మనవ్ సుతార్ ఎవరు? భారత టెస్టు జట్టులో చోటు దక్కించుకున్న రాజస్థాన్ ఆల్‌రౌండర్

భారత్ తరఫున టెస్టు క్రికెట్‌లో అరంగేట్రం చేసిన తాజా ఆటగాడిగా మనవ్ సుతార్ నిలిచాడు. జూన్ 6న ముల్లాన్‌పూర్ వేదికగా ఆఫ్ఘానిస్తాన్‌తో జరుగుతున్న ఏకైక టెస్టు మ్యాచ్‌కు అతడిని తుది జట్టులో ఎంపిక చేశారు. రాజస్థాన్‌కు చెందిన ఈ ఆల్‌రౌండర్, హర్ష్ దూబేను వెనక్కి నెట్టి జట్టులో చోటు దక్కించుకుని భారత్ తరఫున టెస్టులు ఆడిన 319వ క్రికెటర్‌గా చరిత్రలో నిలిచాడు.

మ్యాచ్ ప్రారంభానికి ముందు చైనామన్ స్పిన్నర్ కుల్దీప్ యాదవ్ చేతుల మీదుగా సుతార్ తన తొలి టెస్టు క్యాప్ అందుకున్నాడు. ఈ సందర్భంగా యువ స్పిన్నర్‌కు కుల్దీప్ ప్రోత్సాహకరమైన సూచనలు చేశాడు.

మూడో స్థానంలో సాయి సుదర్శన్‌కు అవకాశం

ఈ మ్యాచ్‌లో భారత్ బలమైన జట్టుతో బరిలోకి దిగింది. ప్రధాన కోచ్ గౌతమ్ గంభీర్ ముందుగానే సూచించినట్లుగా సాయి సుదర్శన్ మూడో స్థానంలో బ్యాటింగ్‌కు వచ్చాడు. టాస్ గెలిచిన కెప్టెన్ శుభ్‌మన్ గిల్ ముందుగా బ్యాటింగ్ ఎంచుకున్నాడు. జట్టులో కేఎల్ రాహుల్, యశస్వి జైస్వాల్, రిషభ్ పంత్, వాషింగ్టన్ సుందర్, కుల్దీప్ యాదవ్, మహ్మద్ సిరాజ్, ప్రసిద్ధ్ కృష్ణ వంటి ఆటగాళ్లు చోటు దక్కించుకున్నారు.

టీ20 కెప్టెన్సీలో మార్పు? సూర్య స్థానంలో శ్రేయస్ అయ్యర్‌కు అవకాశం!

మనవ్ సుతార్ ఎవరు?

మనవ్ సుతార్ ఫస్ట్‌క్లాస్ క్రికెట్ ప్రయాణం 2022 ఫిబ్రవరిలో ప్రారంభమైంది. ఆంధ్రప్రదేశ్‌పై జరిగిన మ్యాచ్ ద్వారా అతడు రాజస్థాన్ తరఫున అరంగేట్రం చేశాడు. అప్పటి నుంచి దేశీయ క్రికెట్‌లో అత్యంత నిలకడగా రాణిస్తున్న స్పిన్ ఆల్‌రౌండర్లలో ఒకడిగా గుర్తింపు పొందాడు. ఇప్పటివరకు 29 ఫస్ట్‌క్లాస్ మ్యాచ్‌లు ఆడిన సుతార్ 129 వికెట్లు పడగొట్టాడు. అంతేకాకుండా ఓవర్‌కు కేవలం 2.94 పరుగుల ఎకానమీతో ప్రత్యర్థి బ్యాటర్లను కట్టడి చేశాడు.

ఈ ఏడాది జనవరిలో హిమాచల్ ప్రదేశ్‌పై జరిగిన మ్యాచ్‌లో సుతార్ అద్భుతమైన ఆల్‌రౌండ్ ప్రదర్శన కనబరిచాడు. రాజస్థాన్ తొలి ఇన్నింగ్స్‌లో 120 పరుగులతో శతకం సాధించిన అతడు, మ్యాచ్ మొత్తంలో ఏడు వికెట్లు కూడా తన ఖాతాలో వేసుకున్నాడు. బ్యాటింగ్, బౌలింగ్ రెండింటిలోనూ జట్టుకు ఉపయోగపడగల సామర్థ్యం అతడిని ప్రత్యేక ఆటగాడిగా నిలబెట్టింది.

బౌలింగ్‌తో పాటు దిగువ వరుస బ్యాటర్‌గా కూడా సుతార్ మంచి ప్రతిభ చూపించాడు. ఫస్ట్‌క్లాస్ క్రికెట్‌లో 25.54 సగటుతో 945 పరుగులు చేశాడు. ఇందులో ఒక శతకం, ఆరు అర్ధశతకాలు ఉన్నాయి. పరిమిత ఓవర్ల క్రికెట్‌లోనూ అతడు ఆకట్టుకున్నాడు. లిస్ట్-ఏ క్రికెట్‌లో 25 మ్యాచ్‌ల్లో 34 వికెట్లు, ట్వంటీ20ల్లో 28 మ్యాచ్‌ల్లో 25 వికెట్లు సాధించాడు.

భారత్ సెలెక్టర్లు గత కొన్నేళ్లుగా మనవ్ సుతార్‌ను భవిష్యత్ ఆశాకిరణంగా భావిస్తున్నారు. 2023 వన్డే ప్రపంచకప్‌కు ముందు నిర్వహించిన జాతీయ జట్టు సన్నాహక శిబిరానికి అతడికి ఆహ్వానం అందింది. అప్పటి నుంచి అతడు సెలెక్టర్ల దృష్టిలో కొనసాగుతున్నాడు. ఇటీవల ఇండియన్ ప్రీమియర్ లీగ్ 2026లో గుజరాత్ టైటాన్స్ జట్టులో సభ్యుడిగా ఉన్న సుతార్, శుభ్‌మన్ గిల్‌తో కలిసి డ్రెస్సింగ్ రూమ్ పంచుకున్నాడు. నాలుగు మ్యాచ్‌ల్లో రెండు వికెట్లు పడగొట్టిన అతడు, ఇప్పుడు టెస్టు అరంగేట్రంతో తన క్రికెట్ ప్రయాణంలో మరో కీలక మైలురాయిని అందుకున్నాడు.

అఫ్గానిస్థాన్ సిరీస్‌కు హార్దిక్ సిద్ధం.. టీమిండియాకు భారీ ఊరట