ఐపీఎల్ 2026లో గాయాల కలకలం.. సీఎస్‌కే, ఆర్సీబీ కీలక మార్పులు

ఐపీఎల్ 2026 సీజన్‌లో గాయాల సమస్య జట్లను తీవ్రంగా కలవరపెడుతోంది. టోర్నమెంట్ కీలక దశకు చేరుకున్న సమయంలో పలువురు ఆటగాళ్లు గాయాల బారిన పడటం వల్ల ఫ్రాంచైజీలు ప్రత్యామ్నాయ ఆటగాళ్ల కోసం పరుగులు పెడుతున్నాయి. ఈ సీజన్‌లో దాదాపు 20 నుంచి 25 మంది ఆటగాళ్లు గాయపడినట్లు సమాచారం. దీంతో జట్ల సమతౌల్యం, ప్రదర్శనలపై స్పష్టమైన ప్రభావం పడుతోంది.

చెన్నై సూపర్ కింగ్స్ జట్టుకు చెందిన పేసర్ ఖలీల్ అహ్మద్ కుడి కాలి కండరాల గాయంతో మొత్తం టోర్నమెంట్‌కు దూరమయ్యాడు. మరోవైపు రాయల్ చాలెంజర్స్ బెంగళూరు తరఫున శ్రీలంక పేసర్ నువాన్ తుషారా ఫిట్‌నెస్ సమస్యల కారణంగా ఒక్క మ్యాచ్ కూడా ఆడలేకపోయాడు.

సీఎస్కే, ఆర్సీబీ ప్రత్యామ్నాయ ఆటగాళ్ల ప్రకటన

ఈ నేపథ్యంలో రెండు జట్లు తమ ప్రత్యామ్నాయ ఆటగాళ్లను ప్రకటించాయి. చెన్నై సూపర్ కింగ్స్ రూ.30 లక్షలకు కుల్దీప్ యాదవ్‌ను జట్టులోకి తీసుకుంది. రాయల్ చాలెంజర్స్ బెంగళూరు మాత్రం ఇంగ్లండ్ పేసర్ రిచర్డ్ గ్లీసన్‌ను రూ.1.6 కోట్లకు ఎంపిక చేసింది. అయితే ప్లేఆఫ్స్ దశ సమీపిస్తున్న వేళ ఈ ఇద్దరు ఆటగాళ్లు ఎప్పుడు జట్టుతో కలుస్తారన్న విషయంపై ఇంకా స్పష్టత రాలేదు.

29 ఏళ్ల కుల్దీప్ యాదవ్ ఎడమచేతి మీడియం పేసర్‌గా గుర్తింపు పొందాడు. గతంలో రాజస్థాన్ రాయల్స్ తరఫున ఐపీఎల్‌లో ఆడిన అనుభవం అతనికి ఉంది. ఇప్పటివరకు మూడు మ్యాచ్‌ల్లో రెండు వికెట్లు సాధించాడు. మరోవైపు రిచర్డ్ గ్లీసన్ మంచి అనుభవంతో పాటు అద్భుతమైన ఫామ్‌లో ఉన్నాడు. ఇటీవల పీఎస్‌ఎల్ 2026లో ఆడిన అతడు తొమ్మిది మ్యాచ్‌ల్లో 12 వికెట్లు తీసి ఆకట్టుకున్నాడు.

అయితే గ్లీసన్‌కు వెంటనే తుది జట్టులో అవకాశం దక్కుతుందా లేదా అన్నది సందేహంగానే ఉంది. ఇప్పటికే ఆర్సీబీ విదేశీ పేసర్లుగా జోష్ హేజిల్‌వుడ్, జేకబ్ డఫీ నిలకడైన ప్రదర్శనలు ఇస్తున్నారు. దీంతో గ్లీసన్ తొలి దశలో బ్యాకప్ బౌలర్‌గా కొనసాగించే అవకాశం కనిపిస్తోంది. గాయాలు లేదా వ్యూహాత్మక మార్పులు జరిగితేనే అతడికి తుది జట్టులో చోటు దక్కే అవకాశముంది.

ఇక కోల్‌కతా నైట్ రైడర్స్ ఆల్‌రౌండర్ రచిన్ రవీంద్ర స్వదేశానికి వెళ్లిపోయినట్లు సమాచారం. జూన్ 4 నుంచి ప్రారంభమయ్యే ఇంగ్లండ్ టెస్ట్ సిరీస్‌కు సిద్ధమయ్యేందుకు అతడు న్యూజిలాండ్‌కు తిరిగి వెళ్లినట్లు క్రిక్‌బజ్ పేర్కొంది. ఐపీఎల్ 2026 వేలంలో రూ.2 కోట్లకు కొనుగోలు చేసినప్పటికీ రచిన్ రవీంద్రకు ఈ సీజన్‌లో కేకేఆర్ తరఫున ఒక్క మ్యాచ్ ఆడే అవకాశం రాలేదు.

రచిన్ రవీంద్ర స్థానంలో కేకేఆర్ మరో విదేశీ ఆటగాడిని తీసుకుంటుందా లేదా అన్నది ఇంకా స్పష్టంగా లేదు. ప్రస్తుతం 11 మ్యాచ్‌ల్లో కేవలం నాలుగు విజయాలతో ఎనిమిదో స్థానంలో ఉన్న కోల్‌కతా జట్టు ప్లేఆఫ్స్ అవకాశాలను క్లిష్టంగా మార్చుకుంది. ఈ పరిస్థితుల్లో మిగిలిన సీజన్ కోసం మరో విదేశీ ప్రత్యామ్నాయ ఆటగాడిని తీసుకోకుండా ఉండే అవకాశాలు ఎక్కువగా కనిపిస్తున్నాయి