ఐపీఎల్ 2026లో గాయపడిన రామకృష్ణ ఘోష్ స్థానంలో నరోన్హాను తీసుకున్న సీఎస్‌కే

ఐపీఎల్ 2026 మిగిలిన సీజన్ కోసం చెన్నై సూపర్ కింగ్స్ జట్టు గాయపడిన ఆల్‌రౌండర్ రామకృష్ణ ఘోష్ స్థానంలో కర్ణాటక యువ ఆటగాడు మాక్‌నీల్ హ్యాడ్లీ నోరోన్హా ను జట్టులోకి తీసుకుంది. ఈ నెల ఆరంభంలో ముంబై ఇండియన్స్ తో జరిగిన మ్యాచ్‌లో ఘోష్ కాలి ఎముక విరగడంతో టోర్నమెంట్ మొత్తానికి దూరమయ్యాడు. యువ ఆటగాళ్లపై నమ్మకం పెంచుతున్న సీఎస్‌కే వ్యూహంలో భాగంగానే ఈ నిర్ణయం తీసుకున్నట్లు తెలుస్తోంది.

24 ఏళ్ల నరోన్హా దేశీయ క్రికెట్‌లో కర్ణాటక తరఫున ఆడుతున్నాడు. 2024లో సీనియర్ స్థాయిలో అరంగేట్రం చేసిన అతడు చివరిసారిగా 2025 డిసెంబర్‌లో జరిగిన సయ్యద్ ముస్తాక్ అలీ ట్రోఫీ లో కనిపించాడు. ఇప్పటివరకు కేవలం మూడు టీ20 మ్యాచ్‌లు మాత్రమే ఆడినా 58 పరుగులు చేయడంతో పాటు ఒక వికెట్ కూడా తీశాడు. దీంతో ఆల్‌రౌండర్‌గా అతడిలో మంచి సామర్థ్యం ఉందని సీఎస్‌కే భావిస్తోంది.

2025 మహారాజా ట్రోఫీలో మంగళూరు డ్రాగన్స్ తరఫున ఆడిన నరోన్హా అద్భుత ప్రదర్శనతో గుర్తింపు పొందాడు. 13 మ్యాచ్‌ల్లో 253 పరుగులు చేసిన అతడు 148.82 స్ట్రైక్‌రేట్ నమోదు చేశాడు. అదే సమయంలో 19 సిక్సర్లు బాదాడు. బౌలింగ్‌లో కూడా రాణించిన అతడు మొత్తం 10 వికెట్లు పడగొట్టాడు.

గాయాల వెంటాడుతున్న సీఎస్‌కే సీజన్

ఈ సీజన్‌లో సీఎస్‌కే వరుస గాయాలతో ఇబ్బందులు ఎదుర్కొంటోంది. ఘోష్‌తో పాటు ఆయుష్ మహత్రే, ఖలీల్ అహ్మద్ కూడా టోర్నమెంట్‌కు దూరమయ్యారు. అయినప్పటికీ ప్లేఆఫ్స్ రేసులో సీఎస్‌కే ఇంకా నిలకడగా కొనసాగుతోంది. ప్రస్తుతం 11 మ్యాచ్‌ల్లో ఆరు విజయాలు, ఐదు పరాజయాలతో పాయింట్ల పట్టికలో ఐదో స్థానంలో ఉంది.

ఐపీఎల్ కెరీర్‌లో ఘోష్‌కు ఇది కీలక అవకాశంగా భావించారు. ఐపీఎల్ 2025లో ఎక్కువ సమయం బెంచ్‌కే పరిమితమైన అతడికి చివరకు ముంబై ఇండియన్స్‌పై అవకాశం వచ్చింది. తన అరంగేట్ర మ్యాచ్‌లో మూడు ఓవర్లలో కేవలం 24 పరుగులు మాత్రమే ఇచ్చి తొలి ఐపీఎల్ వికెట్ కూడా సాధించాడు.

ఘోష్ అరంగేట్రంలో ప్రధాన ఆకర్షణ సూర్యకుమార్ యాదవ్ వికెట్. భారీ షాట్ ఆడే ప్రయత్నంలో అతడు స్వీపర్ కవర్ వద్ద క్యాచ్ ఇచ్చాడు. అనంతరం సీఎస్‌కే విడుదల చేసిన ప్రకటనలో, “సీఎస్‌కే వర్సెస్ ఎంఐ మ్యాచ్ సందర్భంగా రామకృష్ణ ఘోష్ కుడి కాలికి ఫ్రాక్చర్ అయింది. ఐపీఎల్ 2026లో అతడు ఇకపై ఆడడు” అని తెలిపింది.