IPL 2026 Auction: ఈ ఐదుగురు అన్‌క్యాప్డ్ పేసర్లపై భారీ అంచనాలు

ఇండియన్ ప్రీమియర్ లీగ్ (ఐపీఎల్)–2025 వేలం నేపథ్యంలో ఈసారి దేశీ, విదేశీ ఆటగాళ్లపై భారీ ఆసక్తి నెలకొంది. భారత ఆటగాళ్లలో వెంకటేశ్ అయ్యర్, పృథ్వీ షా, రవి బిష్ణోయి, సర్ఫరాజ్ ఖాన్ లాంటి పేర్లు అందరి దృష్టిని ఆకర్షిస్తుండగా, విదేశీ ప్లేయర్లలో కామెరాన్ గ్రీన్, క్వింటన్ డికాక్, డేవిడ్ మిల్లర్ వంటి స్టార్లు హైలైట్‌గా నిలవనున్నారు. స్టార్ ఆటగాళ్లతో పాటు ఈసారి ఐపీఎల్ వేలంలో ఐదుగురు భారత అన్‌క్యాప్డ్ బౌలర్లు కూడా మంచి ధర పలికే అవకాశాలు ఉన్నట్లు క్రికెట్ వర్గాలు భావిస్తున్నాయి.

ఆకిబ్ నబీ

జమ్మూ–కాశ్మీర్‌కు చెందిన పేసర్ ఆకిబ్ నబీ ఈసారి వేలంలో ఆసక్తికర ఆటగాడిగా నిలవనున్నాడు. అనుభవంతో పాటు నైపుణ్యం ఉన్న ఈ రైట్ ఆర్మ్ ఫాస్ట్ బౌలర్ ఇటీవలి దేశీ సీజన్లలో అద్భుత ప్రదర్శన కనబరిచాడు. 2025–26 రంజీ సీజన్‌లో చక్కటి బౌలింగ్‌తో ఆకట్టుకున్న అతడు, సయ్యద్ ముస్తాక్ అలీ ట్రోఫీలోనూ దుమ్మురేపాడు.

ఈ టోర్నీలో ఏడు మ్యాచ్‌ల్లో 15 వికెట్లు తీసిన ఆకిబ్, అత్యధిక వికెట్లు తీసిన బౌలర్ల జాబితాలో నాలుగో స్థానంలో నిలిచాడు. అంతేకాదు, మధ్యప్రదేశ్‌తో జరిగిన మ్యాచ్‌లో బ్యాట్‌తోనూ కీలక పాత్ర పోషించాడు. వేలానికి ముందు అతడి ఈ ఆల్‌రౌండ్ ప్రదర్శన ఫ్రాంచైజీలను ఆకర్షిస్తోంది.

రాజ్ లింబాని

అండర్–19 వరల్డ్ కప్ ఫైనల్‌కు చేరిన భారత జట్టులో సభ్యుడిగా ఉన్న రాజ్ లింబాని మరో ఆసక్తికర యువ పేసర్. 2024లో టీ20 ఫార్మాట్‌లో అరంగేట్రం చేసిన ఈ కుడిచేతి వేగబౌలర్ ఇప్పటివరకు 11 మ్యాచ్‌ల్లో 16 వికెట్లు పడగొట్టాడు. అండర్–19 వరల్డ్ కప్‌లో కొత్త బంతితో అద్భుతంగా రాణించిన లింబాని, డెత్ ఓవర్లలోనూ తనదైన శైలిలో బౌలింగ్ చేయగలడని నిరూపించాడు.

అశోక్ శర్మ

సయ్యద్ ముస్తాక్ అలీ ట్రోఫీ 2025–26లో రాజస్థాన్ తరఫున ఆడుతున్న అశోక్ శర్మ ఈ సీజన్‌లో హాట్ టాపిక్‌గా మారాడు. ఇప్పటివరకు ఏడు మ్యాచ్‌ల్లో ఏకంగా 19 వికెట్లు తీసి లీడింగ్ వికెట్ టేకర్‌గా కొనసాగుతున్నాడు. గతంలో రాజస్థాన్ రాయల్స్, కోల్‌కతా నైట్‌రైడర్స్ జట్లకు నెట్ బౌలర్‌గా పని చేసిన అశోక్ శర్మకు ఈసారి ఐపీఎల్‌లో ఆడే అవకాశం దక్కే సూచనలు కనిపిస్తున్నాయి.

ఈడెన్ ఆపిల్ టామ్

కేరళకు చెందిన యువ పేసర్ ఈడెన్ ఆపిల్ టామ్ తాజాగా బౌలింగ్ సంచలనంగా అవతరించాడు. ఇప్పటివరకు ఆడిన ఏడు ఫస్ట్ క్లాస్ మ్యాచ్‌ల్లో రెండుసార్లు నాలుగు వికెట్ల ప్రదర్శన నమోదు చేసిన ఈ 20 ఏళ్ల రైట్ ఆర్మ్ పేసర్, తాజా రంజీ సీజన్‌లో మధ్యప్రదేశ్‌పై (4/55, 2/33)తో ఆకట్టుకున్నాడు.

మొత్తంగా ఏడు ఫస్ట్ క్లాస్ మ్యాచ్‌ల్లో 19 వికెట్లు తీసిన ఈడెన్‌కు పరిమిత ఓవర్ల క్రికెట్‌లో అనుభవం తక్కువే. అయినప్పటికీ అతడి సహజ వేగం, నైపుణ్యాల కారణంగా కనీస ధర రూ.20 లక్షలకైనా వేలంలో అమ్ముడుపోయే అవకాశం ఉంది.

ఆకాశ్ మధ్వాల్

2023లో ఐపీఎల్‌లో అడుగుపెట్టిన ఆకాశ్ మధ్వాల్ ముంబై ఇండియన్స్ తరఫున తన ప్రతిభను చాటాడు. ఆ తర్వాత రాజస్థాన్ రాయల్స్ జట్టుకు మారి అక్కడ కూడా మంచి ప్రదర్శన కనబరిచాడు. ఇప్పటివరకు ఐపీఎల్‌లో 17 మ్యాచ్‌లు ఆడి 23 వికెట్లు తీసిన అనుభవం అతడికి ఉంది.

అయితే సయ్యద్ ముస్తాక్ అలీ ట్రోఫీ 2025–26లో ఉత్తరాఖండ్ తరఫున ఆడిన మధ్వాల్ పెద్దగా ప్రభావం చూపలేకపోయాడు. ఆరు మ్యాచ్‌ల్లో కేవలం మూడు వికెట్లే తీసుకున్నాడు. అయినప్పటికీ ఐపీఎల్ అనుభవం, డెత్ ఓవర్లలో యార్కర్లు వేయగల సామర్థ్యం కారణంగా ఈసారి కూడా అతడికి మంచి ధర దక్కే అవకాశాలు ఉన్నాయి.

మరిన్ని వార్తలు చదవండి: IPL 2026 మినీ వేలం ముందు గ్రీన్ బిగ్ అప్‌డేట్.. మేనేజర్ తప్పిదమా?