T20 వరల్డ్ కప్ 2026కు బలమైన జట్టును ప్రకటించిన జింబాబ్వే

జింబాబ్వే సీనియర్ లెగ్ స్పిన్నర్ గ్రేమ్ క్రెమర్ అద్భుతమైన రీటర్న్‌తో మరోసారి వార్తల్లో నిలిచాడు. 39 ఏళ్ల వయసులో, ఏడేళ్ల పాటు అంతర్జాతీయ క్రికెట్‌కు దూరంగా ఉన్న క్రెమర్, ఇప్పుడు ఇరవై ఓవర్ల ప్రపంచ కప్ 2026 జట్టుకు ఎంపిక కావడం విశేషంగా మారింది. రీటర్న్ అనంతరం అతను చూపిన స్థిరమైన ప్రదర్శనలకు ఇది తగిన ప్రతిఫలమని జింబాబ్వే క్రికెట్ వర్గాలు అభిప్రాయపడుతున్నాయి.

గత ఏడాది దేశీయ, క్లబ్ క్రికెట్‌లో అద్భుతంగా రాణించిన తర్వాత క్రెమర్ మళ్లీ జాతీయ జట్టులోకి వచ్చాడు. ఆఫ్ఘానిస్తాన్‌తో స్వదేశంలో జరిగిన సిరీస్‌లో అతని బౌలింగ్‌లో కనిపించిన నియంత్రణ, అనుభవం సెలెక్టర్లను విశేషంగా ఆకట్టుకుంది. ఒత్తిడి పరిస్థితుల్లోనూ నిలకడగా బంతులు వేయగల సామర్థ్యాన్ని అతను మరోసారి నిరూపించాడు.

అదే క్రమంలో పాకిస్తాన్‌లో జరిగిన ఇరవై ఓవర్ల త్రైపాక్షిక సిరీస్‌లో కూడా కొన్ని మ్యాచ్‌లు ఆడిన క్రెమర్, ప్రపంచ కప్ ఎంపికకు తన అర్హతను మరింత బలపరిచాడు. ప్రపంచ కప్‌లో అతను జింబాబ్వే ప్రధాన స్పిన్ ఆయుధంగా నిలవనున్నాడు. అతనికి తోడుగా వెల్లింగ్టన్ మసకద్జా బౌలింగ్ చేయనుండగా, కెప్టెన్ సికందర్ రజా కూడా అదనపు స్పిన్ బాధ్యతలు చేపట్టనున్నాడు.

సమతుల్యంగా కనిపిస్తున్న జింబాబ్వే బౌలింగ్ యూనిట్

ఈ జట్టులో క్రెమర్ మాత్రమే కాదు, మరో అనుభవజ్ఞుడు బ్రెండన్ టేలర్ కూడా తిరిగి చోటు దక్కించుకున్నాడు. టోర్నీ ప్రారంభానికి ఒక రోజు ముందు 40 ఏళ్లు పూర్తి చేసుకోనున్న టేలర్, బ్యాటింగ్ విభాగానికి అనుభవం, స్థిరత్వం, నాయకత్వాన్ని అందిస్తాడని జట్టు ఆశిస్తోంది.

ఫాస్ట్ బౌలింగ్ విభాగంలో గాయం నుంచి కోలుకున్న బ్లెస్సింగ్ ముజరబానీ దాడికి నాయకత్వం వహించనున్నాడు. అతనికి రిచర్డ్ నగరావా, బ్రాడ్లీ ఎవాన్స్, టినోటెండా మపోసా సహకారం అందించనుండటంతో జింబాబ్వే బౌలింగ్ విభాగం సమతుల్యంగా కనిపిస్తోంది.

ప్రపంచ కప్‌లో జింబాబ్వే గ్రూప్–బీలో చోటు దక్కించుకుంది. ఈ గ్రూప్‌లో ఆస్ట్రేలియా, ఐర్లాండ్, ఒమన్‌తో పాటు సహ ఆతిథ్య దేశమైన శ్రీలంక ఉన్నాయి. ఫిబ్రవరి 9న ఒమన్‌తో జరిగే మ్యాచ్‌తో జింబాబ్వే తమ ప్రచారాన్ని ప్రారంభించనుంది. గ్రూప్ దశ మ్యాచ్‌లన్నీ శ్రీలంకలోనే జరగనున్నాయి.

గత ప్రపంచ కప్‌కు అర్హత సాధించలేకపోయిన జింబాబ్వే, ఈసారి అనుభవం–యువత సమ్మేళనంతో బలమైన ప్రదర్శన ఇవ్వాలని లక్ష్యంగా పెట్టుకుంది. గ్రేమ్ క్రెమర్ లాంటి సీనియర్ ఆటగాడి రీటర్న్, ఆ ఆశలకు మరింత బలం చేకూర్చింది.

2026 ఆగస్టు–సెప్టెంబర్‌లో భారత్ బంగ్లాదేశ్ పర్యటన ఖరారు