148 ఏళ్ల టెస్ట్ చరిత్రలో మొదటిసారి 200 పరుగుల లక్ష్యాన్ని ఛేదించిన ఆస్ట్రేలియా..!

టెస్ట్ క్రికెట్‌లో ఆస్ట్రేలియా అరుదైన ఘనత సాధించింది. 148 ఏళ్ల టెస్ట్ చరిత్రలో 200 కంటే ఎక్కువ పరుగుల లక్ష్యాన్ని ఎప్పుడెప్పుడో లేనంత వేగంగా ఛేదించిన జట్టుగా ఆసీస్ రికార్డు నెలకొల్పింది. యాషెస్ సిరీస్‌లో భాగంగా పెర్త్ వేదికగా శనివారం ముగిసిన తొలి టెస్టులో ఇంగ్లండ్‌ను 8 వికెట్ల తేడాతో ఓడిస్తూ ఈ చారిత్రాత్మక ఫీట్‌ను నమోదు చేసింది.

ఈ మ్యాచ్ మొత్తం బౌలర్ల ఆధిపత్యంలో సాగింది. ఇంగ్లండ్ విధించిన 205 పరుగుల లక్ష్యాన్ని ఆసీస్ కేవలం 28.2 ఓవర్లలోనే ఛేదించడం అందరినీ ఆశ్చర్యపరిచింది. ముఖ్యంగా ట్రావిస్ హెడ్ (83 బంతుల్లో 16 ఫోర్లు, 4 సిక్సులతో 123 పరుగులు) టీ20 తరహా ఆటతీరుతో అసాధారణ ఇన్నింగ్స్ ఆడాడు.

ఈ గెలుపుతో ఐదు టెస్టుల సిరీస్‌లో ఆస్ట్రేలియా 1-0 ఆధిక్యంలోకి చేరింది. అంతేకాదు, ఇదే విజయంతో గత రికార్డులను కూడా చెరిపేసింది. ఇంతకుముందు వేగంగా 200+ టార్గెట్‌ ఛేజ్ చేసిన జట్లలో ఇంగ్లండ్ (204 పరుగులు – 35.3 ఓవర్లు), న్యూజిలాండ్ (217 పరుగులు – 39.4 ఓవర్లు) ముందు వరుసలో ఉండగా… ఇప్పుడు ఆసీస్ వాటినన్నింటినీ అధిగమించి కొత్త రికార్డు సృష్టించింది. అలాగే ఇది ఆస్ట్రేలియా గడ్డపై అత్యంత వేగంగా ముగిసిన టెస్ట్ మ్యాచ్‌లలో ఒకటిగా కూడా చరిత్రలో నిలిచింది.

మ్యాచ్ వివరాలు ఇలా ఉన్నాయి:

ఇంగ్లండ్ తొలి ఇన్నింగ్స్ – 172 ఆలౌట్

ఇంగ్లండ్ వరుసగా వికెట్లు కోల్పోయి 172 పరుగులకు కుప్పకూలింది.

• హ్యారీ బ్రూక్ – 52 (61 బంతులు, 5 ఫోర్లు, 1 సిక్స్)

• ఓలీ పోప్ – 46

• జెమీ స్మిత్ – 33

ఆస్ట్రేలియా బౌలర్లలో:

• మిచెల్ స్టార్క్ – 7/58 (అద్భుత ప్రదర్శన)

• బ్రెండన్ డొగ్గెట్ – 2/27

• కామెరూన్ గ్రీన్ – 1 వికెట్

ఆస్ట్రేలియా తొలి ఇన్నింగ్స్ – 132 ఆలౌట్

ఆసీస్ కూడా పెద్దగా రాణించలేదు.

• అలెక్స్ క్యారీ – 26

• కామెరూన్ గ్రీన్ – 24

ఇంగ్లండ్ బౌలర్లలో:

• బెన్ స్టోక్స్ – 5/23 (ఫైవ్‌ఫర్)

• బ్రైడన్ కార్స్ – 3/45

• జోఫ్రా ఆర్చర్ – 2/11

ఇంగ్లండ్ రెండో ఇన్నింగ్స్ – 164 ఆలౌట్

40 పరుగుల ఆధిక్యంతో బ్యాటింగ్ ప్రారంభించిన ఇంగ్లండ్ మళ్లీ తక్కువ స్కోర్‌కే పరిమితమైంది.

• గస్ అట్కిన్సన్ – 37

• ఓలీ పోప్ – 33

ఆస్ట్రేలియా బౌలర్ల ప్రదర్శన:

• స్కాట్ బోలాండ్ – 4/33

• బ్రెండన్ డొగ్గెట్ – 3/51

• మిచెల్ స్టార్క్ – 3/55

ఆసీస్ ముందు 205 పరుగుల లక్ష్యం ఏర్పడింది.

ఆస్ట్రేలియా రెండో ఇన్నింగ్స్ – రికార్డు ఛేజ్

బ్యాటింగ్‌కు కఠినంగా ఉన్న పిచ్‌పై ఈ టార్గెట్‌ను ఆసీస్ ఛేదించడం కష్టమే అనుకున్నారు. కానీ ట్రావిస్ హెడ్ ఓపెనింగ్ నుంచే దూకుడు ప్రదర్శించి ఒక్కసారిగా మ్యాచ్‌ను ఏకపక్షం చేశాడు. అతని ధాటికి ఇంగ్లండ్ బౌలర్లు పూర్తిగా వైఫల్యం చెందారు. ఆసీస్ కేవలం 28.2 ఓవర్లలో 205 పరుగులు సాధించి మ్యాచ్‌ను సులభంగా గెలుచుకుంది.

మరిన్ని వార్తలు చదవండి: T20 World Cup 2026: ఆల్‌మోస్ట్ ఫైనల్! టీ20 WC గ్రూప్స్ ఖరారు – భారత్ గ్రూప్‌లో ఉన్న జట్లు ఇవే!