వరల్డ్ కప్ ముందు టీమిండియాకు గుడ్ న్యూస్ తిలక్ వర్మ ఫిట్‌నెస్‌పై బీసీసీఐ అప్‌డేట్

వరల్డ్ కప్‌కు ముందు టీమిండియాకు ఊరట కలిగించే శుభవార్త వచ్చింది. స్టార్ బ్యాటర్ తిలక్ వర్మ వరల్డ్ కప్‌లో ఆడడం దాదాపు ఖాయమైంది. తాజా రిపోర్ట్స్ ప్రకారం, తిలక్ తన గాయంనుంచి పూర్తిగా కోలుకున్నట్లు తెలుస్తోంది.

గజ్జల వద్ద గాయం కారణంగా ప్రస్తుతం న్యూజిలాండ్‌తో జరుగుతున్న టీ20 సిరీస్‌కు తిలక్ దూరంగా ఉన్న విషయం తెలిసిందే. ఇప్పటివరకు జరిగిన మూడు టీ20 మ్యాచ్‌లకు అతడు అందుబాటులో లేకపోయాడు. అయితే ఈ సిరీస్‌లో జరగబోయే చివరి మ్యాచ్‌కు తిలక్ వర్మ అందుబాటులో ఉండే అవకాశాలు కనిపిస్తున్నాయి.

అయితే వరల్డ్ కప్‌కు ముందు అతడిని ఆడించి ఎలాంటి రిస్క్ తీసుకోవాలని బీసీసీఐ భావించడం లేదు. వరల్డ్ కప్ సమయానికి తిలక్ పూర్తిగా ఫిట్‌గా, ఫ్రెష్‌గా ఉండేలా జాగ్రత్తలు తీసుకుంటున్నట్లు సమాచారం. ఈ నేపథ్యంలో న్యూజిలాండ్‌తో జరిగే చివరి రెండు మ్యాచ్‌లకు తిలక్ ఫిట్‌గా ఉన్నప్పటికీ విశ్రాంతి ఇవ్వనున్నట్లు తెలుస్తోంది.

ఇదే సమయంలో శ్రేయాస్ అయ్యర్ కూడా చివరి రెండు టీ20 మ్యాచ్‌లకు జట్టుతోనే కొనసాగనున్నాడు. ప్రధాన లక్ష్యం వరల్డ్ కప్‌కు ముందు ఆటగాళ్లను శారీరకంగా సిద్ధంగా ఉంచడమే అని బీసీసీఐ వర్గాలు చెబుతున్నాయి.

తిలక్ గాయం పరిస్థితిపై తాజాగా బీసీసీఐ అధికారి ఒకరు స్పష్టత ఇచ్చారు.

ప్రస్తుతం తిలక్ వర్మకు ఎలాంటి నొప్పి లేదు. అతడు గాయం నుంచి వేగంగా కోలుకుంటున్నాడు. వరల్డ్ కప్‌కు అతడు పూర్తిగా అందుబాటులో ఉంటాడన్న నమ్మకం సెంటర్ ఆఫ్ ఎక్సలెన్స్‌కు ఉంది. న్యూజిలాండ్‌తో జరిగే నాలుగో టీ20 మ్యాచ్‌కు అతడిని సిద్ధం చేయడమే లక్ష్యంగా పెట్టుకున్నాం. చివరి మ్యాచ్ సమయానికి అతడు పూర్తి స్థాయిలో ఫిట్‌గా ఉండే అవకాశం ఉంది. వరల్డ్ కప్ ప్రాక్టీస్ మ్యాచ్‌లకు మాత్రం ఖచ్చితంగా అందుబాటులో ఉంటాడు అని ఆ అధికారి తెలిపారు.

మొత్తానికి, వరల్డ్ కప్ ముందు తిలక్ వర్మ ఫిట్‌నెస్ టీమిండియాకు పెద్ద ఊరటగా మారింది.

మరిన్నివార్తలుచదవండి: టీ20 ప్రపంచకప్ 2026 వార్మప్ షెడ్యూల్ జనవరి 26న విడుదల భారత్ దక్షిణాఫ్రికాతో ప్రాక్టీస్ మ్యాచ్