ఉసేన్ బోల్ట్ క్రికెట్‌లోకి రీఎంట్రీ? 2028 ఒలింపిక్స్‌పై సంచలన సంకేతాలు

ప్రఖ్యాత స్ప్రింటర్ ఉసేన్ బోల్ట్ మరోసారి ప్రొఫెషనల్ క్రీడల్లోకి తిరిగి రావాలనే ఆలోచనలో ఉన్నట్లు వెల్లడించాడు. అయితే ఈసారి అతని రీటర్న్ అథ్లెటిక్స్ ట్రాక్‌పై కాకుండా క్రికెట్ మైదానంలో ఉండొచ్చన్నది విశేషం. 2028లో లాస్ ఏంజెలెస్‌లో జరగనున్న ఒలింపిక్స్‌లో క్రికెట్ 128 ఏళ్ల తర్వాత మళ్లీ చోటు దక్కించుకోనుండటంతో, ఈ లెజెండరీ అథ్లెట్ క్రికెట్ ద్వారా ఒలింపిక్స్‌కు రీటర్న్ ఇవ్వాలనే ఆసక్తి చూపిస్తున్నాడు.

2017లో అథ్లెటిక్స్‌కు వీడ్కోలు పలికిన ఉసేన్ బోల్ట్, తన కెరీర్‌లో ఎనిమిది ఒలింపిక్ స్వర్ణ పతకాలు గెలుచుకొని ప్రపంచంలోనే అత్యంత విజయవంతమైన స్ప్రింటర్‌గా నిలిచాడు. కరీబియన్ ప్రాంతంలో పెరిగిన బోల్ట్‌కు చిన్ననాటి నుంచే క్రికెట్‌పై ఆసక్తి ఎక్కువ. ఒక దశలో ఫాస్ట్ బౌలర్ కావాలన్న కల కూడా అతనికి ఉండేది. అథ్లెటిక్స్‌లో అపూర్వ విజయాలు సాధించిన తర్వాత కూడా బోల్ట్ క్రికెట్‌తో తన అనుబంధాన్ని కొనసాగించాడు. ఇటీవల ఐసీసీ టీ20 వరల్డ్ కప్ 2024కి బ్రాండ్ అంబాసిడర్‌గా కూడా వ్యవహరించాడు.

కొత్త క్రీడలో ఒలింపిక్స్ రీటర్న్‌పై సంకేతాలు

ఎస్క్వైర్ మ్యాగజైన్‌కు ఇచ్చిన ఇంటర్వ్యూలో ఉసేన్ బోల్ట్ తన రిటైర్డ్ జీవితాన్ని ఆనందిస్తున్నానని, అయితే జమైకా క్రికెట్ అధికారులు ఒలింపిక్స్ కోసం సంప్రదిస్తే తిరిగి ఆడేందుకు సిద్ధమేనని తెలిపాడు. ప్రస్తుతం తన వయసు 39 అయినప్పటికీ, పిలుపు వస్తే సవాల్‌కు రెడీగా ఉంటానని చెప్పాడు.
“నేను సంతోషంగా రిటైర్డ్ జీవితాన్ని గడుపుతున్నాను. చాలా కాలంగా క్రికెట్ ఆడలేదు. కానీ వాళ్లు పిలిస్తే మాత్రం తప్పకుండా సిద్ధంగా ఉంటాను” అని బోల్ట్ పేర్కొన్నాడు.

2014లో ప్యూమా ఫేస్-ఆఫ్ ఛాలెంజ్‌లో భాగంగా జరిగిన ఒక ఎగ్జిబిషన్ మ్యాచ్‌లో భారత స్టార్ యువరాజ్ సింగ్‌ను బోల్ట్ ఎదుర్కొన్నాడు. ఆ మ్యాచ్‌లో చివరి బంతికి బోల్ట్ సిక్సర్ కొట్టి ప్రేక్షకులను ఆశ్చర్యపరిచాడు.

“నా క్రికెట్ కోచ్ చెప్పకపోయి ఉంటే…”

బోల్ట్ తన బాల్య దశలో క్రికెట్‌నే తొలి ప్రేమగా పేర్కొన్నాడు. తన క్రికెట్ కోచ్ అథ్లెటిక్స్ ప్రయత్నించమని చెప్పకపోయి ఉంటే, తాను తప్పకుండా క్రికెటర్‌గానే కొనసాగేవాడినని అన్నాడు.
“నాకు ఖచ్చితంగా క్రికెటర్ కావాలనే కోరిక ఉండేది. మా నాన్నకు క్రికెట్ అంటే చాలా ఇష్టం. చిన్నప్పటి నుంచి నాకు తెలిసింది క్రికెట్ మాత్రమే. కొద్దిగా ఫుట్‌బాల్ ఆడేవాడిని కానీ ఎక్కువగా క్రికెట్‌నే” అని గత అక్టోబర్‌లో పీటీఐకి ఇచ్చిన ఇంటర్వ్యూలో చెప్పాడు.

అలాగే తన కెరీర్ మలుపు గురించి వివరిస్తూ, “నేను ఫాస్ట్ బౌలర్‌గా ఉండేవాడిని. రన్-అప్‌లో నేను వేగంగా పరిగెత్తడం చూసిన నా క్రికెట్ కోచ్ ‘నువ్వు ట్రాక్ అండ్ ఫీల్డ్ ప్రయత్నించవచ్చు కదా’ అన్నాడు. అలా అథ్లెటిక్స్‌లోకి వచ్చాను. అప్పుడు నాకు నిజంగా టాలెంట్ ఉందని తెలిసింది. అక్కడినుంచి అదే కొనసాగింది” అని బోల్ట్ గుర్తు చేసుకున్నాడు.

క్రికెట్ ఒలింపిక్స్‌లోకి తిరిగి వస్తున్న ఈ సమయంలో ఉసేన్ బోల్ట్ లాంటి లెజెండ్ రీటర్న్ చేస్తే, అది క్రీడా ప్రపంచంలో ఓ చారిత్రాత్మక ఘట్టంగా నిలవడం ఖాయం.

మరిన్ని వార్తలు చదవండి: టీ20 వరల్డ్ కప్ 2026 వివాదం: బంగ్లాదేశ్‌కు మద్దతుగా ICCకి పాకిస్థాన్ లేఖ