ఐపీఎల్‌కు షాక్: డబ్ల్యూసీఏ ర్యాంకింగ్స్‌లో మూడో స్థానం

ప్రపంచంలో ఫ్రాంచైజీ ఆధారిత క్రికెట్ లీగ్‌లలో అత్యంత ప్రతిష్టాత్మకంగా గుర్తింపు పొందిన టోర్నమెంట్‌గా ఇండియన్ ప్రీమియర్ లీగ్ (ఐపీఎల్) ఎన్నేళ్లుగా కొనసాగుతోంది. అయితే తాజాగా వరల్డ్ క్రికెటర్స్ అసోసియేషన్ విడుదల చేసిన ర్యాంకింగ్స్ క్రికెట్ ప్రపంచంలో చర్చకు దారి తీసాయి. ఈ నివేదిక ప్రకారం ఐపీఎల్ 62.6 స్కోర్‌తో మూడో స్థానంలో నిలిచింది. ఇంగ్లాండ్‌కు చెందిన ది హండ్రెడ్ (75.2) మొదటి స్థానంలో ఉండగా, దక్షిణాఫ్రికా ఎస్‌ఏ20 (68.0) రెండో స్థానాన్ని దక్కించుకుంది.

ఈ ర్యాంకింగ్స్ 13 కీలక ప్రమాణాల ఆధారంగా రూపొందించబడ్డాయి. ప్లేయర్ చెల్లింపులు, చెల్లింపుల విశ్వసనీయత, వివాద పరిష్కారం, ప్లేయర్ సంక్షేమం వంటి అంశాల్లో ది హండ్రెడ్ అగ్రస్థానంలో నిలిచింది. గత రెండు సంవత్సరాల్లో ఎలాంటి చెల్లింపుల సమస్యలు లేకపోవడం, మంచి ఆదాయ పంపిణీ వ్యవస్థ ఉండటం వలన ఈ లీగ్‌కు 4.8/5 రేటింగ్ లభించింది.

రెండో స్థానంలో ఉన్న ఎస్‌ఏ20 కూడా గవర్నెన్స్, భద్రత, ప్లేయర్ హక్కుల విషయంలో మంచి ప్రదర్శన కనబరిచింది. అయితే ప్లేయర్లకు ఇచ్చే వేతనాల విషయంలో ఇంకా మెరుగుదల అవసరం ఉంది.

ప్లేయర్ సంపాదనలో ముందున్నా, నిర్మాణంలో వెనుకబడిన ఐపీఎల్

ఐపీఎల్ విషయానికి వస్తే, ప్రపంచంలో అత్యంత ధనిక లీగ్‌లలో ఒకటిగా ఉన్నప్పటికీ, కొన్ని విభాగాల్లో వెనుకబడింది. ప్లేయర్ సంపాదన, చెల్లింపుల విషయంలో ఐపీఎల్ ముందంజలో ఉన్నప్పటికీ, వివాద పరిష్కారం, ప్లేయర్ హక్కులు, కమర్షియల్ నిర్మాణం, ఆదాయ పంపిణీ అంశాల్లో మార్కులు తగ్గాయి. ఐపీఎల్‌కు 3.7/5 రేటింగ్ రావడం దీని బలాలు మరియు లోపాలను స్పష్టంగా చూపిస్తుంది.

ఆస్ట్రేలియాకు చెందిన బిగ్ బాష్ లీగ్ 62.5 స్కోర్‌తో ఐపీఎల్‌కు దగ్గరగా ఉంది. గవర్నెన్స్ పరంగా మంచి ప్రదర్శన చూపించినా, ప్లేయర్ చెల్లింపుల్లో కొంత వెనుకబడి ఉంది. పాకిస్తాన్ సూపర్ లీగ్ 48.0 స్కోర్‌తో ఐదో స్థానంలో నిలిచింది. ఆర్థిక పరిమితులు, నిర్మాణ సమస్యలు దీని ర్యాంక్‌పై ప్రభావం చూపించాయి.

అమెరికాలోని మేజర్ లీగ్ క్రికెట్ ఆరో స్థానంలో ఉంది. ఈ లీగ్ సంస్థాగతంగా, చెల్లింపు వ్యవస్థలో మెరుగైన ప్రదర్శన చూపుతున్నప్పటికీ, ఇంకా అభివృద్ధి దశలోనే ఉంది.

ఇతర లీగ్‌ల విషయానికి వస్తే, ఐఎల్టీ20, కరేబియన్ ప్రీమియర్ లీగ్, అబుదాబి టీ10 వంటి లీగ్‌లు ప్లేయర్ చెల్లింపులు మరియు గవర్నెన్స్ పరంగా వెనుకబడ్డాయి. బంగ్లాదేశ్ ప్రీమియర్ లీగ్ మాత్రం 22.6 స్కోర్‌తో చివరి స్థానంలో నిలిచింది. చెల్లింపులు, గవర్నెన్స్, ప్లేయర్ సంక్షేమం వంటి అంశాల్లో పెద్ద లోపాలు ఈ లీగ్ ర్యాంక్‌ను ప్రభావితం చేశాయి.

ఈ ర్యాంకింగ్స్ ద్వారా స్పష్టమవుతున్న విషయం ఏమిటంటే, కేవలం డబ్బు ఉండటం మాత్రమే ఒక లీగ్‌ను అత్యుత్తమంగా చేయదు. నిర్మాణం, ప్లేయర్ హక్కులు, గవర్నెన్స్ వంటి అంశాలు కూడా కీలకం.

ఐఎంఎల్ 2026 పూర్తి షెడ్యూల్ జట్లు కెప్టెన్లు మ్యాచ్ తేదీలు మరియు వేదికలు