RCAకు BCCI కఠిన హెచ్చరిక: ఎన్నికలు జరగకపోతే జైపూర్‌లో IPL మ్యాచ్‌లు లేవు

రాజస్థాన్ క్రికెట్ అసోసియేషన్‌కు (ఆర్‌సీఏ) భారత క్రికెట్ నియంత్రణ మండలి (బీసీసీఐ) కఠిన హెచ్చరిక జారీ చేసింది. చాలా కాలంగా పెండింగ్‌లో ఉన్న ఆర్‌సీఏ ఎన్నికలు తక్షణమే నిర్వహించకపోతే, జైపూర్‌లో ఐపీఎల్ మ్యాచ్‌లకు అనుమతి ఇవ్వబోమని బీసీసీఐ స్పష్టం చేసింది. ఎన్నికైన పాలక మండలి లేకుండా జైపూర్‌ను ఐపీఎల్ వేదికగా పరిగణించేది లేదని బోర్డు తేల్చిచెప్పింది.

ఈ అంశంపై ఐపీఎల్ చైర్మన్ అరుణ్ సింగ్ ధూమల్ మాట్లాడుతూ, ఆర్‌సీఏ ఎన్నికలు తప్పనిసరిగా జరగాలని బీసీసీఐ ఇప్పటికే పలుమార్లు తెలియజేసిందన్నారు. అయినప్పటికీ ఇప్పటివరకు ఎన్నికలు జరగకపోవడంతో జైపూర్‌లో ఐపీఎల్ మ్యాచ్‌ల నిర్వహణపై అనిశ్చితి నెలకొందని చెప్పారు. అంతేకాకుండా, స్టేడియంలోని సౌకర్యాలను సంబంధిత ఫ్రాంచైజీ సమీక్షించిన తర్వాతే తుది నిర్ణయం తీసుకుంటామని వెల్లడించారు.

ప్రస్తుతం ఆర్‌సీఏను రాజస్థాన్ రాష్ట్ర ప్రభుత్వం నియమించిన అడ్‌హాక్ కమిటీ నిర్వహిస్తోంది. దీన్ దయాల్ కుమావత్ నేతృత్వంలోని ఈ కమిటీ గత రెండు సంవత్సరాలుగా బాధ్యతలు నిర్వర్తిస్తోంది. జైపూర్‌లోని సవాయ్ మాన్‌సింగ్ స్టేడియం గత 18 ఏళ్లుగా రాజస్థాన్ రాయల్స్‌కు హోం గ్రౌండ్‌గా ఉన్నప్పటికీ, తాజా పరిణామాల నేపథ్యంలో ఫ్రాంచైజీ పుణె వంటి ఇతర వేదికలను కూడా పరిశీలిస్తున్నట్లు సమాచారం.

RCAకి BCCI నుంచి అధికారిక లేఖ లేదు: దీన్ దయాల్ కుమావత్

ఈ వ్యవహారంపై స్పందించిన దీన్ దయాల్ కుమావత్, బీసీసీఐ నుంచి తమకు అధికారికంగా ఎలాంటి లేఖ అందలేదని తెలిపారు. అయితే రాజస్థాన్ రాయల్స్ యాజమాన్యంతో చర్చలు జరిగాయని చెప్పారు. సవాయ్ మాన్‌సింగ్ స్టేడియంలో ఐపీఎల్ మ్యాచ్‌లు నిర్వహించేందుకు ఆర్‌సీఏ పూర్తిగా సిద్ధంగా ఉందని, బీసీసీఐ సూచించిన అంశాలను రాష్ట్ర ప్రభుత్వంతో చర్చించి పరిష్కరిస్తామని ఆయన తెలిపారు.

అరుణ్ సింగ్ ధూమల్ మరోసారి స్పందిస్తూ, బీసీసీఐ వైఖరిలో ఎలాంటి మార్పు లేదని స్పష్టం చేశారు. ఆర్‌సీఏ ఎన్నికలు నిర్వహించి, కొత్తగా ఎన్నికైన పాలక మండలి ఏర్పడే వరకు, అలాగే స్టేడియం సౌకర్యాలు ప్రమాణాలకు అనుగుణంగా ఉన్నాయని నిర్ధారణ అయ్యే వరకు జైపూర్ విషయంలో తుది నిర్ణయం తీసుకోబోమని అన్నారు.

చిన్నస్వామి తొక్కిసలాట తర్వాత బెంగళూరు వేదికపై స్పష్టత

ఇదిలా ఉండగా, చిన్నస్వామి స్టేడియం వెలుపల ఇటీవల జరిగిన తొక్కిసలాట ఘటన నేపథ్యంలో బెంగళూరు ఐపీఎల్ వేదికగా కొనసాగుతుందా అనే సందేహాలపై కూడా ధూమల్ స్పందించారు. కర్ణాటక రాష్ట్ర క్రికెట్ అసోసియేషన్ రాష్ట్ర ప్రభుత్వంతో నిరంతరం సంప్రదింపుల్లో ఉందని, బెంగళూరు ఐపీఎల్ వేదికగానే కొనసాగుతుందన్న నమ్మకం ఉందని ఆయన తెలిపారు.

మరిన్ని వార్తలు చదవండి: భారత్–దక్షిణాఫ్రికా 4వ టీ20 రద్దు: టికెట్ రిఫండ్‌పై BCCI కీలక వ్యాఖ్యలు