బిగ్ బాష్ లీగ్‌లో స్టీవ్ స్మిత్ విధ్వంసం.. సిడ్నీ సిక్సర్స్‌కు వరుసగా 4వ విజయం

బిగ్ బాష్ లీగ్‌ 2025 సీజన్‌లో ఆస్ట్రేలియా స్టార్ బ్యాటర్ స్టీవ్ స్మిత్ విధ్వంసం సృష్టించాడు. సిడ్నీ సిక్సర్స్‌కు ప్రాతినిథ్యం వహిస్తున్న స్మిత్‌.. శుక్రవారం సిడ్నీ థండర్‌తో జరిగిన కీలక మ్యాచ్‌లో అద్భుతమైన శతకంతో అభిమానులను ఉర్రూతలూగించాడు. 190 పరుగుల లక్ష్యాన్ని ఛేదించే క్రమంలో ఓపెనర్‌గా బరిలోకి దిగిన స్మిత్‌.. ప్రత్యర్థి బౌలర్లపై పూర్తిస్థాయి ఆధిపత్యం చెలాయించాడు.

సిడ్నీ క్రికెట్ గ్రౌండ్‌లో బౌండరీల వర్షం కురిపిస్తూ మ్యాచ్‌ను ఏకపక్షంగా మార్చేశాడు. ముఖ్యంగా థండర్ బౌలర్ రైన్ హాడ్లీని స్మిత్ పూర్తిగా లక్ష్యంగా చేసుకున్నాడు. హాడ్లీ వేసిన 12వ ఓవర్‌లో వరుసగా నాలుగు సిక్సర్లు, ఒక ఫోర్ బాది ఏకంగా 32 పరుగులు రాబట్టాడు. ఈ దూకుడైన బ్యాటింగ్‌తో కేవలం 41 బంతుల్లోనే తన నాలుగో బిగ్ బాష్ లీగ్ సెంచరీని పూర్తి చేశాడు.

స్మిత్ మొత్తం 5 ఫోర్లు, 9 సిక్సర్లతో అచ్చంగా 100 పరుగులు చేసి ఔటయ్యాడు. అతడికి తోడుగా బాబర్ ఆజం కూడా కీలక ఇన్నింగ్స్ ఆడాడు. బాబర్ 39 బంతుల్లో 47 పరుగులు చేసి జట్టు విజయంలో భాగమయ్యాడు. వీరి జోరుతో సిడ్నీ సిక్సర్స్‌ 17.2 ఓవర్లలోనే కేవలం 5 వికెట్లు మాత్రమే కోల్పోయి లక్ష్యాన్ని చేధించింది. ఇది సిక్సర్స్‌కు వరుసగా నాలుగో విజయం కావడం విశేషం.

వార్నర్ శతకం వృథా

ఇదే మ్యాచ్‌లో సిడ్నీ థండర్ కెప్టెన్, ఆస్ట్రేలియా మాజీ ఓపెనర్ డేవిడ్ వార్నర్ కూడా అద్భుత శతకం సాధించాడు. 65 బంతుల్లో 11 ఫోర్లు, 4 సిక్సర్లతో 110 పరుగులు చేసి చివరి వరకు అజేయంగా నిలిచాడు. అయితే మిగతా బ్యాటర్లు సరైన సహకారం అందించకపోవడంతో థండర్ భారీ స్కోర్ నమోదు చేయలేకపోయింది.

తొలుత బ్యాటింగ్ చేసిన సిడ్నీ థండర్ నిర్ణీత 20 ఓవర్లలో 6 వికెట్ల నష్టానికి 189 పరుగులు మాత్రమే చేసింది. సిడ్నీ సిక్సర్స్ బౌలర్లలో సామ్ కర్రాన్ మూడు వికెట్లు పడగొట్టగా, ఎడ్వర్డ్స్‌, స్టార్క్‌, బెన్ మనేంటి తలా ఒక వికెట్ సాధించారు. వార్నర్‌కు ఈ సీజన్‌లో ఇది రెండో శతకం కావడం మరో విశేషం.

స్మిత్ సరికొత్త రికార్డులు

ఈ మ్యాచ్‌లో సెంచరీతో మెరిసిన స్టీవ్ స్మిత్ పలు అరుదైన రికార్డులను తన ఖాతాలో వేసుకున్నాడు. బిగ్ బాష్ లీగ్ చరిత్రలో అత్యంత వేగంగా సెంచరీ చేసిన రెండో ఆటగాడిగా స్మిత్ నిలిచాడు. ఈ జాబితాలో మిచెల్ ఓవెన్, క్రెయిగ్ సిమన్స్ అగ్రస్థానంలో ఉన్నారు. వీరిద్దరూ కేవలం 39 బంతుల్లోనే సెంచరీ మార్క్‌ను అందుకున్నారు.

అదే విధంగా బిగ్ బాష్ లీగ్‌లో అత్యధిక సెంచరీలు చేసిన ఆటగాడిగా కూడా స్మిత్ (4 సెంచరీలు) రికార్డు నెలకొల్పాడు. ఇంతకుముందు ఈ ఘనత డేవిడ్ వార్నర్, బెన్ మెక్‌డెర్మాట్‌ల పేరిట ఉండేది. వారు ముగ్గురు సెంచరీలు చేయగా, తాజా శతకంతో స్మిత్ వారిద్దరినీ వెనక్కి నెట్టి టాప్‌లో నిలిచాడు.

మరిన్ని వార్తలు చదవండి: షాహీన్ అఫ్రిదీ గాయం నుండి కోలుకుని T20 వరల్డ్ కప్ 2026 కోసం సిద్ధం