టాలీవుడ్ నటులు రంగంలోకి.. ఆరు జట్లతో TPL క్రికెట్ లీగ్

హైదరాబాద్ వేదికగా టాలీవుడ్ ప్రో లీగ్ (TPL) ప్రారంభం కానుంది. EBG గ్రూప్ ఆధ్వర్యంలో ఈ సరికొత్త క్రికెట్ లీగ్‌ను నిర్వహించనున్నారు. ఆదివారం (డిసెంబర్ 21) మాదాపూర్‌లోని HICC వేదికగా నిర్వహించిన ప్రారంభోత్సవ కార్యక్రమాన్ని ప్రముఖ నిర్మాత దిల్ రాజు అధికారికంగా ప్రారంభించారు.

టాలీవుడ్ ప్రో లీగ్‌కు హానరరీ చైర్మన్‌గా దిల్ రాజు వ్యవహరించనున్నారు. ఈ కార్యక్రమానికి ముఖ్య అతిథులుగా మాజీ క్రికెట్ దిగ్గజాలు కపిల్ దేవ్, వీరేంద్ర సెహ్వాగ్, సురేశ్ రైనా హాజరయ్యారు. ఈ లీగ్‌లో టాలీవుడ్‌కు చెందిన సెలబ్రిటీలు ఆటగాళ్లుగా పాల్గొననుండగా, జట్లకు నిర్మాతలు యజమానులుగా వ్యవహరించనున్నారు.

మొత్తం ఆరు జట్లతో ఫ్రాంచైజీ లీగ్‌గా TPL‌ను నిర్వహించనున్నారు. ప్రతి ఏడాది రెండు సీజన్లు నిర్వహించే ప్రణాళిక ఉందని నిర్వాహకులు తెలిపారు. క్రికెట్‌తో పాటు వినోద కార్యక్రమాలు కూడా ఉండనున్నాయని దిల్ రాజు వెల్లడించారు. ప్రత్యేక ఆకర్షణగా డిజిటల్ కంటెంట్, ఫ్యాన్ జోన్లు ఏర్పాటు చేయనున్నట్లు తెలిపారు. టాలీవుడ్‌లో ఐక్యతను పెంపొందించడమే లక్ష్యంగా ఈ లీగ్‌ను నిర్వహిస్తున్నామని చెప్పారు.

సినీ పరిశ్రమలోని ప్రతి వృత్తికి ఈ లీగ్‌లో ప్రాతినిధ్యం ఉంటుందని తెలిపారు. ‘అలై బలై – ఇన్‌క్లూజన్’ కాన్సెప్ట్ ఈ లీగ్ ప్రత్యేకతగా నిలుస్తుందని పేర్కొన్నారు. టాలీవుడ్ సంక్షేమం కోసం ఆదాయంలో కొంత భాగాన్ని వినియోగించడంతో పాటు, జాతీయ స్థాయిలో గుర్తింపు సాధించడమే లక్ష్యంగా TPL‌ను నిర్వహిస్తున్నట్లు చెప్పారు. సినిమా, క్రీడలు ఒకే వేదికపై కలిసేలా టాలీవుడ్ ప్రో లీగ్ ఉండబోతోందని ఈ సందర్భంగా దిల్ రాజు పేర్కొన్నారు. ఈ కార్యక్రమానికి దిల్ రాజు, అనిల్ రావిపూడి, బన్నీ వాసు తదితర ప్రముఖులు హాజరయ్యారు.

టెక్నీషియన్ల కల నిజమయ్యే సందర్భం: సెహ్వాగ్

ఈ కార్యక్రమానికి హాజరైన వీరేంద్ర సెహ్వాగ్ మాట్లాడుతూ, చాలామందికి క్రికెట్ అంటే ఎంతో ఇష్టమని అన్నారు. గొప్పగా ఆడాలని, టీమ్ ఇండియాకు ప్రాతినిధ్యం వహించాలని కలలు కనే వారు కూడా చాలామంది ఉంటారని చెప్పారు. సినీ స్టార్లు, టెక్నీషియన్లతో కలిసి ఇలాంటి లీగ్ ఏర్పాటు చేయడం, అందులో పాల్గొనడం నిజంగా గొప్ప విషయమని అభిప్రాయపడ్డారు. నిత్యం షూటింగులతో బిజీగా ఉండే టెక్నీషియన్లకు ఇది కేవలం ఒక రిలీఫ్ మాత్రమే కాదు, వారి కల నెరవేరే అరుదైన అవకాశం కూడా అని సెహ్వాగ్ వ్యాఖ్యానించారు.

మరిన్ని వార్తలు చదవండి: IND vs PAK U19 ఫైనల్‌లో ఉద్రిక్తత.. పాక్ పేసర్‌కు చుక్కలు చూపించిన వైభవ్ సూర్యవంశీ