మౌంట్ మాంగనుయ్ వేదికగా వెస్టిండీస్తో జరుగుతున్న మూడో టెస్టు మ్యాచ్లో న్యూజిలాండ్ స్టార్ ఓపెనర్ డెవాన్ కాన్వే అద్భుత ప్రదర్శనతో ఆకట్టుకున్నాడు. తొలి ఇన్నింగ్స్లో డబుల్ సెంచరీతో చెలరేగిన కాన్వే, రెండో ఇన్నింగ్స్లోనూ శతకం బాదాడు. దీంతో ఒకే టెస్టు మ్యాచ్లో ద్విశతకం మరియు సెంచరీ సాధించిన తొలి న్యూజిలాండ్ బ్యాటర్గా కాన్వే చరిత్ర సృష్టించాడు.
ఇప్పటివరకు ఏ కివీ ఆటగాడు ఈ ఘనత సాధించలేదు. ప్రపంచ క్రికెట్ మొత్తంగా చూస్తే, ఈ ఫీట్ సాధించిన 10వ బ్యాటర్గా కాన్వే నిలిచాడు. తొలి ఇన్నింగ్స్లో 367 బంతులు ఎదుర్కొని 31 ఫోర్ల సహాయంతో 227 పరుగులు చేసిన కాన్వే, రెండో ఇన్నింగ్స్లోనూ వంద పరుగులు పూర్తి చేశాడు. గత రెండేళ్లుగా ఫామ్ కోల్పోయి ఇబ్బందులు ఎదుర్కొన్న కాన్వే, ఈ ఏడాది మాత్రం అద్భుతంగా రాణిస్తున్నాడు. ఈ ఏడాది ఆడిన ఐదు టెస్టు మ్యాచ్ల్లో 87.12 సగటుతో 697 పరుగులు సాధించాడు.
మ్యాచ్ విషయానికి వస్తే, 452 పరుగుల లక్ష్యంతో రెండో ఇన్నింగ్స్ ప్రారంభించిన వెస్టిండీస్ జట్టు డ్రా కోసం పోరాడుతోంది. నాలుగో రోజు ఆట ముగిసే సమయానికి విండీస్ వికెట్ నష్టపోకుండా 43 పరుగులు చేసింది. కరేబియన్ జట్టు విజయం సాధించాలంటే ఇంకా 419 పరుగులు అవసరం.
ప్రస్తుతం క్రీజులో బ్రాండెన్ కింగ్ 37 పరుగులతో, జాన్ కాంప్బెల్ 2 పరుగులతో ఉన్నారు. అంతకుముందు న్యూజిలాండ్ తమ రెండో ఇన్నింగ్స్ను 306 పరుగులకు 2 వికెట్ల నష్టంతో డిక్లేర్ చేసింది. కివీస్ బ్యాటర్లలో కాన్వేతో పాటు టామ్ లాథమ్ కూడా శతకం సాధించాడు. తొలి ఇన్నింగ్స్లో లభించిన భారీ ఆధిక్యాన్ని కలిపి, బ్లాక్ క్యాప్స్ వెస్టిండీస్ ముందు 452 పరుగుల లక్ష్యాన్ని ఉంచాయి.
వెస్టిండీస్ కూడా తొలి ఇన్నింగ్స్లో గట్టి పోరాటం చేసింది. ఓపెనర్లు బ్రాండెన్ కింగ్ 63 పరుగులు, జాన్ కాంప్బెల్ 45 పరుగులతో మంచి ఆరంభం ఇచ్చారు. అనంతరం కవేమ్ హాడ్జ్ అజేయంగా 123 పరుగులు చేసి జట్టును నిలబెట్టాడు. దీంతో వెస్టిండీస్ తొలి ఇన్నింగ్స్లో 420 పరుగులకు ఆలౌట్ అయింది. మరోవైపు న్యూజిలాండ్ తొలి ఇన్నింగ్స్లో 575 పరుగుల భారీ స్కోర్ నమోదు చేసింది.
మరిన్ని వార్తలు చదవండి: టీ20 వరల్డ్ కప్ జట్టుపై గవాస్కర్ అసంతృప్తి గిల్ అంశం చర్చలో
