Ind vs NZ: గైక్వాడ్‌కు చోటు దక్కకపోవడంపై బీసీసీఐపై అభిమానుల ఆగ్రహం

న్యూజిలాండ్‌తో జరగనున్న వన్డే సిరీస్‌కు బీసీసీఐ ప్రకటించిన భారత జట్టు ఇప్పుడు దేశవ్యాప్తంగా తీవ్ర చర్చకు దారి తీసింది. ఆ జట్టులో రుతురాజ్ గైక్వాడ్‌కు చోటు కల్పించకపోవడం అభిమానుల్లో తీవ్ర ఆగ్రహాన్ని రేకెత్తిస్తోంది. సోషల్ మీడియా వేదికగా బీసీసీఐ సెలక్టర్లపై విమర్శల వర్షం కురుస్తోంది.

గైక్వాడ్ మాత్రమే కాదు, అద్భుతమైన ఫామ్‌లో ఉన్న మరో నలుగురు స్టార్ ఆటగాళ్లను కూడా ఎంపిక చేయకపోవడం ఇప్పుడు హాట్ టాపిక్‌గా మారింది. అసలు సెలక్టర్ల ఆలోచన ఏమిటి? ఇంతటి ప్రదర్శన చేసిన ఆటగాళ్లకు ఎందుకు అవకాశం ఇవ్వడం లేదని అభిమానులు ప్రశ్నిస్తున్నారు.

సెంచరీ చేసినా దక్కని అవకాశం

సౌతాఫ్రికాతో రాయ్‌పూర్ వేదికగా జరిగిన వన్డేలో 105 పరుగులతో మెరిసిన రుతురాజ్ గైక్వాడ్‌ను జట్టు నుంచి తప్పించడం ఎవరికీ అర్థం కావడం లేదు. అంతర్జాతీయ క్రికెట్‌లోనే కాకుండా, ప్రస్తుతం జరుగుతున్న విజయ్ హజారే ట్రోఫీలో కూడా గైక్వాడ్ అద్భుతంగా రాణిస్తున్నాడు.

ఉత్తరాఖండ్‌పై 124 పరుగులు, ముంబైపై 66 పరుగులు చేసి మహారాష్ట్రకు విజయాలు అందించినా, సెలక్టర్ల దృష్టిలో అతడికి స్థానం దక్కలేదు. సెంచరీ కొట్టడమే గైక్వాడ్ చేసిన తప్పా అంటూ అభిమానులు బీసీసీఐని నిలదీస్తున్నారు.

సెలక్షన్ రోజే సెంచరీలు చేసినా ప్రయోజనం లేకుండా

ఇంకో విచిత్రమైన విషయం ఏమిటంటే, భారత జట్టును ప్రకటించిన రోజే ముగ్గురు ఆటగాళ్లు విజయ్ హజారే ట్రోఫీలో సెంచరీలు బాది తమ సత్తా చాటారు. అక్షర్ పటేల్, తిలక్ వర్మ, సంజు శాంసన్ ముగ్గురూ శనివారం శతకాలు సాధించారు. అయినా సెలక్టర్లు వీరిని పూర్తిగా విస్మరించారు.

అక్షర్ లాంటి నమ్మకమైన ఆల్‌రౌండర్‌కు, తిలక్ వర్మ లాంటి యువ ప్రతిభావంతుడికి అవకాశం ఇవ్వకపోవడం వెనుక కారణం ఏమిటో అర్థం కాక అభిమానులు నిరాశ వ్యక్తం చేస్తున్నారు.

షమీ రీఎంట్రీ ఆశలు అడియాసలే

సీనియర్ పేసర్ మహమ్మద్ షమీ మళ్లీ భారత జట్టులోకి వస్తాడని అభిమానులు ఎంతో ఆశించారు. కానీ తుది జట్టులో అతని పేరు లేకపోవడంతో ఆ ఆశలు అడియాసలయ్యాయి. షమీ రీఎంట్రీపై వచ్చిన వార్తలన్నీ పుకార్లేనని తేలిపోయింది.

అదే విధంగా సంజు శాంసన్ విషయంలో కూడా సెలక్టర్లు పాత విధానాన్నే కొనసాగిస్తున్నారని, ఎన్ని సెంచరీలు చేసినా అతడికి న్యాయం జరగడం లేదని కేరళ అభిమానులు ఆగ్రహం వ్యక్తం చేస్తున్నారు.

సోషల్ మీడియాలో ట్రెండింగ్

బీసీసీఐ నిర్ణయానికి వ్యతిరేకంగా జస్టిస్ ఫర్ రుతురాజ్, బీసీసీఐకి అవమానం వంటి హ్యాష్‌ట్యాగ్‌లు సోషల్ మీడియాలో ట్రెండ్ అవుతున్నాయి. ఫామ్‌లో ఉన్న గైక్వాడ్‌ను ఏ ప్రాతిపదికన తప్పించారని సెలక్టర్లను నెటిజన్లు ప్రశ్నిస్తున్నారు.

గిల్, రోహిత్ శర్మ, విరాట్ కోహ్లీ వంటి సీనియర్ ఆటగాళ్లు జట్టులో ఉన్నప్పటికీ, ఫామ్‌లో ఉన్న యువ ఆటగాళ్లను పక్కన పెట్టడం రాబోయే పెద్ద టోర్నమెంట్లపై ప్రభావం చూపే అవకాశం ఉందని క్రికెట్ విశ్లేషకులు అభిప్రాయపడుతున్నారు.

మరిన్నివార్తలుచదవండి: సాయి సుదర్శన్ గాయపడి విజయ్ హజారే ట్రోఫీలో దూరం, ఐపీఎల్ 2026లో తిరిగి కోలుకోనున్నారు