచారణలో భాగంగా అవినీతి నిరోధక శాఖ అధికారులు సోమవారం కొలంబో మెజిస్ట్రేట్ అసంగ బొడరగమా ముందు తమ వాదనలు వినిపించారు. మొత్తం 27 కొనుగోళ్లలో సుమారు 800 మిలియన్ శ్రీలంకన్ రూపాయలు మేర అక్రమాలు జరిగాయని వారు కోర్టుకు తెలిపారు. భారత కరెన్సీలో ఇది దాదాపు 23.5 కోట్ల రూపాయలుగా అంచనా వేస్తున్నారు.

ఈ కేసులో ఇప్పటికే అర్జున రణతుంగ సోదరుడు ధమ్మిక రణతుంగను పోలీసులు అరెస్టు చేశారు. ఆయన అప్పట్లో సిలోన్ పెట్రోలియం కార్పొరేషన్ చైర్మన్‌గా పనిచేశారు. అయితే కొద్దిసేపటికే ధమ్మికకు బెయిల్ లభించింది. ధమ్మికకు శ్రీలంక పౌరసత్వంతో పాటు అమెరికా పౌరసత్వం కూడా ఉండటం గమనార్హం.

×

Sri Lanka Founded: 1975

The Sri Lanka National Cricket Team, known as the Lions, is a team that has made significant contributions to the game of cricket.

ఇక అర్జున రణతుంగ ప్రస్తుతం విదేశాల్లో ఉన్నాడని, స్వదేశానికి తిరిగి రాగానే అతడిని అరెస్టు చేయనున్నట్లు అవినీతి నిరోధక శాఖ అధికారులు స్పష్టం చేశారు. ఇదిలా ఉండగా, రణతుంగ కుటుంబానికి సంబంధించిన మరో అంశం కూడా చర్చనీయాంశంగా మారింది. అర్జున రణతుంగ మరో సోదరుడు, పర్యాటక శాఖ మాజీ మంత్రి ప్రసన్న రణతుంగను గత నెలలో ఫ్రాడ్ కేసులో పోలీసులు అరెస్టు చేశారు.

క్రికెట్‌లో దేశానికి గర్వకారణమైన వ్యక్తిగా నిలిచిన అర్జున రణతుంగ జీవితం ఇప్పుడు రాజకీయ వివాదాలు, అవినీతి ఆరోపణలతో మలుపు తిరగడం శ్రీలంకలో పెద్ద చర్చకు దారితీస్తోంది.

మరిన్ని వార్తలు చదవండి: IPL 2026 Mini Auction: జట్లవారీగా పర్స్ వాల్యూ, ఖాళీల లిస్ట్ ఇదే