ILT20 సీజన్ 4: దుబాయ్ క్యాపిటల్స్‌కి కెప్టెన్‌గా దసున్ షానకా నియామకం

దుబాయ్ క్యాపిటల్స్‌ జట్టు, ఇంటర్నేషనల్ లీగ్ T20 నాలుగో సీజన్‌కు తమ కొత్త కెప్టెన్‌గా శ్రీలంక ఆల్‌రౌండర్ దసున్ షానకాను అధికారికంగా ప్రకటించింది. రాబోయే సీజన్‌ను దృష్టిలో ఉంచుకుని తీసుకున్న ఈ నిర్ణయంపై జట్టు నిర్వహణ పూర్తి నమ్మకం వ్యక్తం చేసింది. అంతర్జాతీయ స్థాయిలో నాయకత్వం వహించిన అనుభవం, ఆల్‌రౌండర్‌గా ఉన్న స్థాయితో షానకా ఈ బాధ్యతకు సరైన వ్యక్తని ఫ్రాంచైజీ భావిస్తోంది.

గత సీజన్‌లో టైటిల్ గెలుచుకున్న జట్టులో షానకా కీలక పాత్ర పోషించారు. ఇప్పటివరకు ఆయన ఆడిన వందకు పైగా టి20 మ్యాచ్‌లలో బ్యాట్ & బాల్‌తో చూపిన ప్రదర్శన ఆయన నాయకత్వానికి మరింత బలం ఇస్తోంది.

ముఖ్యంగా గత సీజన్‌లో 12 మ్యాచ్‌లలో 202.46 స్ట్రైక్ రేట్‌తో 164 పరుగులు చేసిన షానకా, డెత్ ఓవర్లలో తన ఫినిషింగ్ సామర్థ్యాన్ని మరోసారి రుజువు చేశారు. డిసెంబర్ 2న డెజర్ట్ వైపర్స్‌తో జరిగే తొలి మ్యాచ్‌లో ఆయన ప్రదర్శనపై భారీ అంచనాలున్నాయి.

కెప్టెన్సీ బాధ్యతలు స్వీకరించిన అనంతరం షానకా స్పందిస్తూ—
“దుబాయ్ క్యాపిటల్స్‌కు నాయకత్వం వహించడం గొప్ప గౌరవం. నా మీద నమ్మకం ఉంచిన ఫ్రాంచైజీకి ధన్యవాదాలు. మా జట్టు సమతూకంగా ఉంది, విజయం కోసం ఆశతో ఉంది. ఈ సీజన్‌లో భయపడకుండా, దూకుడైన క్రికెట్ ఆడి అభిమానులను గర్వపడేటట్లు చేస్తాం,” అని అన్నారు.

హెడ్ కోచ్ హేమాంగ్ బదాని కూడా షానకా నియామకంపై సంతోషం వ్యక్తం చేశారు. ఆయనను “ప్లేయర్స్ కెప్టెన్” అంటూ అభివర్ణించిన బదాని, గత సీజన్‌లో లభించిన విజయానికి కారణమైన ఆత్మవిశ్వాసం, జట్టు స్పూర్తి ఈసారి కూడా కొనసాగుతుందని ఆశాభావం వ్యక్తం చేశారు.

మరిన్ని వార్తలు చదవండి: టీ20 వరల్డ్ కప్ 2026: భారత్ షెడ్యూల్, గ్రూపులు, వేదికలు