Virat Kohli: సచిన్ సరసన నిలిచిన కోహ్లి.. వన్డేల్లో మరో గొప్ప రికార్డ్

టీమిండియా సూపర్‌స్టార్ విరాట్ కోహ్లి మరో అరుదైన ఘనతను తన ఖాతాలో వేసుకున్నాడు. భారత జట్టు తరపున అత్యధిక వన్డే మ్యాచ్‌లు ఆడిన ఆటగాళ్ల జాబితాలో ఐదో స్థానానికి చేరాడు. వడోదర వేదికగా న్యూజిలాండ్‌తో జరుగుతున్న తొలి వన్డేలో కోహ్లి ఈ మైలురాయిని అందుకున్నాడు.

ఈ మ్యాచ్‌తో కోహ్లి వన్డేల్లో 309వ సారి భారత జెర్సీ ధరించాడు. దీంతో ఇప్పటివరకు ఈ స్థానం లో ఉన్న మాజీ కెప్టెన్ సౌరవ్ గంగూలీ (308 వన్డేలు) రికార్డును అతను అధిగమించాడు. గంగూలీ తన వన్డే కెరీర్‌లో 308 మ్యాచ్‌లు ఆడి 11,221 పరుగులు సాధించాడు.

భారత క్రికెట్ చరిత్రలో అత్యధిక వన్డేలు ఆడిన ఆటగాళ్ల జాబితాలో లెజెండరీ క్రికెటర్ సచిన్ టెండూల్కర్ అగ్రస్థానంలో కొనసాగుతున్నాడు. సచిన్ మొత్తం 463 వన్డే మ్యాచ్‌లు ఆడడమే కాకుండా, అంతర్జాతీయ వన్డేల్లో అత్యధిక పరుగులు (18,426) చేసిన బ్యాటర్‌గా ఇప్పటికీ టాప్‌లో ఉన్నాడు.

భారత్ తరపున అత్యధిక వన్డేలు ఆడిన ఆటగాళ్లు:

• సచిన్ టెండూల్కర్ – 463

• ఎంఎస్ ధోని – 347

• రాహుల్ ద్రవిడ్ – 340

• మొహమ్మద్ అజారుద్దీన్ – 334

• విరాట్ కోహ్లి – 309

• సౌరవ్ గంగూలీ – 308

వన్డే కింగ్ కోహ్లి

ప్రపంచ వన్డే క్రికెట్ చరిత్రలో విరాట్ కోహ్లి తన పేరును స్వర్ణాక్షరాలతో లిఖించుకున్నాడు. వన్డేల్లో అత్యధిక సెంచరీలు సాధించిన ఆటగాడిగా కోహ్లి అగ్రస్థానంలో కొనసాగుతున్నాడు. ఇప్పటివరకు అతను 53 శతకాలు బాదేశాడు. అంతేకాదు, వన్డేల్లో అత్యధిక పరుగులు చేసిన బ్యాటర్ల జాబితాలో 14,557 పరుగులతో రెండో స్థానంలో ఉన్నాడు.

మరిన్ని వార్తలు చదవండి: వీడియో: గాయంతో కూలిపోయిన రిషభ్ పంత్‌ను పట్టించుకోని గౌతమ్ గంభీర్, శుభ్‌మన్ గిల్