ముంబై ఇండియన్స్ ఫ్యామిలీలోకి సామ్ కర్రన్, విల్ జాక్స్, డ్యానీ వ్యాట్ హాడ్జ్

ముంబై ఇండియన్స్ కుటుంబంలోకి మరో ముగ్గురు కొత్తగా చేరారు. ది హండ్రెడ్ లీగ్ 2026 ఎడిషన్ కోసం ఎంఐ లండన్ ఫ్రాంచైజీ (గతంలో ఓవల్ ఇన్విన్సిబుల్స్) ఇంగ్లండ్ ఆటగాళ్లు సామ్ కర్రన్, విల్ జాక్స్ మరియు మహిళా క్రికెటర్ డ్యానీ వ్యాట్ హాడ్జ్‌ను ప్రీ ఆక్షన్ సైనింగ్స్‌గా ఎంపిక చేసింది. వీరిలో సామ్ కర్రన్‌ను ఎంఐ లండన్ పురుషుల జట్టు కెప్టెన్‌గా కూడా నియమించింది.

గత సీజన్ వరకు ఈ జట్టుకు సామ్ బిల్లింగ్స్ నాయకత్వం వహించాడు. అతని సారథ్యంలో అప్పటి ఓవల్ ఇన్విన్సిబుల్స్ (ప్రస్తుత ఎంఐ లండన్) 2023 నుంచి 2025 వరకు వరుసగా మూడు టైటిళ్లు గెలుచుకుంది. అయినప్పటికీ యాజమాన్యం నాయకత్వ మార్పు చేస్తూ కెప్టెన్సీ బాధ్యతలను సామ్ కర్రన్‌కు అప్పగించింది.

ఎంఐ లండన్ ఫ్రాంచైజీ అంబానీ కుటుంబం (ముకేశ్, నీతా) యాజమాన్యంలో నడిచే ముంబై ఇండియన్స్ ఐపీఎల్ జట్టుకు సోదర ఫ్రాంచైజీగా ఉంది. ప్రపంచవ్యాప్తంగా వివిధ లీగ్‌ల్లో ముంబై ఇండియన్స్ ఫ్రాంచైజీలు ఉన్నాయి. ఐపీఎల్ మరియు డబ్ల్యూపీఎల్‌లో ముంబై ఇండియన్స్, సౌతాఫ్రికా టీ20 లీగ్‌లో ఎంఐ కేప్‌టౌన్, ఇంటర్నేషనల్ లీగ్ టీ20లో ఎంఐ ఎమిరేట్స్, మేజర్ లీగ్ క్రికెట్‌లో ఎంఐ న్యూయార్క్, ది హండ్రెడ్ లీగ్‌లో ఎంఐ లండన్‌గా ముంబై ఇండియన్స్ ఫ్యామిలీ విస్తరించి ఉంది.

హండ్రెడ్ లీగ్‌లో కొత్తగా ఎంపికైన కెప్టెన్ సామ్ కర్రన్‌ను ముంబై ఇండియన్స్ అధికారికంగా తమ కుటుంబంలోకి స్వాగతించింది. అలాగే విల్ జాక్స్ మరియు డ్యానీ వ్యాట్ హాడ్జ్‌లకూ స్వాగతం పలికింది. హండ్రెడ్ లీగ్‌లో ఓవల్ ఇన్విన్సిబుల్స్ (ప్రస్తుతం ఎంఐ లండన్) ఇప్పటివరకు మొత్తం ఐదు టైటిళ్లు సాధించింది. ఇందులో పురుషుల విభాగంలో మూడు, మహిళల విభాగంలో రెండు టైటిళ్లు ఉన్నాయి.

హండ్రెడ్ లీగ్ 2026 సీజన్ జూలై 21 నుంచి ప్రారంభమై ఆగస్టు 16 వరకు కొనసాగనుంది. ఈ టోర్నీ కోసం అన్ని ఫ్రాంచైజీలకు జనవరి చివరి వరకు నాలుగు ప్రీ ఆక్షన్ ఒప్పందాలు చేసుకునే అవకాశం కల్పించారు. ఇందులో గరిష్టంగా మూడు ప్రత్యక్ష ఒప్పందాలు ఉండవచ్చు. ఈ నాలుగులో కనీసం ఒకరు తమ జాతీయ జట్టుతో సెంట్రల్ కాంట్రాక్ట్ కలిగి ఉండాలి. అలాగే కనీసం ఒక ఆటగాడిని రిటైన్ చేసుకునే వెసులుబాటు ఉంది.

ఎంఐ లండన్ తరహాలోనే హండ్రెడ్ లీగ్‌లోని ఇతర ఫ్రాంచైజీలు కూడా ప్రీ ఆక్షన్ సైనింగ్స్ చేసుకుంటున్నాయి. బర్మింగ్‌హామ్ ఫీనిక్స్, లండన్ స్పిరిట్, మాంచెస్టర్ ఒరిజినల్స్, సన్‌రైజర్స్ లీడ్స్, ట్రెంట్ రాకెట్స్, సదరన్ బ్రేవ్ మరియు వెల్ష్ ఫైర్ జట్లు తమ జట్లను బలోపేతం చేసుకునే దిశగా ముందుకెళ్తున్నాయి.

మరిన్నివార్తలుచదవండి: అనుష్క శర్మ గాయంతో ముంబై ఇండియన్స్ మ్యాచ్‌కు దూరం, గుజరాత్ జెయింట్స్‌కు భారీ ఎదురుదెబ్బ