ICC ODI Rankings 2026: కోహ్లీ అగ్రస్థానం.. రోహిత్ డౌన్

ఐసీసీ విడుదల చేసిన తాజా వన్డే బ్యాటర్ల ర్యాంకింగ్స్ టీమిండియా అభిమానులకు మిశ్రమ అనుభూతిని కలిగించాయి. ఒకవైపు విరాట్ కోహ్లి మళ్లీ అగ్రస్థానాన్ని దక్కించుకుని ఫ్యాన్స్‌లో ఉత్సాహాన్ని నింపగా, మరోవైపు రోహిత్ శర్మ రెండు స్థానాలు కోల్పోయి నిరాశను మిగిల్చాడు.

న్యూజిలాండ్‌తో జరిగిన తొలి వన్డేలో విరాట్ కోహ్లి 93 పరుగులతో మెరిసి తన ర్యాంకింగ్‌ను మెరుగుపరుచుకున్నాడు. దీంతో ఒక్క స్థానం ఎగబాకి మరోసారి ప్రపంచ నంబర్ వన్ వన్డే బ్యాటర్‌గా నిలిచాడు. ఇదే మ్యాచ్‌లో రోహిత్ శర్మ 26 పరుగులకే పరిమితమవడంతో రెండు స్థానాలు కోల్పోయి మూడో స్థానానికి పడిపోయాడు.

అదే మ్యాచ్‌లో న్యూజిలాండ్ బ్యాటర్ డారిల్ మిచెల్ 84 పరుగులతో ఆకట్టుకొని ఒక స్థానం ఎగబాకి రెండో స్థానాన్ని దక్కించుకున్నాడు. ఇక కీలక సమయంలో 29 పరుగులు నాటౌట్‌గా చేసిన కేఎల్ రాహుల్ కూడా ర్యాంకింగ్స్‌లో మెరుగుదల సాధించాడు. ఒక స్థానం ముందుకు వచ్చి 11వ స్థానంలో నిలిచాడు.

టాప్-10లో భారత్ తరఫున మరో ఇద్దరు బ్యాటర్లు కూడా ఉన్నారు. శుభ్‌మన్ గిల్ ఐదో స్థానంలో కొనసాగుతుండగా, శ్రేయస్ అయ్యర్ పదో స్థానంలో ఉన్నాడు. వీటిని తప్ప ఈ వారం బ్యాటర్ల ర్యాంకింగ్స్‌లో పెద్దగా మార్పులేమీ చోటుచేసుకోలేదు.

బౌలర్ల ర్యాంకింగ్స్ విషయానికి వస్తే టాప్-10లో ఎలాంటి మార్పులు లేవు. రషీద్ ఖాన్, జోఫ్రా ఆర్చర్, కుల్దీప్ యాదవ్ వరుసగా తొలి మూడు స్థానాల్లో కొనసాగుతున్నారు. అయితే భారత పేసర్ మొహమ్మద్ సిరాజ్ మాత్రం మంచి పురోగతి సాధించాడు. న్యూజిలాండ్‌పై తొలి వన్డేలో రెండు వికెట్లు తీసిన సిరాజ్ ఐదు స్థానాలు మెరుగుపరుచుకుని 16వ స్థానానికి చేరాడు. మరోవైపు అదే మ్యాచ్‌లో విఫలమైన రవీంద్ర జడేజా ఐదు స్థానాలు కోల్పోయి 21వ స్థానానికి పడిపోయాడు.

ఆల్‌రౌండర్ల ర్యాంకింగ్స్‌లో ఒమర్‌జాయ్, సికందర్, మొహమ్మద్ నబీ టాప్-3లో కొనసాగుతున్నారు. భారత్ తరఫున అక్షర్ పటేల్ పదో స్థానంలో నిలిచాడు.

మరిన్ని వార్తలు చదవండి: ముంబై ఇండియన్స్ ఫ్యామిలీలోకి సామ్ కర్రన్, విల్ జాక్స్, డ్యానీ వ్యాట్ హాడ్జ్